قايتارىلعان اكتيۆتەر: قوسشى مەن ماكينسك قالالارىن سۋمەن قامتۋعا قارجى بولىنەدى

استانا. KAZINFORM - مەملەكەت باسشىسىنىڭ تاپسىرماسىنا سايكەس، ۇكىمەت زاڭسىز يەمدەنىلگەن اكتيۆتەردى قايتارۋ ەسەبىنەن الەۋمەتتىك ماڭىزى بار ينفراقۇرىلىم نىساندارىن سالۋ جوبالارىن جۇزەگە اسىرۋدا. بۇل تۋرالى ۇكىمەتتەن حابارلادى.

اقمولا وبلىسىنداعى قوسشى جانە ماكينسك قالالارىنىڭ تۇرعىندارىن سۋمەن قامتاماسىز ەتۋ ءۇشىن ارناۋلى مەملەكەتتىك قوردان قاراجات ءبولۋ تۋرالى شەشىم قابىلداندى.

قوسشى قالاسىندا سۋ قۇبىرى جۇيەسىنىڭ قۇرىلىسىن اياقتاۋعا 476,7 ميلليون تەڭگە ءبولىندى. جوبانى ىسكە اسىرۋ ناتيجەسىندە حالىق 0 ورتالىقتاندىرىلعان سۋمەن قامتىلادى. قازىرگى تاڭدا شامامەن 50 شاقىرىم قۇبىر تارتىلعان. جالپى، جەلىلەردىڭ ۇزىندىعى 64,1 شاقىرىم بولادى دەپ جوسپارلانىپ وتىر. نىساندى جىل سوڭىنا دەيىن تاپسىرۋ كوزدەلگەن. قولدانىستاعى ينجەنەرلىك جەلى 30 مىڭ تۇرعىنعا ەسەپتەلگەن. ال رەسمي دەرەكتەرگە سايكەس، بۇگىندە قوسشىدا 50 مىڭنان استام ادام تىركەلگەن. قالانىڭ باس جوسپارىنا سايكەس، 2038 -جىلعا قاراي تۇرعىندار سانى 150 مىڭنان اسادى دەپ بولجانۋدا.

ماكينسك قالاسىندا سۋ قۇبىرى جەلىلەرىن قايتا جاڭارتۋ جۇمىستارى جۇرگىزىلۋدە. جوبا بويىنشا 72,7 شاقىرىم جەلى تارتۋ قاراستىرىلعان. بۇعان دەيىن بولىنگەن قاراجات ەسەبىنەن بۇگىندە 45 شاقىرىم بويىنشا جۇمىس اياقتالعان. ارناۋلى مەملەكەتتىك قوردان بولىنگەن 606,4 ميلليون تەڭگە جوبانى تولىق اياقتاپ، حالقى 18 مىڭنان اساتىن قالانى ورتالىقتاندىرىلعان سۋمەن قامتاماسىز ەتۋگە مۇمكىندىك بەرەدى.

زاڭسىز شىعارىلعان اكتيۆتەردى قايتارۋدان تۇسكەن قاراجاتتى الەۋمەتتىك ماسەلەلەردى شەشۋگە باعىتتاۋ تۋرالى مەملەكەت باسشىسىنىڭ تاپسىرماسىن ورىنداۋ الەۋمەتتىك ينفراقۇرىلىمدى جاڭعىرتۋدىڭ ءتيىمدى تەتىگىنە اينالدى. بۇگىنگى تاڭدا ارناۋلى مەملەكەتتىك قوردان ءبىلىم بەرۋ، دەنساۋلىق ساقتاۋ، سپورت، الەۋمەتتىك قامسىزداندىرۋ، ينجەنەرلىك جەلىلەر مەن سۋ قۇرىلىستارىن جاڭارتۋ سياقتى سالالارداعى 280 گە جۋىق جوبانى ىسكە اسىرۋعا قاراجات ءبولىندى.

بۇعان دەيىن قايتارىلعان اكتيۆتەر ەسەبىنەن اقتوبە وبلىسىندا مەديتسينالىق مەكەمەلەردىڭ قۇرىلىسىنا 1,4 ميلليارد تەڭگە بولىنگەن.