قازاقستان مەن قىتاي دەنساۋلىق ساقتاۋ سالاسىنداعى ىنتىماقتاستىقتى ارتتىرادى

استانا. قازاقپارات- بەيجىڭدە قازاقستان مەن قىتاي اراسىندا دەنساۋلىق ساقتاۋ سالاسىنداعى ىنتىماقتاستىق ماسەلەلەرى تالقىلاندى، دەپ حابارلايدى 24KZ.

قوس تاراپ عىلىم، تەحنولوگيا، فارماتسيەۆتيكا ءوندىرىسى، ينۆەستيتسيا، تاجىريبە الماسۋ سياقتى ماڭىزدى باعىتتار بويىنشا بىرلەسىپ جۇمىس ىستەۋگە كۇش سالادى. بۇل جونىندە ەكى ەلدىڭ دەنساۋلىق ساقتاۋ سالاسى باسشىلارىنىڭ رەسمي كەزدەسۋى كەزىندە ايتىلدى.

سونىمەن قاتار جيىندا مامان دايارلاۋ ىسىندە ارىپتەستىك ورناتۋ جايى ءسوز بولدى. ەكى ەلدىڭ دارىگەرلەرى نەيروحيرۋرگيا، ونكولوگيا، كارديوحيرۋرگيا سالاسىندا تاجىريبە الماسادى. بۇل جاس مامانداردىڭ بىلىكتىلىگىن ارتتىرۋعا جول اشادى. جوسپار جۇزەگە اسسا، قازاقستاندىق ستۋدەنتتەر قىتايدىڭ 60-تان استام مەديتسينالىق جوعارى وقۋ ورىندارىندا ءبىلىم الۋعا مۇمكىندىك الادى. بۇل باعىتتاعى جۇمىستار شاڭحاي ىنتىماقتاستىعى ۇيىمى اياسىندا دا جۇزەگە اسىرىلادى.

اقمارال ءالنازاروۆا، ق ر دەنساۋلىق ساقتاۋ ءمينيسترى:

- شاڭحاي ىنتىماقتاستىق ۇيىمى - ىقپالدى حالىقارالىق ينستيتۋت. مەديتسينادا ۇيىمعا مۇشە ەلدەردىڭ ءارقايسىسىنىڭ وزىندىك تاجىريبەسى بار. ءوزارا تاجىريبە الماسۋ بارلىق تاراپقا دا ءتيىمدى بولار ەدى. قازاقستان ۇيىمعا مۇشە مەملەكەتتەر اراسىندا شۇعىل مەديتسينا جۇيەسىن قۇرۋ سالاسىنداعى ارىپتەستىكتى نىعايتۋعا مۇددەلى.

سونىمەن قاتار قىتايدىڭ ۇيىمعا ءتوراعالىعى اياسىندا 2025 -جىلى شاڭحاي ىنتىماقتاستىق ۇيىمى مەديتسينالىق قاۋىمداستىعىن قۇرۋ ماسەلەسىن قاراستىرىپ، ونىڭ مۇشە ەلدەر اۋماعىندا قىزمەت ەتۋىنە ىقپال ەتۋدى ۇسىنامىز.

24.kz