اقوردادا قاسىم-جومارت توقايەۆ World Aquatics پرەزيدەنتى حۋسەين ءال-مۋساللاممەن كەزدەستى.
اڭگىمەلەسۋ بارىسىندا مەملەكەت باسشىسى حالىقارالىق ۇيىمنىڭ قازاقستان سۋ سپورتى تۇرلەرى فەدەراتسياسىنا كورسەتكەن قولداۋىن جوعارى باعالاپ، ءوزارا سەرىكتەستىكتى نىعايتۋعا نيەتتى ەكەنىن راستادى.
قاسىم- جومارت توقايەۆ قازاقستاندىقتاردىڭ سۋ سپورتى تۇرلەرىنە قىزىعۋشىلىعى ارتىپ كەلە جاتقانىن جەتكىزىپ، وتاندىق اتلەتتەر ەل نامىسىن حالىقارالىق دەڭگەيدە، سونىڭ ىشىندە وليمپيادا ويىندارى مەن الەم چەمپيوناتتارىندا لايىقتى قورعاپ جۇرگەنىنە توقتالدى.
وسى ورايدا، پرەزيدەنت دميتري بالانديننىڭ ريو-دە-جانەيرو وليمپياداسىنداعى تاريحي جەڭىسىن، ادىلبەك مۋسيننىڭ 2022 -جىلى وتكەن ازيا ويىندارىندا قولا مەدالعا يە بولعانىن ەسكە سالدى.
مەملەكەت باسشىسىنىڭ ايتۋىنشا، ەلىمىزدە بۇقارالىق جانە كاسىبي سپورتتى دامىتۋعا، جوعارى دەڭگەيدەگى حالىقارالىق جارىستار وتكىزۋگە قاجەتتى جاعداي جاسالۋدا. اسىرەسە، سپورت ينفراقۇرىلىمىن جەتىلدىرۋگە نازار اۋدارىلىپ وتىر.
حۋسەين ءال-مۋساللام قول جەتكىزىلگەن تابىستار مەن قازاقستاندىق سپورتشىلاردىڭ بيىل ⅩⅩ جازعى ازيا ويىندارىندا كورسەتكەن شەبەرلىكتەرى ەلدىڭ سپورت سالاسىن وركەندەتۋگە ايتارلىقتاي الەۋەتى بار ەكەنىن ايعاقتايتىنىن اتاپ ءوتتى.
مەملەكەت باسشىسى الەمدە جانە قازاقستاندا سۋ سپورتى تۇرلەرىن دامىتۋعا ۇلەس قوسقانى ءۇشىن World Aquatics پرەزيدەنتى حۋسەين ءال-مۋساللامدى Ⅱ دارەجەلى «دوستىق» وردەنىمەن ماراپاتتادى.