مەملەكەت باسشىسىنىڭ گەرمانياداعى رەسمي ساپارىنىڭ ەكىنشى كۇنى Siemens AG كومپانياسىنىڭ كوممەرتسيا جانە قارجى ماسەلەلەرى جونىندەگى ۆيتسە-پرەزيدەنتى بەرند ۋلبريحتپەن كەزدەسۋدەن باستالدى.
پرەزيدەنتتىڭ ايتۋىنشا، Siemens - ەلىمىزدىڭ اسا ماڭىزدى سەرىكتەسى. ويتكەنى كومپانيا قىزمەتىندەگى ونەركاسىپتى سيفرلاندىرۋ، ەلەكترلەندىرۋ، ۇتقىرلىق پەن ينتەللەكتۋالدى ينفراقۇرىلىم سياقتى نەگىزگى باعىتتار قازاقستاننىڭ جاڭعىرۋ باسىمدىقتارىنا ساي كەلەدى.
قاسىم-جومارت توقايەۆ بەرند ۋلبريحتكە ەكونوميكانىڭ ناقتى سەكتورلارىنداعى سيفرلىق ترانسفورماتسيا بويىنشا قولعا الىنعان جۇيەلى شارالار تۋرالى ايتتى. وسى ورايدا، مەملەكەت باسشىسى Siemens پەن قازاقستاندىق Silk Road Electronics كومپانيالارىنىڭ Qarmet مەتاللۋرگيا كومبيناتى قۇرال- جابدىقتارىن جاڭعىرتۋ جونىندەگى بىرلەسكەن جوباسىنا قولداۋ ءبىلدىردى.
پرەزيدەنت قازاقستاننىڭ وزىق قۇرال-جابدىقتاردى ساتىپ الۋعا عانا ەمەس، وندىرىستىك، ينجەنەرلىك جانە سەرۆيستىك ورتالىقتاردى قۇرۋعا دا قىزىعۋشىلىق تانىتاتىنىن مالىمدەدى.
اتاپ ايتقاندا، Siemens كومپانياسىنىڭ قۇزىرەتتەرى مەن تەحنولوگيالىق يننوۆاتسيالارى ەلىمىزدىڭ ەنەرگەتيكالىق جانە كوممۋنالدىق سەكتورلارىن جاڭعىرتۋدا، سونداي-اق قورشاعان ورتانىڭ جاعدايىنا مونيتورينگ جاساۋ ساپاسىن ارتتىرۋدا پايدالى بولار ەدى.
كەزدەسۋدە Siemens Healthineers كومپانياسىمەن مەديتسينالىق تەحنولوگيا سالاسىنداعى ىقپالداستىقتى كەڭەيتۋدىڭ الەۋەتى مول ەكەنىنە نازار اۋدارىلدى.