پرەزيدەنت ەگەمەندىگىمىزدى قورعاۋعا قاتىستى ماسەلەنىڭ ءبارى تولىعىمەن شەشىمىن تاپپاعانىن باسا ايتتى.
— الدىمىزدا اۋقىمدى جانە كەزەك كۇتتىرمەيتىن، ماڭىزدى ءارى كۇردەلى مىندەتتەر تۇر. حالىقارالىق احۋالدى كورىپ-ءبىلىپ وتىرسىزدار. الەمدە ساياسي، ەكونوميكالىق، يدەولوگيالىق شيەلەنىستەر ۋشىعىپ تۇر. وسىنداي الماعايىپ كەزەڭدە الەمنىڭ بولاشاعىن بولجاۋ وتە قيىن ەكەنى تۇسىنىكتى. مۇنداي زامانعا ءبىزدىڭ ءبىر عانا جاۋابىمىز بار. بۇل - بىرلىگىمىزدى بەكەمدەپ، ورتاق مۇددەگە كۇش جۇمىلدىرىپ، ۇلتتىق جاۋاپكەرشىلىگىمىزدى تەرەڭ سەزىنە وتىرىپ، قاسيەتتى وتانىمىز - قازاقستان رەسپۋبليكاسىنا ادال قىزمەت ەتۋ، — دەدى پرەزيدەنت.
تۇپتەپ كەلگەندە، پرەزيدەنت پىكىرىنشە، ەگەمەندىكتى نىعايتۋ — حالىقتىڭ ءال-اۋقاتىن ارتتىرۋ، جاڭا تەحنولوگيالاردى جەتىك مەڭگەرۋ، زاڭدى قۇرمەتتەۋ، تارتىپكە باعىنۋ، ءوزارا جاناشىر، ەڭبەكقور، جاسامپاز بولۋ، تابيعاتتى ايالاۋ دەگەن ءسوز.
— ءبىز وسى مىندەتتەردى تابىستى ورىنداساق، جاھان وركەنيەتىنىڭ تورىنەن لايىقتى ورىن الامىز. سوندىقتان كونستيتۋتسيادا قازىرگى زامان تالابىنا ساي ءبىلىم مەن عىلىمدى، يننوۆاتسيانى، ادام كاپيتالىن دامىتۋ مەملەكەتتىڭ ستراتەگيالىق مىندەتى رەتىندە بەكىتىلدى. ۇلتىمىزدىڭ باس قۇجاتىندا، ياعني كونستيتۋتسيامىزدا ەلىمىزدىڭ تامىرى تەرەڭ تاريحى مەن ءبىتىم-بولمىسى، بولاشاقتاعى بەينەسى ايقىندالدى. اتاپ ايتقاندا، مەملەكەتتىك ءتىل - قازاق ءتىلىنىڭ كونستيتۋتسيالىق مارتەبەسى تايعا تاڭبا باسقانداي جازىلدى، - دەدى مەملەكەت باسشىسى.
قازاق ءتىلى زامان تالابىنا ساي دامىپ كەلە جاتىر.
- قازاق ەلى باردا قازاق ءتىلى تۇعىردان تۇسپەيدى. وتكەن زامانداردا ساياسي قىسىم بولعان كەزدە انا ءتىلىمىز ادەبيەتشىلەر مەن ءتىل ماماندارىنىڭ، جۋرناليستەرىمىزدىڭ، زيالى قاۋىم مەن قاراپايىم ازاماتتاردىڭ ارقاسىندا امان قالدى دا، ءوزىنىڭ دامۋىن توقتاتقان جوق. بۇل - ءتىپتى، قازاق ءتىلىنىڭ ومىرشەڭدىگى بىرەگەي دەگەن ءسوز. ال قازىر ءتىلىمىزدىڭ كەلەشەگىنە ەشقانداي قاۋىپ ءتونىپ تۇرعان جوق دەپ انىق ايتۋعا بولادى، - دەدى مەملەكەت باسشىسى.
بۇگىندە قازاق ءتىلى وزىق تەحنولوگيالار سالاسىنا كەڭ اۋقىمدا ەنىپ، زامان تالابىنا ساي دامىپ كەلە جاتىر.
ەلىمىزدە سان الۋان سيفرلىق پلاتفورمالار تابىستى جۇمىس ىستەپ تۇر. ونىڭ ءبارى قازاق تىلىندە قىزمەت كورسەتەتىن بولدى.
- انا ءتىلىمىزدىڭ الەۋەتىن الەمنىڭ وزىق تەحنولوگيالىق كومپانيالارى دا مويىنداي باستادى. ماسەلەن، Open.AI كومپانياسى جۇرگىزگەن زەرتتەۋگە سايكەس قازاق ءتىلى سوڭعى ءۇش جىلدا جاساندى ينتەللەكت جۇيەسىندەگى قولدانىس اياسى قارقىندى كەڭەيىپ جاتقان تىلدەردىڭ قاتارىنا كىرگەن. ال Yandeх كومپانياسى ءوزىنىڭ ءبىر بەلگىلى ءونىمىن بىلتىردان بەرى قازاق تىلىندە قولداناتىن ادامداردىڭ سانى 30 پايىزعا ارتقانىن مالىمدەپ وتىر، - دەدى ق. توقايەۆ.
سونداي-اق وتكەن جىلى Google كومپانياسى قازاق ءتىلىن Gemini تىلدىك مودەلىنە ەنگىزدى. مۇنىڭ ءبارى - قازاق ءتىلىن عىلىم ءتىلى رەتىندە دامىتۋ ءۇشىن جۇرگىزىلگەن جۇيەلى جۇمىستىڭ ءبىر ناتيجەسى.
- «التىن شىققان جەردى بەلدەن قاز» دەگەن. سوندىقتان ءبىز وسى باعىتتا باستالعان وتە قاجەتتى ءارى ماڭىزدى جۇمىستى توقتاتپاي، جالعاستىرا بەرۋىمىز كەرەك، - دەدى پرەزيدەنت.
ايتا كەتەيىك، مەملەكەت باسشىسى قاسىم-جومارت توقايەۆ حالىقارالىق «قازاق ءتىلى» قوعامىنىڭ 10-قۇرىلتايىندا ءسوز سويلەپ جاتىر.
پرەزيدەنت قازاق ءتىلىنىڭ ابىروي-بەدەلىن ارتتىرۋ ءۇشىن تاباندى جۇمىس ىستەۋ كەرەكتىگىن ايتۋدا.
جاڭا كونستيتۋتسيادا «تاۋەلسىزدىك» جانە «ەگەمەندىك» سوزدەرىن باس ارىپپەن جازىلاتىن بولدى.