قاسىم-جومارت توقايەۆ فۋدجەيرا امىرلىگىندە بولعان جول-كولىك اپاتىندا ادامداردىڭ قازا تابۋىنا بايلانىستى شەيح مۇحاممەد بەن زايد ءال ناھايانعا كوڭىل ايتتى.
مەملەكەت باسشىسى قايتىس بولعان جانداردىڭ تۋعان-تۋىستارى مەن باۋىرلاس بىرىككەن اراب امىرلىكتەرى حالقىنىڭ قايعىسىنا ورتاقتاسىپ، زارداپ شەككەندەردىڭ تەزىرەك ساۋىعىپ كەتۋىنە تىلەۋلەس ەكەنىن جەتكىزدى.
ەستەرىڭىزگە سالا كەتەيىك، ب ا ءا ىشكى ىستەر مينيسترلىگىنە سىلتەمە جاساعان امىرلىكتەردىڭ Gulf News باسىلىمىنىڭ حابارلاۋىنشا، اپات 12 قاراشادا ءتۇن ورتاسى شاماسىندا بولعان. وقيعادان ون ءتورت ادام قازا تاۋىپ، 30 ادام جاراقات العان. جول اپاتىندا بەس جۇك كولىگىن قوسا العاندا، 23 كولىك سوقتىعىسقان.