قازاق قىزى مادريدتىڭ «رەال» كلۋبىنا قىزمەتكە ورنالاستى

استانا. KAZINFORM - قازاقستاندىق البينا بۋنەسكۋ مادريدتىڭ «رەال» كلۋبىنداعى قىزمەتىن باستادى.

بۇل تۋرالى پاۆلوداردان تۇلەپ ۇشقان البينا بۋنەسكۋ Instagram الەۋمەتتىك جەلىسىندەگى پاراقشاسىندا ءمالىم ەتتى.

قازاقستاندىق مامان اتاقتى كلۋبپەن كەلىسىم-شارتقا قول قويىپ، ماركەتولوگ رەتىندە قىزمەتكە ورنالاسقان.

- مادريد ۋنيۆەرسيتەتىندە سپورتتىق ماركەتينگ بويىنشا ماگيستراتۋرادا ءبىلىم الدىم. تەك ۇزدىك ءتورت ستۋدەنتكە وسىنداي مۇمكىندىك بەرىلدى. وسىلايشا، Real Madrid Marketing Team قۇرامىندا قىزمەت ىستەۋ بۇيىردى. الدا جۇمىس كوپ، حالىقارالىق جوبالار بار، مەن وعان دايىنمىن، - دەدى البينا بۋنەسكۋ.

ەسكە سالا كەتەيىك، بۇدان بۇرىن «رەالدى» ءىرى ەسەپپەن ۇتقان بارسەلونانىڭ يسپانيا سۋپەركۋبوگىن جەڭىپ العانىن جازعان ەدىك.