پرەزيدەنتتىڭ پىكىرىنشە، ونەركاسىپ كووپەراتسياسى - قازاق- گەرمان سەرىكتەستىگىنىڭ ماڭىزدى باعىتتارىنىڭ ءبىرى. بۇگىندە ورتاق پورتفەلدە جالپى قۇنى 54 ميلليارد دوللاردان اساتىن 40 ينۆەستيتسيالىق باستاما بار. ونىڭ ىشىندە 21 جوبا جۇزەگە اسقان.
قاسىم-جومارت توقايەۆ CLAAS ،Horsch ،Amazonen-Werke جانە Knauf سەكىلدى كومپانيالارمەن تابىستى ىنتىماقتاستىق جولعا قويىلعانىن جەتكىزدى. سوڭعى بەس جىلدا CLAAS كومپانياسى قازاقستاندا 2100 دەن اسا اۋىل شارۋاشىلىعى تەحنيكاسىن شىعارعان.
- ورايلى ءساتتى پايدالانىپ، ونەركاسىپ سالاسىنداعى سەرىكتەستىگىمىز ەكىجاقتى ۇدەرىسكە اينالىپ كەلە جاتقانىن ايتقىم كەلەدى. ونى قازاقستاننان گەرمانياعا ونەركاسىپ تاۋارلارىنىڭ ەكسپورتى ارتقانىنان اڭعارامىز. ماسەلەن، وسى ساپار بارىسىندا وتاندىق ماشينا جاساۋ سالاسىنىڭ ونىمدەرىن، سونىڭ ىشىندە نەمىس قۇرال-جابدىعىن قولدانۋ ارقىلى شىعارىلعان تەمىرجول كولىگى دوڭگەلەگىن گەرمانيا نارىعىنا جەتكىزۋ جونىندەگى ۋاعدالاستىققا قول جەتكىزىلدى، - دەدى پرەزيدەنت.
قاسىم-جومارت توقايەۆ قازاقستان گەرمانيالىق كومپانيالارمەن اۆتوماتتاندىرۋ، ستانوك، ونەركاسىپكە ارنالعان روبوتتى تەحنيكا، ماشينا جاساۋ، وزىق ءوندىرىس جانە ۇدەرىستى سيفرلاندىرۋ سالالارىندا ىنتىماقتاستىق اياسىن كەڭەيتۋگە دايىن ەكەنىن مالىمدەدى.
- بۇل مىسالدار ەكونوميكالىق بايلانىستارىمىز الداعى ۋاقىتتا قاي باعىتتا داميتىنىن كورسەتەدى. جەكەلەگەن تابىستى جوبالارمەن شەكتەلمەي، ونەركاسىپ سالاسىنداعى جۇيەلى سەرىكتەستىككە كوشكەنىمىز ءجون. ەلىمىز وسى ماقساتتا قازاقستان- گەرمانيا ينۆەستيتسيالىق- ونەركاسىپ باستاماسىن قولعا الۋعا ءازىر. ونىڭ نەگىزىندە ۇزدىك جوبالاردىڭ ءبىرىڭعاي ءتىزىمى جاساقتالادى. ماقساتىمىز ايقىن: قازاقستاندا جاڭا سالالاردىڭ پايدا بولۋىنا سەپتىگىن تيگىزەتىن، كوممەرتسيالىق تۇرعىدان ومىرشەڭ جوبالاردى ىرىكتەپ الۋ، نەمىس تەحنولوگياسى مەن ءبىلىمىن مەڭگەرۋ، وڭىرلىك جانە الەمدىك نارىقتا باسەكەگە قابىلەتتى ءونىم تۇرلەرىن شىعارۋ. بۇل رەتتە نەمىستىڭ Mittelstand، ياعني ورتا بيزنەس كاسىپورىندارى ايرىقشا ءرول اتقارا الادى، - دەدى پرەزيدەنت.