پرەزيدەنت ەلىمىزدە باۆاريانىڭ جەتەكشى كومپانيالارى، سونىڭ ىشىندە Siemens, Siemens Energy, Knauf, Horsch جانە باسقا دا كاسىپورىندارى تابىستى جۇمىس ىستەپ جاتقانىن اتاپ ءوتتى. مەملەكەت باسشىسىنىڭ پىكىرىنشە، قازاق- گەرمان ەكونوميكالىق قارىم-قاتىناسىنىڭ كەلەسى كەزەڭى وزىق تەحنولوگيالارمەن، جوعارى تەحنولوگيالىق وندىرىسپەن جانە جاڭا نارىقتاردى بىرلەسە يگەرۋمەن بايلانىستى بولۋعا ءتيىس. بۇل رەتتە قاسىم-جومارت توقايەۆ باۆاريالىق كومپانيا جەتەكشىلەرىنە ەلىمىزدە ينۆەستورلارعا جاسالىپ جاتقان قولايلى جاعداي، اتاپ ايتقاندا، ۇكىمەت جانىنداعى ينۆەستيتسيالىق شتاب پەن استانا حالىقارالىق قارجى ورتالىعى تۋرالى كەڭىنەن ماعلۇمات بەردى. سودان كەيىن پرەزيدەنت ءوزارا ءتيىمدى سەرىكتەستىكتىڭ نەگىزگى باعىتتارىنا توقتالدى.
- وزىق ءوندىرىستى دامىتۋ نەگىزگى باسىمدىقتاردىڭ ءبىرى بولعانى ابزال. قازاقستان ماشينا جاساۋ، مەتاللۋرگيا، ەلەكتر تەحنيكاسى جانە قوسالقى بولشەكتەر ءوندىرىسىن دامىتۋدى قولعا الدى. ايتسە دە ەڭبەك ونىمدىلىگىن ودان ءارى ارتتىرۋ ءۇشىن ءوندىرىستى اۆتوماتتاندىرىپ، روبوتتى تەحنيكا مەن وزىق تەحنولوگيالاردى كەڭىنەن پايدالانۋ قاجەت. Siemens جانە KUKA سەكىلدى كومپانيالار اتالعان سالالاردا كوشباسشى سانالادى. قازاقستاننىڭ ءىرى كاسىپورىندارى، سونىڭ ىشىندە Qarmet تە بار، ونەركاسىپ سالاسىنداعى تۇراقتى سۇرانىس پەن سەنىمدى سەرىكتەستىك بايلانىستاردى قامتاماسىز ەتە الادى. ءورشىل ماقساتتارىمىزدى «قازاقستاندا باۆاريا تەحنولوگياسى ارقىلى نەمىس ساپاسىنا ساي جاسالعان» دەگەن قاراپايىم سوزبەن بەينەلەۋگە بولادى، - دەدى مەملەكەت باسشىسى.
پرەزيدەنت اسا ماڭىزدى ماتەريالداردى سەرىكتەستىكتىڭ تاعى ءبىر باعىتى رەتىندە اتادى.
- نەمىس ونەركاسىبى ماڭىزدى رەسۋرستاردىڭ جەتكىزىلۋ جولدارى سەنىمدى جانە ءار تاراپتان بولۋىنا مۇددەلى. قازاقستان بۇل ورايدا مىس، تيتان، اليۋميني، بەريلي، تانتال، نيوبي سەكىلدى ەلەمەنتتەرمەن ۇزاق ۋاقىت بويى قامتاماسىز ەتە الادى، - دەدى مەملەكەت باسشىسى.