قاساپحانالار، ق م ب د ەسكەرتۋى، ارنايى سايت - قۇربان ايتقا قاتىستى ماڭىزدى مالىمەتتەر
استانا. KAZINFORM - بۇگىن مۇسىلمانداردىڭ ءدىني مەرەكەسى - قۇربان ايت باستالدى. 3 كۇنگە سوزىلاتىن بۇل مەيرامنىڭ باستى اتريبۋتتارى - ايت نامازى، قۇربان شالۋ، قايىرىمدىلىق شارالارى جانە مەرەكەلىك داستارحان. قاسيەتتى مەيرام قارساڭىندا قۇربان شالۋ ورىندارى، ارنايى سايت، مەرەكەلىك ناماز ۋاقىتى سىندى پايدالى دەرەكتەردى توپتاستىرىپ، وقىرمان نازارىنا ۇسىنامىز.
قۇربان ايت كۇنى قالاي بەلگىلەندى؟
مەرەكە قارساڭىندا قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى باسپا ءسوز ءماسليحاتىن وتكىزىپ، بيىلعى قۇربان ايتتىڭ 6-ماۋسىمدا باستالاتىنىن رەسمي تۇردە جاريالادى.
- بيىل قاسيەتتى قۇربان ايت مەرەكەسى 6-ماۋسىمدا باستالادى. قازاقستان مۇسىلماندارى ءدىني باسقارماسى ءبىرقاتار الىس تا جاقىن مۇسىلمان ەلدەردىڭ عۇلامالارىمەن، ءپاتۋا شىعارۋ ورتالىقتارىمەن كەڭەسىپ، وسىنداي ءپاتۋا قابىلدادى، - دەدى باس ءمۇفتي.
ق م ب د مالىمەتىنشە، يسلام دىنىندە قاسيەتتى كۇندەر، تۇندەر جانە ايلار قاماري جىل ساناۋى نەگىزىندە انىقتالادى. مۇنداي جىل ساناۋى اي فازاسىنىڭ وزگەرۋىنە نەگىزدەلگەن. جاڭا ايدىڭ كورىنۋىمەن جاڭا اي باستالادى. قاماري اي كەيدە 29 نە 30 كۇن بولادى.
زۋلحيججا ايىن انىقتاۋ ءۇشىن زۋل-قاعدا ايىنىڭ 29 ىندا ايدى باقىلايدى. كۇن باتقان كەزدە جاڭا اي كورىنسە، كەلەسى كۇنى زۋل- حيججا ايى باستالعان بولىپ سانالادى. ەگەر كۇن بۇلتتى بولىپ، اي كورىنبەسە، زۋل-قاعدا ايىن 30 كۇنگە تولىقتىرادى.
وسى نەگىزدە 2025 -جىلى 27-مامىردا جاڭا ايدىڭ كورىنۋىنە بايلانىستى بيىل زۇلحيججا ايى 28-مامىردا باستالىپ، اراپا 5-ماۋسىمعا، ال قۇربان ايت 6-ماۋسىمعا ساي كەلەدى.
قۇرباندى ونلاين شالۋعا بولادى
بيىل دا ەلىمىزدە قۇربان شالۋ ونلاين جانە وففلاين فورماتتا وتەدى.
- ءدىني باسقارما حالىققا قولايلى جاعداي جاساۋ ماقساتىندا قۇربان شالۋ ءراسىمىن قاشىقتان وتكىزۋگە ارنالعان qurban.muftyat.kz سايتىن ىسكە قوستى. دىنىمىزدە قۇرباندىق شالۋ ءراسىمىن باسقا بىرەۋگە تاپسىرىپ، ونى وكىل ەتە الادى. ەگەر ءوزى بارا الماسا، ءبىر كىسىگە ءوتىنىش جاساپ، قۇربان شالۋعا رۇقسات ەتىلگەن. دەمەك ونلاين فورماتتا قۇربان شالۋعا تاپسىرىس بەرە الاسىزدار، - دەدى ناۋرىزباي قاجى تاعان ۇلى.
ونىڭ ايتۋىنشا، مۇنداي قۇرباندىقتان تۇسكەن ەت مۇقتاج جاندارعا جەتكىزىلەدى.
ونلاين تۇردە قۇربان شالام دەۋشىلەر سايت ارقىلى قۇرباندىق مالىن تاڭداپ، Kaspi QR ارقىلى تولەم جاساي الادى. تاپسىرىس ءساتتى وتسە، ۇيالى تەلەفونعا SMS حابارلاما كەلەدى. قۇرباندىق شالىنعان سوڭ ونىڭ فوتو جانە بەينە ەسەبى تاپسىرىس بەرۋشى كورسەتكەن نومىرگە جىبەرىلەدى.
سونداي-اق ق م ب د مۇسىلمان جاماعاتقا مىنانداي ماڭىزدى ەسكەرتۋ جاسادى.
- قۇربان ايت مەرەكەسى كەزىندە وزدەرىنىڭ تەرىس ماقساتتارىن جۇزەگە اسىرۋ ءۇشىن كەيبىر بەلگىسىز ازاماتتار مەن ۇيىمدار جالعان قۇرباندىق سايتتارىن اشىپ، حالىقتى اداستىرىپ، قۇرباندىققا اۋدارعان قاراجاتتارىن وزگە ماقساتقا پايدالانىپ كەتۋى مۇمكىن. سوندىقتان بارشاڭىزدى اباي بولۋعا شاقىرامىز، - دەلىنگەن حابارلامادا.
قۇربان شالۋ كىمدەرگە مىندەت؟
ق م د ب مالىمەتىنشە، حانافي ءمازھابىندا قۇربان شالۋ - ءۋاجىپ. ءۋاجىپ دەگەن - پارىز بەن سۇننەتتىڭ اراسىنداعى امال. ءۋاجىپتى تارك ەتكەن ادام سۇرالادى. ونى ورىنداماعان ادام قازاسىن وتەيدى. ال سۇننەتتى تارك ەتكەن ادام سۇرالمايدى، قازاسىنىڭ وتەلۋى تالاپ ەتىلمەيدى.
- قۇربان ايت ۋاقىتى ءوتىپ كەتسە دە، مۇسىلماننىڭ موينىنان قۇربان شالۋ مىندەتى تۇسپەيدى. ساتىپ العان قۇرباندىعىن ايت كۇندەرى شالا الماسا، ونى تىرىدەي ساداقا ەتەدى نەمەسە سويىپ، بارلىق ەتىن ساداقا ەتەدى، ودان ەشتەڭە جەمەيدى. ويتكەنى ۋاقىتى وتۋمەن قۇرباندىق مىندەتى ساداقا مىندەتىنە اۋىسادى. قۇرباندىقتى ءالى ساتىپ الماعان بولسا، قۇرباندىق قۇنى مولشەرىندە ساداقا ەتەدى، - دەيدى ق م د ب ءدىني ءبىلىم جانە كادر دايىنداۋ ءبولىمىنىڭ مەڭگەرۋشىسى حاسان امانقۇلوۆ.
ونىڭ ايتۋىنشا، قۇربان شالۋ اقىل- ەسى دۇرىس، باليعات جاسىنا تولعان، اۋقاتتى، ءاربىر ەر جانە ايەل مۇسىلمانعا بۇيىرىلعان. ال جولاۋشىعا، ۋاقىتشا (15 كۇننەن از) قونىستانعان جانە كەدەي ادامعا قۇرباندىق شالۋ مىندەت ەمەس.
باي دەگەن - ءوزىنىڭ جانە وتباسىنىڭ نەگىزگى قاجەتتىلىگىنەن ارتىق مال- دۇنيەسى زەكەت نيسابىنا جەتكەن (85 گرامم التىنى، 40 قويى، 30 قارامالى نەمەسە 5 تۇيەسى بار) ادام. اقىل- ەسى ءتۇزۋ، باليعات جاسىنا تولعان ادام قۇرباندىقتى ءوز اتىنان شالادى. كىشكەنتاي بالالارى اتىنان قۇرباندىق شالۋ مىندەت ەمەس.
ايت نامازىنىڭ ۋاقىتى
3-ماۋسىم كۇنى قازاقستان مۇسىلماندارى ءدىني باسقارماسى ەل وڭىرلەرىندەگى قۇربان ايت نامازىنىڭ كەستەسىن جاريالادى.
ونداعى دەرەككە ساي، ەلىمىزدىڭ 3 مەگاپوليسى مەن 17 وبلىسىنداعى ناماز ۋاقىتى تاڭعى 06:00 مەن 07:00 اراسىندا وزگەرىپ وتىرادى.
قۇربان شالۋ ورىندارى
قازاقستان مۇسىلماندارى ءدىني باسقارماسىنا قاراستى «زەكەت جانە قايىرىمدىلىق» قورى ەل بويىنشا قۇربان شالۋعا ارنالعان ارنايى ورىنداردىڭ ءتىزىمىن جاريالادى. ولار:
استانادا - «جايلاۋ»، «باراكات»، «شانحاي»، «شوپان اتا»، «ەت حان»، «شاۋشەن» شارۋا قوجالىعى (الاش تاس جولى، 136 ب) مال بازارلارى؛
الماتىدا - «التىن ساقا» مال بازارى؛
شىمكەنتتە - «حالال قاساپ» مال بازارى مەن قاساپحاناسى؛
سەمەي قالاسىندا - «سارى» مال بازارى جانە «اقشىڭ» قاساپحاناسى.
كوكشەتاۋ قالاسىندا - «بيجان ەت وڭدەۋ» جانە قالالىق مال بازارلارى.
اقتوبە قالاسىندا – س پ ك «ايبەك» ەت كومبيناتى، «دالا ەلى» ج ش س، «ەسىك» ج ش س، جك «مولدابەكوۆ»، ج ك «قاسىم» مال بازارلارى؛
الماتى وبلىسىندا - قونايەۆ قالاسى، قارلىعاش شاعىناۋدانىندا؛
اتىراۋ قالاسىندا - «تۋما» مال بازارى مەن «يمانعالي»، «قۇسپان موللا»، «ق. مۇڭايتپاسوۆ» مەشىتتەرى؛
ورال قالاسىندا - «ەل ىرىسى» جانە «ادال ەت» مال بازارلارى؛
تاراز قالاسىندا - «بايدانوۆ» جانە «رامازان» مال بازارلارى.
تالدىقورعان قالاسىندا - «3-بولىمشە» تۇرعىن ءۇي الابى مەن قالالىق مال بازارى.
قاراعاندى قالاسىندا - «توو اراي ك ز» (گوگوليا 2/23)، «ش ق حاسەنوۆ» (سەيفۋللينا 53)، «ي پ ابيشەۆ» (رەزنيكا 18) مەكەنجايلارىندا ورنالاسقان مال بازارلارى؛
قوستاناي قالاسىندا - «اميگو» جانە «سويۋز» ت س مال بازارلارى؛
قىزىلوردا قالاسىندا - 1 مال بازارى؛
اقتاۋ قالاسىندا - «كوركەم الەم ەت كومبيناتى» مال بازارى؛
پاۆلودار قالاسىندا - «قۇلاگەر» يپپودرومى؛
پەتروپاۆل قالاسىندا - جۇمىسشى كەنتىندەگى (كوسموناۆتار كوشەسى، 2) مال بازارى.
تۇركىستان وبلىسىندا «تۇركىستان-احمەت ياسساۋي» وبلىس ورتالىق مەشىتى، «كەنتاۋ ورتالىق»، «شولاققورعان ورتالىق»، «ىسقاق» ورتالىق، «داۋلەت ۇلى بەگالى اتا»، «تۇلكىباس اتا»، «ناقىپبەك ۇلى اۋەن»، «ى. يماناليەۆ»، «نۇر»، «مۇسىلماندار»، «ابدۋل اكىم»، «شاردارا ورتالىق»، «نۇعمان»، «ساتىبالدى يمانبەردى ۇلى»، «دەرۆيش ءالي» مەشىتتەرى، سونداي-اق «قۇلاگەر ەت» ج ش س، «قارابۇلاق»، «سايرام» قاساپحانالارى؛
جەزقازعان قالاسىندا - «قۇلجانوۆ» جانە «رىباچي» مال بازارلارى؛
وسكەمەن قالاسىندا - «اتىعاي اسۋى» قۇربان شالۋ ورنى.
ايتا كەتەيىك، بۇعان دەيىن باس ءمۇفتي قۇربان ايتقا بايلانىستى كاسىپكەرلەرگە ۇندەۋ جاساعانىن جازعان ەدىك.
اۆتور
ەربول جانات