جوعارى مارتەبەلى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ شاقىرۋى بويىنشا اسا مارتەبەلى بەلگيالىقتار كورولى فيليپپ پەن اسا مارتەبەلى پاتشايىم ماتيلدا 2026 -جىلعى 11 – 14-قازاندا قازاقستانعا مەملەكەتتىك ساپارمەن كەلدى.
جوعارى مارتەبەلى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن اسا مارتەبەلى بەلگيالىقتار كورولى فيليپپ قازاقستان- بەلگيا قارىم-قاتىناسىنىڭ قازىرگى جاي-كۇيى مەن پەرسپەكتيۆاسىن جان-جاقتى تالقىلادى، سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
قازاقستان مەن بەلگيا اراسىنداعى دوستىق قاتىناستاردى تەڭ قۇقىقتى جانە ءوزارا ءتيىمدى ىنتىماقتاستىق رۋحىندا ودان ءارى دامىتۋعا جانە تەرەڭدەتۋگە ۇمتىلىسىن راستاي وتىرىپ، تاراپتار:
1. قازاقستان مەن بەلگيا اراسىنداعى ەكىجاقتى ىنتىماقتاستىق تىعىز ديالوگ جانە ءوزارا سەنىم مەن قۇرمەت اياسىندا دامىپ كەلە جاتقانىن اتاپ ءوتتى.
2. 2015 -جىلعى 21-جەلتوقسانداعى ءبىر تاراپتان قازاقستان رەسپۋبليكاسى مەن ەكىنشى تاراپتان ەۋروپالىق وداق جانە وعان مۇشە مەملەكەتتەر اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىم شەڭبەرىندە تىعىز ىقپالداستىقتى جالعاستىرۋعا دايىن ەكەنىن ءبىلدىردى.
3. قازاقستاندا بەلگيالىق بيزنەستىڭ ورنىقتى قاتىسۋىن جانە ءوزارا ساۋدا مەن ينۆەستيتسيالاردى ودان ءارى ۇلعايتۋ ءۇشىن ايتارلىقتاي الەۋەت بار ەكەنىن قاناعاتتانۋشىلىقپەن اتاپ ءوتتى.
4. «قازاقستان - بەلگيا» ىسكەرلىك كەڭەسىنىڭ قىزمەتىن جانە مەملەكەتتىك ساپار اياسىندا ونىڭ ءتورتىنشى وتىرىسىنىڭ وتكىزىلۋىن ەكى ەلدىڭ ىسكەر توپتارى اراسىنداعى بايلانىستاردى دامىتۋدىڭ ماڭىزدى تەتىگى رەتىندە قۇپتادى.
5. اسا ماڭىزدى مينەرالدار، مۇناي- حيميا، ونەركاسىپ، ماشينا جاساۋ، كولىك- لوگيستيكا جانە جاڭارتىلاتىن ەنەرگەتيكا سالالارىنداعى ىنتىماقتاستىقتى ودان ءارى دامىتۋدىڭ ماڭىزدى ەكەنىن راستادى.
6. اسا ماڭىزدى مينەرالدار سالاسىنداعى بايلانىستاردىڭ ستراتەگيالىق ماڭىزىن اتاپ ءوتىپ، مەملەكەتتىك ساپار اياسىندا اسا ماڭىزدى مينەرالدار جونىندەگى دوڭگەلەك ۇستەلدىڭ وتكىزىلۋىن قۇپتادى.
7. كولىك- لوگيستيكا ىنتىماقتاستىعىن ودان ءارى دامىتۋدىڭ جانە ەۋروپا مەن ازيا اراسىنداعى ءوزارا بايلانىستى ارتتىرۋدىڭ ماڭىزىن اتاپ ءوتىپ، ترانسكاسپي حالىقارالىق كولىك باعىتىنىڭ ازيا مەن ەۋروپا اراسىنداعى سەنىمدى ءارى ورنىقتى كولىك قاتىناسى رەتىندە ءوسىپ كەلە جاتقان ءرولىن اتاپ كورسەتتى.
8. ەكى ەلدىڭ ورنىقتى ەكونوميكالىق دامۋى مەن باسەكەگە قابىلەتتىلىگى ءۇشىن سيفرلاندىرۋدىڭ، جاساندى ينتەللەكت پەن يننوۆاتسيالاردىڭ ماڭىزى ارتىپ كەلە جاتقانىن اتاپ ءوتتى.
9. جاساندى ينتەللەكت، ۇلكەن دەرەكتەر، بۇلتتى تەحنولوگيالار، سۋپەركومپيۋتەر ينفراقۇرىلىمى جانە دەرەكتەردى وڭدەۋ ورتالىقتارى سالالارىنداعى ىنتىماقتاستىقتى دامىتۋعا مۇددەلى ەكەنىن ايتتى.
10. اۋىل شارۋاشىلىعى سالاسىنداعى ىنتىماقتاستىقتىڭ ايتارلىقتاي الەۋەتىن اتاپ ءوتىپ، اۋىل شارۋاشىلىعى ونىمدەرىنىڭ ءوزارا ساۋداسىن كەڭەيتۋگە، تاماق ونەركاسىبىن دامىتۋعا جانە زاماناۋي اگروتەحنولوگيالاردى ەنگىزۋگە جاردەمدەسۋ نيەتىن جەتكىزدى.
11. مەملەكەتتىك ساپار اياسىندا قازاقستان- بەلگيا رەكتورلار فورۋمىنىڭ وتكىزىلۋىن قۇپتاپ، بىرلەسكەن ءبىلىم بەرۋ باعدارلامالارىن، اكادەميالىق ۇتقىرلىقتى، بىرلەسكەن عىلىمي زەرتتەۋلەردى جانە ۋنيۆەرسيتەتتەر مەن عىلىمي ورتالىقتار اراسىنداعى ارىپتەستىكتى دامىتۋعا قولداۋ ءبىلدىردى.
12. دەنساۋلىق ساقتاۋ سالاسىنداعى ىنتىماقتاستىقتى نىعايتۋدىڭ، سونىڭ ىشىندە 1978 -جىلعى العاشقى مەديتسينالىق-سانيتاريالىق كومەك جونىندەگى الماتى دەكلاراتسياسى مەن 2018 -جىلعى استانا دەكلاراتسياسىنىڭ قاعيداتتارى نەگىزىندە دۇنيەجۇزىلىك دەنساۋلىق ساقتاۋ ۇيىمىنىڭ العاشقى مەديتسينالىق-سانيتاريالىق كومەك جونىندەگى جاھاندىق كواليتسياسى شەڭبەرىندە العاشقى مەديتسينالىق-سانيتاريالىق كومەكتىڭ (ا م س ك) ءرولىن كۇشەيتۋدىڭ، سونداي-اق 2026 -جىلعى 14-قازاندا الماتى قالاسىندا وتەتىن «الماتى دەكلاراتسياسىنىڭ 50 جىلدىعى: بولاشاق ۇرپاق ءۇشىن مىقتى العاشقى مەديتسينالىق- سانيتاريالىق كومەك قالىپتاستىرۋ» كونفەرەنتسياسىنىڭ قورىتىندىلارى بويىنشا قول جەتكىزىلەتىن ۋاعدالاستىقتارعا سايكەس بىرلەسكەن باستامالاردى ىسكە اسىرۋدىڭ ماڭىزىن راستادى.
13. ءدىنارالىق جانە مادەنيەتارالىق ديالوگتى ودان ءارى نىعايتۋدىڭ، بەيبىتشىلىك مادەنيەتىن، ءوزارا قۇرمەت پەن تولەرانتتىلىقتى ىلگەرىلەتۋدىڭ ماڭىزدى ەكەنىن راستادى.
14. كليماتتىڭ وزگەرۋىنە، سۋ رەسۋرستارىنىڭ تاپشىلىعىنا جانە قورشاعان ورتانىڭ توزۋىنا قارسى كۇرەستەگى بىرلەسكەن كۇش- جىگەردىڭ، سونداي-اق ورنىقتى دامۋدى ىلگەرىلەتۋدىڭ ماڭىزىن اتاپ ءوتتى.
15. 2024 -جىلعى 7-قاراشاداعى قازاقستان مەن بەنيليۋكس ەلدەرى اراسىنداعى قىزمەتتىك پاسپورت يەلەرىن ۆيزالىق تالاپتاردان بوساتۋ تۋرالى كەلىسىمگە وزگەرىستەر ەنگىزۋ جونىندەگى حاتتامانىڭ كۇشىنە ەنۋىن قۇپتادى.
16. 2027 -جىلى قازاقستان رەسپۋبليكاسى مەن بەلگيا كورولدىگى اراسىنداعى ديپلوماتيالىق قاتىناستاردىڭ ورناعانىنا 35 جىل تولۋىن مەرەكەلەۋگە ارنالعان ءىس جۇزىندەگى ناتيجەلەردىڭ ءبىرى رەتىندە ديپلوماتيالىق وكىلدىكتەر، حالىقارالىق ۇيىمدار جانىنداعى وكىلدىكتەر جانە كونسۋلدىق مەكەمەلەرى قىزمەتكەرلەرىنىڭ وتباسى مۇشەلەرىنىڭ اقىلى ەڭبەك قىزمەتى تۋرالى ەكىجاقتى كەلىسىم بويىنشا كەلىسسوزدەردى اياقتاۋعا جانە وعان قول قويۋعا كۇش سالاتىن بولادى.
17. كوپجاقتىلىققا، حالىقارالىق قۇقىق قاعيداتتارىنا جانە حالىقارالىق بەيبىتشىلىك پەن قاۋىپسىزدىكتى قولداۋداعى، ورنىقتى دامۋدى قامتاماسىز ەتۋدەگى جانە جاھاندىق سىن-قاتەرلەردى شەشۋدەگى بىرىككەن ۇلتتار ۇيىمىنىڭ ورتالىق رولىنە بەيىل ەكەنىن راستادى.
18. ب ۇ ۇ، ە ق ى ۇ، سونداي-اق «ق ر – ە و» جانە «و ا – ە و» فورماتتارىنداعى كوپجاقتى الاڭدار شەڭبەرىندە حالىقارالىق كۇن ءتارتىبى مەن ەكونوميكالىق دامۋ ماسەلەلەرى بويىنشا ەكىجاقتى ساياسي ديالوگتى جانداندىرۋعا ۋاعدالاستى.
19. 1972 -جىلعى 10-ساۋىردەگى باكتەريولوگيالىق (بيولوگيالىق) جانە ۋىتتى قارۋدى ازىرلەۋگە، وندىرۋگە جانە ونىڭ قورلارىن جيناقتاۋعا تىيىم سالۋ، سونداي-اق ولاردى جويۋ تۋرالى كونۆەنتسيانى ودان ءارى نىعايتۋعا مۇددەلىلىك تانىتتى.
جوعارى مارتەبەلى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن اسا مارتەبەلى بەلگيالىقتار كورولى فيليپپ كەلىسسوزدەر قورىتىندىسىنا كوڭىل تولاتىنىن جەتكىزىپ، قازاقستان- بەلگيا ارىپتەستىگىنە جاڭا سەرپىن بەرۋ جولىندا تاباندىلىق تانىتاتىنىن راستادى.
تاراپتار بەلگيالىقتار كورولىنىڭ قازاقستانعا العاشقى مەملەكەتتىك ساپارى ەكىجاقتى قاتىناستار تاريحىنداعى ماڭىزدى كەزەڭ بولاتىنىنا جانە بايلانىستاردى ودان ءارى ساپالى دامىتۋعا نەگىز قالايتىنىنا سەنىم ءبىلدىردى.
بۇعان دەيىن مەملەكەت باسشىسى قاسىم-جومارت توقايەۆ پەن بەلگيالىقتار كورولى فيليپپ اقوردادا باق وكىلدەرىنە ارنالعان بريفينگ وتكىزگەنىن جازعانبىز.