قازاقستان مەن قىتاي: حالىقارالىق تەلەجوبا قوس ەلدە قاتار كورسەتىلدى

استانا. KAZINFORM - كۇنى كەشە حالىقارالىق Silk Way ارناسى تەلەدەبات ۇيىمداستىرعان ەدى. بۇل جوبا بۇگىن CGTN تەلەارناسىندا دا كورسەتىلمەك.

وسىعان وراي، قىتايداعى ەڭ تانىمال تەلەارنانىڭ جۇرگىزۋشىسى تيان ۆەي «Бүгін LIVE» ستۋدياسىندا قوناق بولىپ، شارادان العان اسەرىمەن ءبولىستى.

- تەلەدەبات ءسوزسىز وتە تاماشا ءوتتى. تانىمدىق ءارى قىزۋ پىكىرتالاس بولدى. كوپتەگەن ماڭىزدى ماسەلە تالقىلاندى. «ورتالىق ازيا - قىتاي» سامميتىنىڭ ارقاسىندا وسىنداي اۋقىمدى جوبانى ۇيىمداستىرا العانىمىزعا قۋانىشتىمىن. CGTN - قىتايداعى ەڭ تانىمال تەلەارنالاردىڭ ءبىرى بولسا، Silk Way - قازاقستانداعى حالىقارالىق باعىتتاعى جەتەكشى ارنا. وسى ەكى ارنانىڭ بىرلەسىپ جاساعان ۇلكەن جوباسى قوس ەلدە دە كورسەتىلەدى. Silk Way ارناسىندا باعدارلاما التى تىلدە ۇسىنىلسا، CGTN ارقىلى دا كورەرمەندەرگە جول تارتتى، - دەيدى جۋرناليست.

حالىقارالىق شاراعا تەك كاسىبي ساراپشىلار عانا ەمەس، استانالىق ستۋدەنتتەر دە قاتىسىپتى.

- بۇل تەلەدەباتقا ساراپشىلار عانا ەمەس، ماقسۇت نارىكبايەۆ اتىنداعى ۋنيۆەرسيتەتتىڭ ستۋدەنتتەرى دە قاتىستى. ولار كوپتەگەن قىزىقتى سۇراق قويىپ، وزەكتى ماسەلەلەردى ەركىن تالقىلادى. جاستاردىڭ قاتىسۋى پىكىرتالاسقا سەرپىن بەرىپ، جاڭا كوزقاراستار ۇسىندى، - دەيدى ستۋديا قوناعى.

تيان ۆەي قازاقستانعا ەكىنشى رەت كەلىپ وتىر. ول وسى ەكى ارالىقتا ەلوردا ءبىرشاما وزگەرگەنىن ايتتى.

- بۇل - مەنىڭ قازاقستانعا ەكىنشى رەت كەلۋىم. بىلتىر شاڭحاي ىنتىماقتاستىق ۇيىمىنىڭ سامميتىنە وراي كەلگەن بولاتىنمىن. سول ساپاردا دا بىرلەسكەن تەلەجوبا جاسادىق. بيىل ەلدە كوپ وزگەرىس بولىپتى. قالا كوركەيىپ، دامىپ كەلەدى. تەك ەلوردا عانا ەمەس، جالپى قازاقستان بويىنشا جاڭا جوبالار مەن باستامالاردى كورىپ، تانىستىم. قىتاي مەن ورتالىق ازيا ەلدەرى دە ءوز ورنىن الەمگە تانىتىپ جاتىر. كەشە ۇلتتىق مۋزەيگە باردىم. ءبىز سول جەردە دە سيۋجەتتەر تۇسىردىك. ول مۋزەيدە كورنەكتى تاريحي ەكسپوناتتار بار ەكەن. وتە كەرەمەت اسەر الدىم، - دەيدى ول.

تانىمال تەلەجۇرگىزۋشى ءوز ەڭبەك جولىندا كوپتەگەن بەدەلدى تۇلعامەن سۇحبات جۇرگىزگەن. دەسە دە قاراپايىم حالىقپەن اڭگىمەلەسۋ اسەرلىرەك دەيدى مامان.

- مەن كوپتەگەن ادامنان سۇحبات الدىم. اسىرەسە، ب ۇ ۇ باس حاتشىسى انتونيۋ گۋتەررەش پەن دۇنيەجۇزىلىك ساۋدا ۇيىمىنىڭ باس ديرەكتورىمەن وتكەن سۇحباتتار ەرەكشە ەسىمدە قالدى. بۇل سۇحباتتار وتە ماڭىزدى، ويتكەنى قىتاي مەن قازاقستان اراسىنداعى بايلانىس تەك ەكونوميكامەن شەكتەلمەيدى. حالىقارالىق ۇيىم باسشىلارىمەن عانا ەمەس، قاراپايىم ادامدارمەن دە سۇحباتتاسۋ وتە قىزىقتى. وسىنداي اڭگىمەلەر بارىسىندا كوپ نارسەگە كوز جەتكىزىپ، جاڭا نارسەلەردى ۇيرەنەمىن. شاعىن بولسا دا، مۇنداي ديالوگتاردا ماڭىزدى ماسەلەلەر كوتەرىلەدى، - دەيدى تيان ۆەي.

ستۋديا قوناعى «Бүгін LIVE» تۋرالى دا پىكىر ءبىلدىرىپ، باعدارلاما ۇجىمىنا العىسىن جەتكىزدى.

- بۇل سۇحبات تا مەنىڭ ەسىمدە ساقتالاتىنى انىق. سىزدەرگە شىن جۇرەكتەن العىس ايتامىن. «Бүгін LIVE» - وتە قىزىقتى ءارى مازمۇندى باعدارلاما ەكەن. باعدارلامانىڭ كورەرمەنى كوپ بولسىن. مەديا سالاسىنداعى ءوزارا ىنتىماقتاستىعىمىز الداعى ۋاقىتتا دا نىعايا بەرەدى دەپ سەنەمىن، - دەيدى CGTN تەلەارناسىنىڭ قىزمەتكەرى.

ايتا كەتەيىك، استانادا «تاتۋ كورشىلىك جانە دوستىق: بولاشاققا بىرگە قادام» ورتالىق ازيا - قىتاي گۋمانيتارلىق الماسۋ فورۋمى ءوتتى.

اۆتور

ارۋجان ماحمۋت