قازاقستان ارقىلى ازەربايجانعا: ترانسكاسپي باعىتى بويىنشا قىتايدان العاشقى پويىز اتتاندى

استانا. KAZINFORM - شانسي پروۆينتسياسىنان ترانسكاسپي باعىتى بويىنشا جۇك پويىزى العاش رەت جولعا شىقتى. ول قازاقستان ارقىلى وتەدى، دەپ حابارلايدى شينحۋا.

سالماعى 1159 توننا بولاتىن فوتوەلەكترلى اككۋمۋلياتورلار جيناعى بار 50 ستاندارتتى كونتەينەر تيەلگەن پويىز قىتايدىڭ سولتۇستىگىندەگى شانسي پروۆينتسياسىنىڭ جينچجۋن قالاسىنان ازەربايجان استاناسى باكۋگە جول تارتتى، بۇل پروۆينتسيانىڭ ترانسكاسپي باعىتى بويىنشا قىتاي- ەۋروپا تەمىرجول تاسىمالىنىڭ ىسكە قوسىلعانىن بىلدىرەدى.

جەرگىلىكتى Huayuan International Land Port كومپانياسىنىڭ باسپا ءسوز قىزمەتىنىڭ حابارلاۋىنشا، پويىز چجۋندين لوگيستيكالىق ورتالىعىنان شىققان. ول قازاقستان اۋماعى ارقىلى ءوتىپ، اقتاۋ پورتىنا جەتەدى، ودان جۇك پاروممەن ازەربايجانعا جەتكىزىلەدى.

ءداستۇرلى ادىسپەن سالىستىرعاندا، بۇل ترانسكاسپييلىك تاسىمالداۋ ۋاقىتىن ايتارلىقتاي قىسقارتۋعا مۇمكىندىك بەرەدى.

بولاشاقتا جەرگىلىكتى وندىرىلگەن فوتوەلەكترلى مودۋلدەر كاۆكاز، تۇركيا جانە شىعىس ەۋروپا ەلدەرىنە ىڭعايلىراق جەتكىزىلەتىن بولادى.

قازىرگى ۋاقىتتا Huayuan حالىقارالىق قۇرلىق پورتى شانسي پروۆينتسياسىن 16 ەلدىڭ 48 قالاسىمەن بايلانىستىراتىن 23 قىتاي-ەۋروپا جانە قىتاي-ورتالىق ازيا باعىتتارى بويىنشا تۇراقتى تەمىرجول تاسىمالداۋلارىن جۇزەگە اسىرادى.

ايتا كەتەيىك، سوڭعى 5  جىلدا ترانسكاسپي حالىقارالىق ترانسپورت باعىتى بويىنشا تاسىمالداناتىن جۇك 6 ەسەگە وسكەن.