پرەزيدەنتتىڭ ايتۋىنشا، ازاماتتارىمىز ەلىمىزدە جۇرگىزىلگەن رەفورمالاردىڭ تىكەلەي كۋاگەرى بولىپ، سول وزگەرىستەردىڭ ناقتى ناتيجەسىن كورىپ وتىر.
- سوڭعى 7 جىلدا جالپى ىشكى ءونىم 29 پايىزعا ارتىپ، 306 ميلليارد دوللارعا جەتتى. التىن-ۆاليۋتا رەزەرۆى جانە ۇلتتىق قور اكتيۆتەرىنىڭ كولەمى 138 ميلليارد دوللاردان استى. وسى كەزەڭدە ەلىمىزگە 162 ميلليارد دوللاردان استام ينۆەستيتسيا تارتىلدى، - دەدى قاسىم-جومارت توقايەۆ قازاقستان حالىق كەڭەسىنىڭ ءبىرىنشى سەسسياسىندا.
ەلىمىزدە شاعىن جانە ورتا بيزنەستىڭ ەكونوميكاداعى ۇلەسى 40 پايىزدان استى. قازاقستاندا جىل سايىن 20 ميلليون شارشى مەتردەن استام تۇرعىن ءۇي بوي كوتەرەدى.
2019 -جىلدان باستاپ، 1 ميلليوننان استام وقۋشىعا ارنالعان 1342 مەكتەپ سالىندى.
— ازاماتتاردىڭ ورتاشا ءومىر ءسۇرۋ ۇزاقتىعى 76 جاسقا جەتتى. سونداي-اق 1200-دەن استام دەنساۋلىق ساقتاۋ نىسانى اشىلدى. وسى ۋاقىت ىشىندە 35 مىڭ شاقىرىمنان استام اۆتوكولىك جولى سالىنىپ، جوندەلدى. مۇنىڭ ءبارىن تاريحىمىزداعى ەڭ جوعارى كورسەتكىش دەۋگە بولادى. بەلسەندى جۇمىستىڭ ناتيجەسىندە قازاقستان الەمنىڭ باسەكەگە قابىلەتتى 40 ەلىنىڭ قاتارىنا ەندى، — دەدى پرەزيدەنت.
بۇعان دەيىن پرەزيدەنت ءبىر جىلدا قازاقستاندا ەلدىڭ ساياسي جۇيەسى مەن مەملەكەتتىك باسقارۋىنا ەلەۋلى وزگەرىس اكەلگەن اۋقىمدى رەفورمالار جۇزەگە اسقانىن ايتقان ەدى.
«قازاقستان حالىق كەڭەسى» دەگەن اتاۋ جاڭا ينستيتۋتتىڭ جالپى ۇلتتىق سيپاتىن كورسەتەدى.
— مەن ەلدەگى تۇيتكىلدەردى اشىق تالقىلايتىن، جۇرتتىڭ ۇسىنىس-پىكىرلەرىن ساراپتاپ، ناقتى شەشىمدەر ۇسىناتىن ارنايى ينستيتۋت قۇرۋدى كوپتەن بەرى جوسپارلاپ ءجۇردىم. ونىڭ قۇرىلىمى، اتقاراتىن جۇمىسى جونىندە ۇزاق ويلاندىم. كەڭەستىڭ اتاۋىن كونستيتۋتسيالىق رەفورما جونىندەگى كوميسسياعا ءوزىم ۇسىندىم. «قازاقستان حالىق كەڭەسى» دەگەن اتاۋ جاڭا ينستيتۋتتىڭ جالپى ۇلتتىق سيپاتىن كورسەتەدى. كونستيتۋتسياعا سايكەس مەملەكەتتىك بيلىكتىڭ بىردەن-ءبىر باستاۋى جانە ەگەمەندىك يەسى بۇل — حالىق. سوندىقتان جۇرتشىلىقتىڭ مۇددەسىن قورعايتىن بىرەگەي ورگاننىڭ اتاۋىندا «حالىق» ءسوزىنىڭ تۇرۋى — وتە قيسىندى، ورىندى، سەبەبى، بۇل — زاڭدىلىق. بۇعان قوسا، «قازاقستان حالىق كەڭەسى» اتاۋى — كونستيتۋتسيادا بەكىتىلگەن ءبىرىڭعاي ءارى رەسمي نۇسقا، — دەدى پرەزيدەنت.
مەملەكەت باسشىسىنىڭ پايىمىنشا، بۇل جاڭا ورگاننىڭ مارتەبەسى بيىك، جاۋاپكەرشىلىگى جوعارى ەكەنىن ايشىقتايدى.
— بۇعان دەيىن ەلدىك ىستەرگە قاتىستى ماڭىزدى مىندەتتەردى قازاقستان حالقى اسسامبلەياسى، پرەزيدەنت جانىنداعى ۇلتتىق قوعامدىق سەنىم كەڭەسى، ۇلتتىق قۇرىلتاي جانە باسقا دا كونسۋلتاتيۆتىك-كەڭەسشى ورگاندار اتقارىپ كەلدى. بۇل ينستيتۋتتار وزدەرىنە جۇكتەلگەن تاريحي ميسسيانى تولىعىمەن ورىندادى، — دەدى قاسىم-جومارت توقايەۆ.
پرەزيدەنت قازاقستان حالقى اسسامبلەياسى ەل بىرلىگىن نىعايتۋعا ولشەۋسىز ۇلەس قوسقانىن اتاپ ءوتتى.
— قازاقستاندى بەيبىتشىلىكتىڭ، ءوزارا سەنىم مەن كەلىسىمنىڭ وشاعى رەتىندە جەر جۇزىنە تانىتۋعا ىقپال ەتتى. قوعامدىق سەنىم كەڭەسى سىندارلى ديالوگ ارقىلى جاڭا ساياسي مادەنيەتتى ورنىقتىرۋعا اتسالىستى. ال ۇلتتىق قۇرىلتايدىڭ مۇشەلەرى وسى جالپى ۇلتتىق ديالوگتى ودان ءارى تەرەڭدەتە ءتۇستى. بۇل قۇرىلىم اياسىندا پراكتيكالىق تۇرعىدان قۇندى باستامالار كوتەرىلدى. سونىڭ ارقاسىندا 26 زاڭ قابىلداندى، تاعى 10 زاڭ جوباسى قۇرىلتايدا قارالادى. مەن وسى ءساتتى پايدالانا وتىرىپ، مەملەكەتتىك ماڭىزى بار ىستەرگە بەلسەنە ارالاسقان، وتانشىل بولۋدىڭ وزىق ۇلگىسىن كورسەتكەن ءاربىر ازاماتقا شىنايى ريزاشىلىعىمدى بىلدىرەمىن، — دەدى مەملەكەت باسشىسى.