مەملەكەتتەر باسشىلارى ۇلى عۇلاما، اۋليە قوجا احمەت ياساۋي مەن كەسەنە اۋماعىندا جەرلەنگەن باسقا دا بەلگىلى تاريحي تۇلعالاردىڭ رۋحىنا زيارات ەتتى.
پرەزيدەنتتەرگە كەسەنەنىڭ XIV عاسىر سوڭىندا ءامىر تەمىردىڭ بۇيرىعىمەن سالىنعانى، كولەمى جاعىنان ءارتۇرلى 35 بولمەدەن تۇراتىنى جونىندە اقپارات بەرىلدى.
عيماراتتىڭ ىشكى بيىكتىگى 39 مەتردى، ال سىرتقى بيىكتىك ولشەمى 41 مەتردى قۇرايدى.
مارتەبەلى مەيماندار قابىرحانانى، ورتالىق بولمەدە ورنالاسقان قازاندىقتى، تايقازاندى جانە قولا لاۋحانى ارالاپ كوردى.
سونداي-اق ەكسپوزيسيادا تۇركى-يسلام الەمىنىڭ بەلگىلى ويشىلدارى مەن شايىرلارىنىڭ ەڭبەكتەرىنەن تۇراتىن 45 كىتاپ قويىلعان. ولاردىڭ اراسىندا قوجا احمەت ياساۋيدىڭ «ديۋاني حيكمەت»، ءنيزاميدىڭ «حامسا»، ناۋايدىڭ عازالدارى، باقىرعانيدىڭ شىعارمالارى، فيردوۋسيدىڭ «شاحناما»، فيزۋليدىڭ «ءلايلى مەن ءماجنۇن» داستانى، سونىمەن بىرگە «ماناس» جىرىنىڭ ۇزىندىلەرى جانە باسقا دا سيرەك كەزدەسەتىن تۋىندىلار بار.
ايتا كەتەلىك تۇركى مەملەكەتتەرى ۇيىمىنا مۇشە ەلدەردىڭ باسشىلارى تۇركىستان دەكلاراتسياسىنا قول قويعان ەدى.