«قاتتى قورقىپ كەتتىك»: الماتى تۇرعىندارى جەر سىلكىنىسى تۋرالى ايتتى

الماتى. KAZINFORM - جەر سىلكىنىسىنەن كەيىن كوشەگە جۇگىرىپ شىققان الماتى تۇرعىندارى قاتتى قورقىپ كەتكەندەرىن ايتتى.

«مەن 4-قاباتتا تۇرامىن. جەر استى دۇمپۋلەرى باستالعاندا، مەن ءۇش بالامەن ۇيدە بولدىم. ءبىز بىردەن ۇستەلدىڭ استىنا تىعىلدىق. جەر قاتتى سىلكىندى، قورقىپ كەتتىك. وسىدان كەيىن بىردەن كيىنىپ، سىرتقا شىقتىق. ءبىراق، ءبىراز جينالدىق، ويتكەنى دايىن ەمەس ەدىك. كۇيەۋىم ۇيدە بولماعاندىقتان قيىن بولدى. بۇگىن بارىنە دايىن بولۋ كەرەكتىگىن ءتۇسىندىم. قازىر ەۆاكۋاتسيا پۋنكتىنە كەلدىك، نە ىستەيتىنىمىزدى شەشكەنشە وسىندا بولامىز»، - دەيدى اقمارال ەسىمدى قالا تۇرعىنى.

16-قاباتتا تۇراتىن تاعى ءبىر الماتىلىق جەر سىلكىنىسى توقتاعانان كەيىن بالالارىمەن بىردەن پاتەردەن شىعىپ كەتكەنىن ايتتى.

N 174 مەكتەپتە ورنالاسقان ەۆاكۋاتسيا پۋنكتىندە بالالار مەن وقۋشىلاردى كەزدەستىرۋگە بولادى.

«ءبىز ونى العاشىندا تۇسىنبەي قالدىق. كوبى جەر سىلكىنىسىن كەيىن ءتۇسىندى. ءبارى قورقىپ كەتتى. ءۇزىلىس ۋاقىتى بولاتىن. بارلىعىمىز دەرەۋ دالاعا شىقتىق»، - دەيدى ايزەرە ەسىمدى وقۋشى.

جەكەمەنشىك مەكتەپتەردىڭ ءبىرىنىڭ ءمۇعالىمى قاتتى جەر سىلكىنىسىن سەزبەگەنىن، ءبىراق الگوريتم بويىنشا بارلىعى عيماراتتان شىعىپ كەتكەنىن جەتكىزدى.

«كوشەگە شىقساق، ادامدار مەن كولىكتەر قاپتاپ كەتىپتى. سوسىن 5 بالدىق جەر سىلكىنىسى بولعانىن جانە تاعى قايتالاناتىنى تۋرالى ەستىدىك. بويىمىزدا ءالى دە قورقىنىش بار. ەشكىم جەر سىلكىنىسىنە دايىن ەمەس، ءبارى ويلاماعان جەردەن بولادى»، - دەدى ول.

تاعى ءبىر الماتىلىق بالاسىمەن ۇيدە وتىرعانىن ايتتى.

«ءبىز 4-قاباتتا تۇرامىز. بۇل جولعى جەر سىلكىنىسى قاڭتارداعىمەن سالىستىرعاندا قاتتى سەزىلدى. بىردەن دالاعا شىقتىق. ءبىز اسىرەسە بالالار ءۇشىن قاتتى الاڭدايمىز»، - دەيدى ول.

ول جەر سىلكىنىسى بولعان ساتتە كىشكەنتاي ۇلىنىڭ اياق- قولى دىرىلدەگەنىن جەتكىزدى.