قازاقستان- بەلگيا: مۋزەيلەر بايلانىستى نىعايتىپ، ۆيزالىق تالاپتار جەڭىلدەيدى

- ەلدەرىمىزدىڭ ۋنيۆەرسيتەتتەرى، مۋزەيلەرى مەن مادەني مەكەمەلەرى اراسىندا تىكەلەي بايلانىس ورناتۋعا، سونىمەن قاتار بىرلەسكەن ءبىلىم بەرۋ باعدارلامالارىن دامىتۋعا جانە اكادەميالىق تاجىريبە الماسۋعا نيەتتى ەكەنىمىزدى راستادىق. دجەيمس ەنسوردىڭ تانىمال تۋىندىلارىن قازاقستاننىڭ ۇلتتىق مۋزەيىندە تانىستىرعان بەلگيالىق سەرىكتەستەرىمىزگە العىسىم شەكسىز. سونداي-اق Almaty Museum of Arts پەن KANAL- Centre Pompidou اراسىنداعى ىنتىماقتاستىقتى ىلگەرىلەتۋدى قولدايمىن. ول بەلگيانىڭ شىعارماشىلىق الەۋەتىن جانە مادەني سالانى دامىتۋعا ۇمتىلىسىن كورسەتەدى. اتالعان باستامالار بەلگيانىڭ باي كوركەم مۇراسىمەن تانىسۋعا، حالىقتارىمىزدىڭ ءبىر-بىرىمەن جاقىن ارالاسۋىنا جول اشادى. قىزمەتتىك پاسپورت يەلەرىن ۆيزا تالاپتارىنان بوساتۋ جونىندەگى كەلىسىمگە وزگەرىستەر ەنگىزۋدىڭ ارقاسىندا بارىس-كەلىسىمىزدى ءبىرشاما جەڭىلدەتۋگە قول جەتكىزدىك. بۇگىن قابىلدانعان بىرلەسكەن مالىمدەمە ورتاق مىندەتتەرگە ساي كەلەدى، - دەدى مەملەكەت باسشىسى.

پرەزيدەنت تاراپتاردىڭ حالىقارالىق جانە وڭىرلىك وزەكتى ماسەلەلەر جونىندە پىكىر الماسقانىن ايتتى.

- قازاقستان مەن بەلگيا حالىقارالىق قۇقىق نورمالارىن ساقتاۋعا، كوپجاقتى ىقپالداستىقتى نىعايتۋعا جانە قاقتىعىستاردى بەيبىت جولمەن رەتتەۋگە بەيىل. جاھاندىق احۋال قۇبىلىپ تۇرعان قازىرگى كەزدە ديالوگ، ءوزارا سەنىم مەن جاۋاپتى ديپلوماتيا ەرەكشە وزەكتى. جۋىردا مەنىڭ بريۋسسەلگە ساپارىم اياسىندا قازاقستان مەن ەۋروپالىق وداق اراسىنداعى ستراتەگيالىق سەرىكتەستىكتىڭ ماڭىزدى ەكەنىن راستادىق. ول ارنايى كەلىسىمدە بەكىتىلدى، - دەدى قاسىم-جومارت توقايەۆ.

مەملەكەت باسشىسى وسى مينۋتتاردا بريۋسسەلدىڭ ورتالىق الاڭى گران-پلاستا، قالالىق راتۋشا عيماراتىنىڭ الدىندا العاش رەت قازاقستاننىڭ مەملەكەتتىك تۋى كوتەرىلگەنىن اتاپ ءوتىپ، ىستىق ىقىلاسى مەن سيمۆوليكالىق مانگە يە قۇرمەتى ءۇشىن بەلگيالىق ارىپتەسىنە العىس ايتتى.

- بەلگيانىڭ «L’union fait la force» دەگەن ۇلتتىق ۇرانى قازاقتىڭ «بىرلىك بار جەردە تىرلىك بار» دەگەن تامسىلىمەن ماعىنالاس. ءبىزدىڭ دوستىعىمىز وسى ورتاق قۇندىلىقتارعا نەگىزدەلگەن. اتالعان مەملەكەتتىك ساپار قازاقستان- بەلگيا قارىم-قاتىناسىن ىلگەرىلەتۋدە بەتبۇرىستى ءسات بولاتىنىنا سەنىمدىمىن. قازاقستان حالقى ءسىزدىڭ مەيىرىمدى، بەكزات ءارى پاراساتتى بولمىسىڭىزدى ءاردايىم قۇرمەت تۇتادى، - دەدى پرەزيدەنت.

ايتا كەتەيىك، 11-14-قازان كۇندەرى بەلگيالىقتار كورولى فيليپپ جانە پاتشايىم ماتيلدانىڭ قازاقستانعا مەملەكەتتىك ساپارى وتەدى.

ساپار باعدارلاماسى ءتورت نەگىزگى باعىتتى قامتيدى. ولار - اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.

بەلگيانىڭ فەدەرالدىق ءمينيسترى جان-ليۋك كريۋيكە قازاقستاندىقتار قىزمەتتىك پاسپورتپەن ەۋروپانىڭ ءۇش ەلىنە ۆيزاسىز بارا الاتىنىن مالىمدەگەن ەدى.

عىلىم جانە جوعارى ءبىلىم ءمينيسترى ساياسات نۇربەك بەلگيانىڭ 12 ۋنيۆەرسيتەتىمەن كەلىسىمشارت ورناتىلاتىنىن ايتتى.