سونداي-اق باسقوسۋعا قازاقستان رەسپۋبليكاسىنىڭ قىتاي حالىق رەسپۋبليكاسىنداعى توتەنشە جانە وكىلەتتى ەلشىسى شاحرات نۇرىشيەۆ، قازاقستان رەسپۋبليكاسى پرەزيدەنتى تەلەراديوكەشەنىنىڭ ديرەكتورى راۋشان قاجىبايەۆا جانە «Jibek joly» تەلەارناسىنىڭ ديرەكتورى ەركەجان كۇنتۋعان قاتىستى.
ەرلان قارين پرەزيدەنت قاسىم-جومارت توقايەۆتىڭ باسشىلىعىمەن ەلىمىزدە جۇزەگە اسىپ جاتقان مادەني- گۋمانيتارلىق رەفورمالاردىڭ ءمان-مازمۇنى، سونداي-اق سيفرلاندىرۋدى كەڭىنەن دامىتۋ جانە جاساندى ينتەللەكتىنى جاپپاي ەنگىزۋ باعىتىنداعى جۇمىستار تۋرالى ايتتى.
تاراپتار بىلتىر قازاقستاندا وتكەن Silk Way Star حالىقارالىق بايقاۋىنىڭ جوعارى دەڭگەيدە ۇيىمداستىرىلعانىن اتاپ ءوتىپ، بيىل قىتايدا جالعاسىن تاباتىن كونكۋرسقا دايىندىق ماسەلەسىن پىسىقتادى.
جوبانىڭ ءبىرىنشى ماۋسىمىنىڭ ترانسلياتسياسى تەك قىتايدىڭ وزىندە 1 ميللياردتان استام قارالىم جينادى. بيىل بايقاۋدا قازاقستان اتىنان قىتايلىق كورەرمەنگە جاقسى تانىس ءانشى رۋحيا بايدۇكەنوۆا ونەر كورسەتەدى.
- جوبانىڭ ەكىنشى ماۋسىمىنىڭ ءتۇسىرىلىمى 2026 -جىلدىڭ شىلدە ايىندا قىتايدىڭ يۋ قالاسىندا وتەدى دەپ كۇتىلىپ وتىر. جوسپارلانعان 10 شىعارىلىمنىڭ كورسەتىلىمى شىلدە ايىنىڭ سوڭىنان قىركۇيەك ايىنىڭ سوڭىنا دەيىن كوپشىلىككە ۇسىنىلماق. ايرىقشا اتاپ وتەرلىك جايت، Silk Way Star - مۇنداي فورماتتا ۇيىمداستىرىلعان ازياداعى العاشقى حالىقارالىق ۆوكالدىق بايقاۋ. ءارى قازاقستاندىق مەديا جوبا تۇڭعىش رەت قىتايدىڭ ورتالىق تەلەارناسىندا جۇزەگە اسىرىلماق، - دەلىنگەن حابارلامادا.
شەن حايسيۋن مۇنداي جوبالار China Media Group پەن قازاقستان رەسپۋبليكاسى پرەزيدەنتىنىڭ تەلەراديوكەشەنى اراسىنداعى جەمىستى ىنتىماقتاستىقتىڭ ناتيجەسى سانالاتىنىن اتاپ ءوتتى.
كەيىنگى ەكى جىلدا پرەزيدەنت تەلەراديوكەشەنى مەن China Media Group ءبىرقاتار بىرلەسكەن جوبانى جۇزەگە اسىردى. ولاردىڭ قاتارىندا «استانا- بەيجىڭ» تەلەكوپىرى، شاڭحاي ىنتىماقتاستىق ۇيىمىنىڭ سامميتى اياسىنداعى تەلەكونفەرەنتسيا، سونداي-اق ارنايى شىعارىلىمدار مەن دەرەكتى فيلمدەر بار.
سونىمەن قاتار مەملەكەتتىك كەڭەسشى 2026 -جىلعى 1-3-قازاندا استانادا جاساندى ينتەللەكت تەحنولوگيالارىن قولدانۋ ارقىلى تۇسىرىلگەن فيلمدەردىڭ العاشقى حالىقارالىق فەستيۆالى - «Astana AI Film Festival» (AAIFF 2026) وتەتىنىن جەتكىزدى. جاساندى ينتەللەكت كومەگىمەن تۇسىرىلگەن قىسقامەتراجدى فيلمدەردىڭ حالىقارالىق بايقاۋى اتالعان فەستيۆالدىڭ باستى ۋاقيعاسى بولماق.
كەزدەسۋ بارىسىندا تاراپتار مادەني-گۋمانيتارلىق سالاداعى وزەكتى ماسەلەلەردى كەڭىنەن تالقىلاپ، ءوزارا تۇسىنىستىك پەن ىنتىماقتاستىق رۋحىنداعى ديالوگتى ودان ءارى جالعاستىرۋعا ۋاعدالاستى.
ەسكە سالا كەتەيىك، بۇعان دەيىن BBC قازاقستاندىق Silk Way Star جوباسىن گۋمانيتارلىق ديالوگ ۇلگىسى دەپ جازعان بولاتىن.