— وسىعان دەيىن بىرنەشە مارتە ايتقانمىن: ۇلتتى ۇيىستىرىپ، مەملەكەتىمىزدىڭ ىرگەسىن بەكەمدەيتىن ەڭ ماڭىزدى فاكتور — مەملەكەتتىك ءتىل. بۇرىن بولجاممەن، دولبارمەن عانا ايتىلاتىن جاعداي قازىر شىندىققا اينالدى. قازاق ءتىلى قانداي دا ءبىر اكىمشىلىك، ءتىپتى ساياسي ماجبۇرلەۋسىز ءورىسى كەڭەيىپ، كوپشىلىكتىڭ تىلىنە اينالدى. اسىرەسە، جاستارىمىزدىڭ قازاق تىلىندە ەركىن، ساۋاتتى سويلەيتىنى قۋانتادى. انا ءتىلىمىز مەملەكەتتىك ءتىل رەتىندە سۇرانىسقا يە، ۇلتتىق مادەنيەتىمىزدى، بولمىسىمىزدى شىرايلى دا شۇرايلى تۋعان ءتىلىمىز ارقىلى كورسەتەمىز. قازاق تىلىندە ءبىر اۋىز ءسوز ايتا الماۋ بىلىمسىزدىكتىڭ بەلگىسىنە اينالدى، — دەدى پرەزيدەنت.
مەملەكەت باسشىسىنىڭ پايىمىنىشا، مۇنىڭ ءبارى — تولەرانتتىق پەن سەنىمگە نەگىزدەلگەن ورتاق جۇمىستىڭ ناتيجەسى.
— الايدا بۇل باسقا تىلدەردەن باس تارتۋ كەرەك دەگەندى بىلدىرمەيدى، ءارى ولاردى شەتتەتۋگە قۇقىق بەرمەيدى. وزدەرىڭىزگە ءمالىم، كونستيتۋتسيادا تىلىنە، تەگىنە، ۇلتىنا، دىني كوزقاراسى مەن نانىمىنا نەمەسە كەز كەلگەن وزگە دە سەبەپتەرگە بايلانىستى كەمسىتۋگە تىيىم سالىنعان. سوعان قاراماستان ارا-تۇرا كەيبىر ءتىسقاققان ارانداتۋشىلار الەۋمەتتىك جەلىدە ۇلتارازدىقتى قوزدىرىپ، ادەيى وتقا ماي قۇيادى. مىنا نارسەنى تۇسىنگەن ءجون. ولاردىڭ كوزدەگەنى بىرەۋ — قوعامدى السىرەتىپ، قازاقستاننىڭ ەگەمەندىگىنە نۇقسان كەلتىرۋ، ەلدى بىرلىكتەن ايىرىپ، بەيبىت، الاڭسىز ءومىرىمىزدىڭ استاڭ-كەستەڭىن شىعارۋ. راسىندا ولار بالالارىمىز بەن نەمەرەلەرىمىزدىڭ باقىتتى بولاشاعىنىڭ تامىرىنا بالتا شاپقىسى كەلەدى. سوندىقتان قۇقىق قورعاۋ ورگاندارى مەن تۇتاس قوعام بۇعان تاباندى تۇردە قارسى تۇرۋى كەرەك. كونستيتۋتسيادا بەكىتىلگەن «زاڭ مەن ءتارتىپ» قاعيداتىنا ساي ارەكەت ەتۋىمىز قاجەت، — دەدى قاسىم-جومارت توقايەۆ.
ايتا كەتەيىك، جيىن بارىسىندا پرەزيدەنت كونستيتۋتسيا ءار ادامنىڭ قولىندا جۇرەتىن، جۇمىس ۇستەلىندە تۇراتىن قۇجات بولۋعا ءتيىس ەكەنىن ايتتى.
ەتنومادەني بىرلەستىكتەردىڭ 42 وكىلى قازاقستان حالىق كەڭەسىنىڭ قۇرامىنا كىردى. بۇل كەڭەس مۇشەلەرىنىڭ ۇشتەن ءبىرىن قۇرايدى. مەملەكەت باسشىسى قاسىم-جومارت توقايەۆ مۇنى ەتنومادەني بىرلەستىكتەردىڭ ەلدىڭ ورنىقتى دامۋىنا قوساتىن ۇلەسىنىڭ ماڭىزدى كورسەتكىشى رەتىندە اتادى.
بۇرىن پارلامەنت كۆوتاسىنا ساي، سەناتقا قازاقستان حالقى اسسامبلەياسىنىڭ 5 مۇشەسى عانا وتەتىن. ال ەندى حالىق كەڭەسىنىڭ قۇرامىنا ەتنومادەني بىرلەستىكتەردىڭ 42 وكىلى كىردى.
— ياعني ولار كەڭەس مۇشەلەرىنىڭ ۇشتەن ءبىرىن قۇرايدى. ەلىمىزدىڭ ورنىقتى ءارى تابىستى دامۋى تۇرعىسىنان ق ح ا ميسسياسىنىڭ ماڭىزدى ەكەنىنە وسى ايقىن دالەل بولادى. قازىرگى مىندەتىمىز — ءونىمدى جۇمىس ىستەۋ. ەڭ الدىمەن، ەتنوس ارالىق جانە كونفەسسياارالىق كەلىسىمدى نىعايتۋ تاسىلدەرىن جوعالتپاي، ونى ودان ءارى جالعاستىرىپ اكەتكەن ءجون، — دەدى قاسىم-جومارت توقايەۆ قازاقستان حالىق كەڭەسىنىڭ ءبىرىنشى سەسسياسىندا.
پرەزيدەنتتىڭ ايتۋىنشا، حالىق كەڭەسى بىرلىك پەن كەلىسىمنىڭ جاڭا تۇجىرىمى ازىرلەنەتىن ورتالىق بولا الادى.
باسقاشا ايتقاندا، حالىق كەڭەسى ەتنومادەني بىرلەستىكتەر مەن وسى سالادا قىزمەت ەتەتىن باسقا دا قوعامدىق ۇيىمداردى ءبىر ماقساتقا بىرىكتىرۋى كەرەك.
— وڭىرلىك دەڭگەيدە دوستىق ۇيلەرىنىڭ جانىنان اشىلعان «قوعامدىق كەلىسىم» جەلىسى جۇمىسىن جالعاستىرادى. ەتنومادەني بىرلەستىكتەردىڭ وكىلدەرى جەرگىلىكتى قوعامدىق كەڭەستەردىڭ قۇرامىنا كىرىپ، قازاقستان حالىق كەڭەسىندەگى تۇراقتى كوميتەتتەردىڭ، سالالىق كوميسسيالاردىڭ جانە كونسۋلتاتيۆتىك- كەڭەس ورگاندارىنىڭ جۇمىسىنا قاتىسا الادى. الايدا جاڭا مۇمكىندىكتەر ايرىقشا جاۋاپكەرشىلىك جۇكتەيتىنىن دە ەسكەرگەن ءجون. دۇرىس شەشىمدى تالاپ ەتەتىن تۇيتكىلدەر شاش ەتەكتەن، — دەدى مەملەكەت باسشىسى.