اقوردادا وتكەن كەلىسسوزدە قاسىم-جومارت توقايەۆ ەمومالي راحموننىڭ ەسىمى قازىرگى تاجىكستان تاريحىندا ەرەكشە ورىن الاتىنىنا توقتالدى.
— سىزگە كۇردەلى، ءتىپتى تاعدىرشەشتى دەۋگە بولاتىن كەزەڭدە ەلگە جەتەكشىلىك جاساۋ جانە تاجىكستاندى بەيبىتشىلىك، بىرلىك پەن جاسامپاز دامۋ جولىنا باستاۋ سىندى زور تاريحي جاۋاپكەرشىلىك جۇكتەلدى. تەگەۋرىندى ءارى پاراساتتى باسشىلىعىڭىزبەن تاجىكستان ءوزىنىڭ مەملەكەتتىلىگى مەن قوعامدىق كەلىسىمدى نىعايتىپ، قارقىندى وركەندەۋ جولىنا بەت الدى. سوندىقتان تاجىك حالقى ءسىزدىڭ وتان الدىنداعى تاريحي ەڭبەگىڭىزدى باعالاپ، ۇلت كوشباسشىسى دەپ اتايدى. قازاقستان جۇرتشىلىعى دا ءسىزدى ءوز حالقىنا جانە كۇللى ورتالىق ازيا ەلدەرىنە ولشەۋسىز ەڭبەك سىڭىرگەن مەملەكەت قايراتكەرى سانايدى. ءسىز رۋحاني نەگىزدەرىمىزدى نىعايتۋعا، تاريحي جادىنى جانە ۇلتتىق مادەني مۇرانى ساقتاۋعا ۇدايى كوڭىل ءبولىپ كەلەسىز. تاجىك حالقىنىڭ تاريحى مەن مادەنيەتىن، كورنەكتى ويشىلدار مەن شايىرلاردىڭ شىعارمالارىن ناسيحاتتاۋ جونىندەگى باستامالارىڭىز زور قۇرمەتكە لايىق، — دەدى مەملەكەت باسشىسى.
قاسىم-جومارت توقايەۆ پرەزيدەنت ەمومالي راحموننىڭ قازاقستان مەن تاجىكستان اراسىنداعى سان قىرلى بايلانىستاردى تەرەڭدەتۋدە ايرىقشا ءرول اتقارعانىنا نازار اۋداردى.
— ورتالىق ازيانىڭ تۇراقتىلىعى مەن قاۋىپسىزدىگىن نىعايتۋعا قوسقان ۇلەسىڭىز — ولشەۋسىز. بارشاعا ءمالىم بەدەلىڭىز، باي مەملەكەتتىك تاجىريبەڭىز جانە بەيبىتشىلىك پەن ىنتىماقتاستىق يدەياسىنا دەگەن بەرىك ۇستانىمىڭىز ءبىزدىڭ ايماقتاعى ءوزارا تۇسىنىستىك پەن سەنىمدى بەكىتۋگە سەپتىگىن تيگىزدى. رۋحاني-مادەني قۇندىلىقتاردى ساقتاۋعا، بەيبىتشىلىك پەن تۇراقتىلىقتى نىعايتۋعا، سونداي-اق قازاقستان مەن تاجىكستان اراسىنداعى دوستىق جانە وداقتاستىق قاتىناستاردى دامىتۋعا قوسقان ەلەۋلى ۇلەسىڭىزدى ەسكەرە وتىرىپ، ءسىزدى، قۇرمەتتى ەمومالي شاريپوۆيچ، Qoja Ahmet Yasaui وردەنىمەن ماراپاتتاۋ جونىندە شەشىم قابىلدادىم. بۇل جوعارى ناگرادا - قازاقستان حالقىنىڭ سىزگە جانە باۋىرلاس تاجىك ەلىنە كورسەتكەن شىنايى قۇرمەتىنىڭ بەلگىسى. وسى ءراسىم ەلدەرىمىزدىڭ مىزعىماس دوستىعىنىڭ تاعى ءبىر جارقىن نىشانىنا اينالادى دەپ سەنەمىن. قۇرمەتتى ەمومالي شاريپوۆيچ، سىزگە سارقىلماس كۇش-قۋات، جاۋاپتى قىزمەتىڭىزگە تولايىم تابىس تىلەيمىن، باۋىرلاس تاجىك حالقى ءسىزدىڭ باسشىلىعىڭىزبەن بەيبىت ءومىر ءسۇرىپ، وركەندەي بەرسىن، — دەدى قازاقستان پرەزيدەنتى.
توقايەۆ بۇگىنگى سالتاناتتى ءراسىمنىڭ ءمانى تەرەڭ ءارى سيمۆوليكالىق تۇرعىدان ەرەكشە ەكەنىن اتاپ ءوتتى. پرەزيدەنتتىڭ ايتۋىنشا، قازاق پەن تاجىك حالىقتارىن عاسىرلاردان تامىر تارتاتىن دوستىق، رۋحاني ۇندەستىك جانە ورتاق تاريحي تاعدىر بايلانىستىرادى.
— ءبىزدىڭ ءوڭىرىمىز الەمگە كورنەكتى ويشىلدار، عالىمدار، شايىرلار مەن اعارتۋشىلاردىڭ تۇتاس شوعىرىن سىيلادى. ولاردىڭ مۇراسى جەكەلەگەن ەلدەر مەن حالىقتاردىڭ اۋقىمىنان اسىپ، كەڭ تارالدى. يسلام قايتا ورلەۋ ءداۋىرىنىڭ ەڭ كورنەكتى تۇلعالارىنىڭ ءبىرى — قوجا احمەت ياساۋي. قازاق حالقى ۇلى عۇلاما ءارى اعارتۋشى ەسىمىن ەرتەدەن ەرەكشە قاستەر تۇتادى، كيەلى سانايدى. سونىمەن قاتار قوجا احمەت ياساۋي مۇراسى — بۇكىل وركەنيەتكە جانە ارينە، عاسىرلار بويى ورتاق رۋحاني داستۇرلەرى قالىپتاسقان ورتالىق ازيا حالىقتارىنا تيەسىلى قازىنا، — دەدى قازاقستان پرەزيدەنتى.
مەملەكەت باسشىسى ۇلى ويشىلدىڭ ءىلىمى ادامگەرشىلىك، ادىلەت، مەيىرىم جانە گۋمانيزم يدەيالارىنا تۇنىپ تۇرعانىن اتاپ ءوتتى.
— بۇل ءىلىم شىن مانىندە دۇنيەتانىمىمىزدى، بولمىسىمىزدى، ءومىر سالتىمىزدى قالىپتاستىردى، جۇزدەگەن جىلدار بويى ادامداردى بىرىكتىرىپ، ولاردىڭ جاقسىلىق پەن جاسامپازدىققا دەگەن سەنىمىن ارتتىردى. ياساۋي تانىمى زامانىنان وزىق ەدى. سوندىقتان بۇگىنگە دەيىن عيبراتتى عۇمىر جولىن نۇسقايتىن وزىندىك ءبىر رۋحاني- ادامگەرشىلىك باعدار قىزمەتىن اتقارىپ كەلەدى. وزىڭىزگە ءمالىم، قۇرمەتتى ەمومالي شاريپوۆيچ، قولعا العان رەفورمالاردىڭ ناتيجەسىندە قوعامىمىز جان- جاقتى جاڭعىرۋدا. جاڭا قوعامدىق ەتيكا قالىپتاستىرۋ وسى سان الۋان جۇمىستىڭ ىشىندە ەرەكشە ورىن الادى. قوجا احمەت ياساۋي دارىپتەگەن بيىك ادامگەرشىلىك مۇراتتار، سونداي-اق ادىلەت، ەڭبەكقورلىق، تازالىق، پاتريوتيزم قاعيداتتارى ەلىمىزدە قوعامدىق سانانىڭ اجىراماس بولىگىنە اينالدى. ياساۋي مۇراسىنا ايرىقشا ءمان بەرە وتىرىپ، بيىل ۇلى ويشىل، عۇلاما، اعارتۋشى تۇلعانىڭ قۇرمەتىنە جاڭا مەملەكەتتىك ماراپات بەلگىلەۋدى ۇسىندىم، — دەدى پرەزيدەنت.
ءوز كەزەگىندە تاجىكستان پرەزيدەنتى قازاقستان رەسپۋبليكاسىنىڭ جوعارى مەملەكەتتىك ناگراداسىن تاپسىرعانى ءۇشىن قاسىم-جومارت توقايەۆقا العىس ايتتى.
— بۇل ماراپاتتى مەملەكەتتەرىمىز اراسىنداعى جوعارى دەڭگەيدەگى ءوزارا قۇرمەت پەن سەنىمنىڭ تاعى ءبىر دالەلى سانايمىن. ەڭ الدىمەن، باۋىرلاس قازاقستانمەن دوستىق پەن ىنتىماقتاستىقتى دايەكتى تۇردە نىعايتىپ كەلە جاتقان تاجىك حالقىنىڭ ەڭبەگىنە بەرىلگەن باعا دەپ بىلەمىن. بۇگىندە ەلدەرىمىزدىڭ قارىم-قاتىناسى مەملەكەتارالىق بايلانىستاردىڭ بارلىق نەگىزگى باعىتى بويىنشا ورنىقتى دامىپ كەلە جاتقانى قۋانتادى. ءبىزدىڭ وداقتاستىعىمىز بەن ستراتەگيالىق سەرىكتەستىگىمىز قوس حالىقتىڭ يگىلىگى جولىندا الداعى ۋاقىتتا دا بەكي بەرەتىنىنە سەنىمدىمىن، — دەدى ەمومالي راحمون.
ايتا كەتەيىك، 5-7 -قاراشا كۇندەرى مەملەكەت باسشىسىنىڭ شاقىرۋىمەن ەلىمىزگە تاجىكستان پرەزيدەنتى ەمومالي راحموننىڭ رەسمي ساپارى ءوتىپ جاتىر.
بۇعان دەيىن قاسىم-جومارت توقايەۆ قازاقستان تاجىكستاننىڭ ەڭ ءىرى ساۋدا سەرىكتەستەرىنىڭ ۇشتىگىنە ەنگەنىن ءمالىم ەتتى.