تاجىكستان پرەزيدەنتى قۇشاق جايا قارسى الىپ، قوناقجايلىق تانىتقانى، سونداي-اق جوعارى مەملەكەتتىك ناگرادا — Qoja Ahmet Yasaui وردەنىنە لايىق كورگەنى ءۇشىن قازاقستان پرەزيدەنتىنە العىس ايتتى.
— تاجىك-قازاق قارىم-قاتىناسىن وركەندەتۋگە قوسقان ازداعان ۇلەسىمە بەرىلگەن وسى جوعارى باعا مەنىڭ عانا ەمەس، حالقىمنىڭ ەڭبەگىنە كورسەتىلگەن سىي-قۇرمەت دەپ سانايمىن. باۋىرلاس قازاقستانعا ءار ساپارىم جارقىن ساتتەرىمەن ەستە قالادى. دوستاس قازاق ەلىنىڭ الەۋمەتتىك-ەكونوميكالىق دامۋىنداعى ەلەۋلى تابىستارى جانە حالىقارالىق ارەنادا ابىروي- بەدەلىنىڭ اسقاقتاۋى قۋانتادى. ءبىز وركەندەۋ مەن گۇلدەنۋ جولىنداعى قازاقستاننىڭ ۇيلەسىمدى دامۋىنا نەگىز قالايتىن كەيىنگى جىلدارداعى رەفورمالاردى جوعارى باعالايمىز. بۇگىنگى كەلىسسوز كونسترۋكتيۆتى ساياسي ديالوگ، ءوزارا سەنىم مەن تۇسىنىستىك سيپاتىندا ءوربىدى. ەكىجاقتى كۇن تارتىبىندەگى كوپتەگەن ماسەلەنى ەگجەي-تەگجەيلى تالقىلادىق. كەلىسسوز قورىتىندىسى بويىنشا قابىلدانعان بىرلەسكەن مالىمدەمە ىنتىماقتاستىعىمىزدى ودان ءارى دامىتۋدىڭ باستى باعىتتارىن ايقىندادى، — دەدى ەمومالي راحمون.
قازاقستان ب ۇ ۇ قاۋىپسىزدىك كەڭەسىنىڭ 2028-2029 -جىلدارداعى تۇراقتى ەمەس مۇشەسىنە ۇمىتكەر رەتىندە تاجىكستاننىڭ كانديداتۋراسىن قولدايدى. بۇل تۋرالى پرەزيدەنت قاسىم-جومارت توقايەۆ اقوردادا ب ا ق وكىلدەرىنە ارنالعان بريفينگتە ايتتى.
پرەزيدەنت ەكى ەل اراسىنداعى مادەني-گۋمانيتارلىق بايلانىستاردى نىعايتۋ شارالارىنا ارنايى توقتالدى.
— تۇراقتى تۇردە وتكىزىلىپ تۇراتىن مادەنيەت كۇندەرى، شىعارماشىل زيالى قاۋىم وكىلدەرى اراسىنداعى بەلسەندى ديالوگ، كورنەكتى تۇلعالارعا ەسكەرتكىش اشۋ — مۇنىڭ ءبارى ازاماتتارىمىزدىڭ قىزىعۋشىلىعىن تۋدىراتىن دۇنيەلەر. سونداي-اق ءبىز ءبىلىم سالاسىنداعى ىنتىماقتاستىقتى تەرەڭدەتۋگە مۇددەلىمىز. قازاقستان ايماق ەلدەرى ىشىندە تاجىكستان ستۋدەنتتەرىنە ەڭ كوپ ءبىلىم گرانتىن بەرەدى. جىل سايىن 100 ورىن بولىنەدى. تاجىك اسكەريلەرىن قازاقستاننىڭ وقۋ ورىندارىندا وقىتۋدى جالعاستىرۋعا دايىنبىز. بۇل جۇمىستى جۇيەلى ءارى ۇزاقمەرزىمدى نەگىزدە جۇرگىزۋ ءۇشىن اسكەري كادرلاردى دايارلاۋ سالاسىنداعى ۇكىمەتارالىق كەلىسىمگە قول قويىلدى، — دەدى مەملەكەت باسشىسى.
قاسىم-جومارت توقايەۆ ءسوزىن قورىتىندىلاي كەلە، ەكى ەلدىڭ وڭىرلىك جانە جاھاندىق كۇن تارتىبىندەگى وزەكتى ماسەلەلەر بويىنشا ۇستانىمى ءبىر ەكەنىن ايتتى. قازاقستان مەن تاجىكستان كوپجاقتى الاڭداردا ورتاق مۇددەنى بىرلەسە ىلگەرىلەتۋگە ءازىر.
— كەلىسسوز بارىسىندا ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋ ماسەلەسىنە ەرەكشە دەن قويدىق. ءوڭىردىڭ ورنىقتى دامۋى — باۋىرلاس حالىقتاردىڭ تۇپكىلىكتى مۇددەسىنە ساي كەلەتىن ورتاق ماقسات. قازاقستان ب ۇ ۇ قاۋىپسىزدىك كەڭەسىنىڭ 2028-2029 -جىلدارداعى تۇراقتى ەمەس مۇشەسىنە ۇمىتكەر رەتىندە تاجىكستاننىڭ ۇسىنىلۋىن قۋانا قابىل الدى. ءبىز تاجىكستاننىڭ كانديداتۋراسىن قولدايمىز، — دەدى قاسىم-جومارت توقايەۆ.
ايتا كەتەيىك، اقوردادا قازاقستان مەن تاجىكستاننىڭ رەسمي دەلەگاتسيالارى ۇكىمەتارالىق جانە ۆەدومستۆوارالىق دەڭگەيدە 14 قۇجاتقا قول قويدى.
5-7 -قاراشا كۇندەرى مەملەكەت باسشىسىنىڭ شاقىرۋىمەن ەلىمىزگە تاجىكستان پرەزيدەنتى ەمومالي راحموننىڭ رەسمي ساپارى ءوتىپ جاتىر.
سونداي-اق قازاقستان تاجىكستاننىڭ ەڭ ءىرى ساۋدا سەرىكتەستەرىنىڭ ۇشتىگىنە ەندى.