— ءبىز اۋىل تۋرالى كوپ ايتامىز. «اۋىل — حالقىمىزدىڭ التىن بەسىگى» دەپ ءاربىر جيىندا ايتىپ جۇرەمىز. راسىندا، بۇل — دۇرىس. ءبىراق قازىرگى زاماندا بۇل ءسوزدى قايتا- قايتا ايتا بەرۋدىڭ قاجەتى بار ما؟، — دەپ اتاپ ءوتتى پرەزيدەنت.
مەملەكەت باسشىسى دۇنيە جۇزىندە «ۋربانيزاتسيا» اتتى جاھاندىق ءۇردىس بولىپ جاتقانىن ەسكە سالدى.
— بۇگىندە ءومىردىڭ قىزىعى — قالادا. بۇل دا — شىندىق. قازىردىڭ وزىندە ءبىز قالادا جينالىپ وتىرمىز. سوندىقتان الدىمىزدا تۇرعان ماڭىزدى ءارى وزەكتى مىندەت: قالا وركەنيەتىن دارىپتەۋىمىز كەرەك. بۇل ىستە وركەنيەتتىڭ وزىق تالاپتارىنا ساي بولۋىمىز قاجەت، — دەدى ول.
پرەزيدەنتتىڭ ايتۋىنشا، قالادا تۇراتىن جاستاردى «اسفالت قازاعى» نەمەسە «شالا قازاق» دەپ اتاۋ دۇرىس ەمەس.
— كەيبىر جازۋشىلار قالادا تۇرىپ جاتقان جاستاردى ەكىگە بولەتىن بولدى: ءبىرىنشىسى — قالالاردا تۇرىپ جاتقان «اسفالت قازاعى» نەمەسە «شالا قازاق»، ەكىنشىسى — ناعىز اۋىل قازاقتارى. بۇل — دۇرىس ەمەس. قازىرگى تاڭدا قالالاردا ءومىر ءسۇرىپ جاتقان جاستارىمىز قازاق مەكتەپتەرىندە قازاق تىلىندە ساپالى ءبىلىم الۋدا. سوندىقتان ءبىرتۇتاس حالقىمىزدى ەكىگە ءبولۋدى دوعارۋىمىز كەرەك. مۇنداي ارەكەتتى جاساۋدىڭ ەشقانداي قاجەتى دە، وعان ەشكىمنىڭ حاقى دا جوق. وسىعان بايلانىستى تاياۋدا مادەنيەت جانە اقپارات مينيسترلىگىنە تاپسىرما بەردىم. جازۋشىلار اراسىندا قالا تاقىرىبىنا ارنالعان ادەبي سايىستار وتكىزۋىمىز كەرەك. بۇل حالقىمىزعا، اسىرەسە، جاستارىمىزعا كەرەك دۇنيە بولماق، — دەدى قاسىم-جومارت توقايەۆ.