قازاقستان ايەلدەرى اراسىنان شىققان تۇڭعىش پەداگوگيكا عىلىمدارىنىڭ دوكتورى ومىردەن وزدى

استانا. KAZINFORM - قازاق مەملەكەتتىك قىزدار پەداگوگيكالىق ينستيتۋتىنىڭ 1968- 1984 -جىلدارعى رەكتورى، پەداگوگيكا عىلىمدارىنىڭ دوكتورى، اكادەميك، پروفەسسور قۇنانتايەۆا كۇلاش قۇنانتاي قىزى ومىردەن وزدى. بۇل تۋرالى وقۋ ورداسىنىڭ باسپا ءسوز قىزمەتى حابارلادى.

كۇلاش قۇنانتاي قىزى 1931 -جىلعى 4-ناۋرىزدا شىعىس قازاقستان وبلىسىنىڭ ۇلان اۋدانىندا دۇنيەگە كەلگەن. 1952 -جىلى قازاق مەملەكەتتىك قىزدار پەداگوگيكالىق ينستيتۋتىنىڭ فيلولوگيا فاكۋلتەتىن بىتىرگەن. قازاقستان ايەلدەرىنىڭ اراسىنان شىققان تۇڭعىش پەداگوگيكا عىلىمدارىنىڭ دوكتورى. 1966-جىلى «نەكوتورىە ۆنەۋچەبنىە ترۋدوۆىە ي وبرازوۆاتەلنىە وبەدينەنيا ۋچاشيحسيا كازاحستانا» تاقىرىبىندا كانديداتتىق جانە 1981 -جىلى «رازۆيتيە جەنسكوگو وبرازوۆانيا ۆ كازاحستانە (1920-1975)» تاقىرىبىندا دوكتورلىق ديسسەرتاتسياسىن قورعادى.

1968-1984-جىلدارى قازاق مەملەكەتتىك قىزدار پەداگوگيكالىق ينستيتۋتىن ەڭ ۇزاق ۋاقىت باسقارعان بىلىكتى رەكتور. 16 جىل ارالىعىندا كۇلاش قۇنانتاي قىزى وقۋ ورنىن جاڭا دەڭگەيگە كوتەردى. سول كەزەڭدە زامان تالابىنا ساي وقۋ عيماراتتارى مەن ءۇش جاتاقحانا سالىنىپ، پايدالانۋعا بەرىلدى.

سونىمەن قاتار 1200 ادامدى ءبىر مەزگىلدە تاماقتاندىراتىن اسحانا، كىتاپحانا مەن سپورت كەشەندەرى ىسكە قوسىلدى. كۇلاش قۇنانتاي قىزىنىڭ تىكەلەي ىقپالىمەن 80 پاتەرلىك تۇرعىن ءۇي سالىنىپ، باسپاناسىز جۇرگەن ينستيتۋت قىزمەتكەرلەرى مەن مۇعالىمدەرىنە بەرىلدى. جاڭادان 12 زەرتحانا اشىلدى، سونداي- اق ستۋدەنتتەر كونتينگەنتى 3600 دان 6200 گە جەتتى، فاكۋلتەتتەر سانى 4 تەن 6 عا، كافەدرالار سانى 19 دان 28 گە ارتتى.

وتاندىق پەداگوگيكا عىلىمىنىڭ دامۋىنا سۇبەلى ۇلەس قوسقان كورنەكتى عالىم، ۇلاعاتتى ۇستاز كۇلاش قۇنانتاي قىزى - ەلىمىزدىڭ جوعارى ءبىلىم بەرۋ سالاسىنىڭ دامۋىندا ءوز قولتاڭباسىن قالىپتاستىرعان قايراتكەر.

اۆتور

مارلان جيەمباي