نوبەل سىيلىعىنىڭ لاۋرەاتى بانگلادەشتىڭ ۋاقىتشا ۇكىمەتىن باسقارۋعا كەلىستى

استانا. KAZINFORM - نوبەل سىيلىعىنىڭ لاۋرەاتى، پروفەسسور مۋحامماد يۋنۋس ۋاقىتشا ۇكىمەتتى باس كەڭەسشى رەتىندە باسقارۋعا كەلىستى، دەپ جازادى The Daily Star.

شىلدە ايىنىڭ باسىندا بانگلادەشتىڭ ءارتۇرلى قالالارىندا ستۋدەنتتەردىڭ نارازىلىق شەرۋلەرى ءوتتى. ولار 1971 -جىلى پاكىستاننان شىققان تاۋەلسىزدىك سوعىسى ارداگەرلەرىنىڭ تۋىستارىنا مەملەكەتتىك سەكتورداعى جۇمىس ورىندارىنىڭ ۇشتەن ءبىرىن ساقتايتىن كۆوتا جۇيەسىنە قارسىلىق ءبىلدىردى. ستۋدەنتتەر جۇيەنى كەمسىتۋشىلىك دەپ اتاپ، جۇمىسقا قابىلداۋ ءاربىر جەكە ۇمىتكەردىڭ بىلىكتىلىگىنە نەگىزدەلۋىن تالاپ ەتتى.

شەرۋلەر بىرتە- بىرتە جاپپاي تارتىپسىزدىكتەرگە ۇلاستى. The Daily Star باسىلىمىنىڭ حابارلاۋىنشا، نارازىلىقتار باستالعاننان بەرى 10 مىڭ ادام قاماۋعا الىنعان.

4-تامىزدا نارازىلىقتار داككا مەن ەلدىڭ باسقا قالالارىندا جاڭا كۇشپەن باستالدى. 90 نان استام ادام قايتىس بولدى، ونىڭ 13 ءى پوليتسيا قىزمەتكەرى. دۇيسەنبىدە مىڭداعان ادام گانوبحابانداعى پرەمەر- ءمينيستردىڭ رەزيدەنتسياسىنا باسىپ كىردى. قاتىسۋشىلار بانگلادەش پرەمەر- ءمينيسترى شەيح حاسينانىڭ وتستاۆكاعا كەتۋىن تالاپ ەتتى. 5-تامىزدا ەلدىڭ پرەمەر- ءمينيسترى وتستاۆكاعا كەتىپ، ەلدەن قاشىپ شىقتى. كەيىنىرەك شەيح حاسينانىڭ ۇلى بريتانيادان ساياسي باسپانا سۇراعانى بەلگىلى بولدى. ارميا شتابىنىڭ باستىعى ۋاقىتشا ۇكىمەت قۇرۋ تۋرالى مالىمدەدى. ەل پارلامەنتى تاراتىلدى.

بانگلادەشتىڭ باس پوليتسيا قاۋىمداستىعى ونىڭ مۇشەلەرى ەرەۋىلگە شىعاتىنىن مالىمدەدى. مالىمدەمەگە سايكەس، ول " ءاربىر پوليتسيا قىزمەتكەرىنىڭ قاۋىپسىزدىگى قامتاماسىز ەتىلگەنگە دەيىن" جالعاسادى. بانگلادەش پوليتسيا قىزمەتى قاۋىمداستىعى (BPS) بۇكىل ەل بويىنشا مىڭداعان پوليتسيا قىزمەتكەرلەرىن ۇسىنادى. ونىڭ ايتۋىنشا، دۇيسەنبىدە حاسينا وتستاۆكاعا شىعىپ، قاشىپ كەتكەننەن كەيىن 450 دەن استام پوليسيا بولىمشەسىنە شابۋىل جاسالدى.

6-تامىز كۇنى تاڭەرتەڭ ستۋدەنتتەر قوزعالىسىنىڭ جەتەكشىلەرى نوبەل سىيلىعىنىڭ يەگەرى مۇحاممەد يۋنۋستى ۋاقىتشا ۇكىمەتتىڭ باس كەڭەسشىسى رەتىندە كورگىسى كەلەتىندەرىن مالىمدەدى.

مۇحاممەد يۋنۋستىڭ ايتۋىنشا، ول ستۋدەنتتەر مەن بانگلادەش ازاماتتارىنىڭ ۇسىنىسىنان باس تارتا الماعان.

قازىر مۇحاممەد يۋنۋس حالىقارالىق وليمپيادا كوميتەتىنىڭ شاقىرۋىمەن ارنايى قوناق رەتىندە پاريجدە ءجۇر. ستۋدەنتتەر ول جاقىندا بولعان وقيعالارعا بايلانىستى ەلگە ورالادى دەپ سەنەدى.