قازاقستان مەن وزبەكستان اراسىنداعى تاۋار اينالىمى 1,4 ميلليارد دوللارعا جۋىقتادى

تاشكەنت. KAZINFORM - قاڭتار-ءساۋىر ايلارىنىڭ قورىتىندىسى بويىنشا قازاقستان وزبەكستاننىڭ نەگىزگى ساۋدا سەرىكتەستەرىنىڭ ۇشتىگىندە قالدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

وزبەكستان ۇلتتىق ستاتيستيكا كوميتەتىنىڭ اقپاراتىنا ساي، قاڭتار-ءساۋىر ارالىعىندا ەلدىڭ سىرتقى ساۋدا اينالىمى 24,6 ميلليارد دوللارعا جەتىپ، بىلتىرعى كەزەڭمەن سالىستىرعاندا 16,3 پايىز عا ءوستى. بۇگىنگى تاڭدا كورشىلەس مەملەكەت الەمنىڭ 183 ەلىمەن ساۋدا-ساتتىق جاسايدى.

ەلدىڭ نەگىزگى ساۋدا سەرىكتەستەرى كوشىن قىتاي باستاپ تۇر. ەكى مەملەكەت اراسىنداعى تاۋار اينالىمى 4,1 ميلليارد دوللاردان (جالپى كولەمنىڭ 17 پايىز) استى.

ودان كەيىنگى ورىندا ساۋدا- ساتتىقتىڭ 15,1 پايىز ۇلەسى تيەسىلى رەسەي تۇر. بۇل ەلمەن اراداعى يمپورت-ەكسپورت كولەمى 3,7 ميلليارد دوللاردان ارتىق.

سونىمەن قاتار، كوشباسشىلاردىڭ ۇشتىگىن قازاقستان تۇيىندەيدى. ءبىزدىڭ ەل مەن وزبەكستان اراسىنداعى تاۋار اينالىمى 1,4 ميلليارد دوللارعا (5 پايىز) جۋىقتايدى. بۇل وتكەن جىلدىڭ سايكەس كەزەڭىمەن سالىستىرعاندا 168 ميلليون دوللارعا كوپ.

قامتىلىپ وتىرعان كەزەڭدە وزبەكستان قازاقستانعا 405,7 ميلليون دوللاردىڭ تاۋارىن ەكسپورتتاپ، 986,8 ميلليون دوللاردان استام سوماعا تاۋار يمپورتتاعان.

ەسكە سالايىق، رەسمي استانا مەن تاشكەنت ءوزارا تاۋار اينالىمىن 10 ميلليارد دوللارعا جەتكىزۋگە مۇددەلى. اتالعان كورسەتكىشكە قول جەتكىزۋ ءۇشىن قازاقستان مەن وزبەكستان اراسىندا قوسىمشا 4 ساۋدا ءدالىزى اشىلۋى مۇمكىن.

قوسا كەتسەك، بىلتىر قازاقستان مەن وزبەكستان اراسىنداعى ءوزارا تاۋار اينالىمى 4,2 ميلليارد دوللاردان استى.