پرەزيدەنت اتاپ وتكەندەي، بۇل تاريحي ۋاقيعا اتى اڭىزعا اينالعان وتانداسىمىزدىڭ جاھاندىق سپورتتاعى قولتاڭباسى ايرىقشا ماڭىزعا يە ەكەنىن ايعاقتايدى. سونداي-اق قازاقستاننىڭ الەمدىك ارەناداعى شىنايى كەلبەتى مەن بەدەلىن قالىپتاستىرۋعا قوسقان ەلەۋلى ۇلەسىن كورسەتەدى.
مەملەكەت باسشىسىنىڭ پىكىرىنشە، گەننادي گولوۆكين - ەلىمىزدىڭ ماقتانىشى ءارى حالىقارالىق سپورت قوعامداستىعىنداعى ەلشىسى.
قاسىم-جومارت توقايەۆ دۇنيە جۇزىندەگى ەڭ ۇزدىك بوكسشىلاردىڭ بىرىنەن ۇلگى العان جاس سپورتشىلارىمىز جىگەرلەنىپ، بيىك بەلەستەردى باعىندىرا بەرەتىنىنە سەنىم ءبىلدىردى.
ايتا كەتەيىك، ا ق ش- تىڭ نيۋ-يورك شتاتىنىڭ كاناستوتا قالاسىندا وتكەن سالتاناتتى ءىس-شارانىڭ باستى تۇلعالارىنىڭ ءبىرى حالىقارالىق بوكس داڭقى زالىنا قابىلدانعان قازاقستاننىڭ العاشقى وكىلى گەننادي گولوۆكين بولدى.
گولوۆكيندى داڭق زالىنا قابىلداۋ الدىندا امەريكالىق جانكۇيەرلەر ەرەكشە قۇرمەتپەن قارسى الدى.