تاۋەلسىزدىك سارايىنا كەلگەن مارتەبەلى مەيماندى قاسىم-جومارت توقايەۆ قارسى الدى. مەملەكەت باسشىلارى ءبىر-بىرىنە رەسمي دەلەگاتسيا مۇشەلەرىن تانىستىردى.
وسىدان كەيىن مارتەبەلى مەيماننىڭ ساپارىنا وراي ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى.
ءانۇرانداردى تىڭداپ بولعاننان كەيىن قاسىم-جومارت توقايەۆ پەن ومان سۇلتانى كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەملەكەت باسشىلارى قۇرمەتتى قاراۋىل ساپىنىڭ بويىمەن ءجۇردى. قۇرمەتتى قاراۋىل باستىعىمەن قوشتاستى.
تاۋەلسىزدىك سارايىندا باستالعان جوعارى دەڭگەيدە وتەتىن كەلىسسوزدەر بارىسىندا تاراپتار ساياسي ديالوگتى نىعايتۋ، سونداي-اق ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىقتى كەڭەيتۋ پەرسپەكتيۆاسىن تالقىلايدى دەپ جوسپارلانىپ وتىر.
بۇعان دەيىن مەملەكەت باسشىسى ومان سۇلتانىن ەلوردا اۋەجايىندا قارسى العانىن جازعان ەدىك. اۋەجاي زالىندا ەكى ەل باسشىلارى از-كەم اڭگىمەلەستى.
- ومان سۇلتاندىعى ەكونوميكاسىن ىلگەرىلەتۋدە زور تابىسقا جەتكەن، حالىقارالىق ارەنادا وتە بەلسەندى ءارى كونسترۋكتيۆتى دانەكەر مەملەكەت رەتىندە بەلگىلى. ەلىڭىزدىڭ ءوز ايماعىندا، ودان تىسقارى جەرلەردە، سونىڭ ىشىندە قازاقستاندا دا بەدەلى بيىك. مەملەكەتتەرىمىز اراسىنداعى سەرىكتەستىكتىڭ الەۋەتى زور ەكەنىنە سەنىمدىمىن. الدىمىزدا ىنتىماقتاستىق اياسىن مەيلىنشە كەڭەيتۋ مىندەتى تۇر،- دەگەن ەدى پرەزيدەنت.