نەمىس پوليتسياسى ق ر ازاماتشاسى ايگۇل سايلىبايەۆانىڭ ولىمىنە قاتىستى تۇسىنىك بەردى

استانا. KAZINFORM - گەرمانيانىڭ وڭتۇستىك گەسسەن پوليتسياسىنىڭ باس باسقارماسى قازاقستان ازاماتشاسى ايگۇل سايلىبايەۆانىڭ ولىمىنە قاتىستى سۇراققا جاۋاپ بەردى.

«16-ماۋسىم كۇنى تۇستەن كەيىن ەرلاح كولىنىڭ ماڭىندا ادام دەنەسى تابىلعاننان كەيىن پروكۋراتۋرا مەن پوليتسيا بۇل 2024 -جىلعى 4-ماۋسىمدا ءىز-ءتۇزسىز جوعالعان 40 جاستاعى ايەلدىڭ دەنەسى دەپ بولجاپ وتىر»، - دەپ جاۋاپ بەردى وڭتۇستىك گەسسەن پوليتسياسى باس باسقارماسى.

وسى ۋاقىتقا دەيىن جۇرگىزىلگەن تەرگەۋ جۇمىستارىنىڭ ناتيجەسىندە ايەل زورلىق- زومبىلىق قۇربانى بولعانى بەلگىلى بولدى.

قىلمىسقا نە سەبەپ بولعانى بەلگىسىز.

قوسىمشا تەرگەۋ ءۇشىن وڭتۇستىك گەسسەن پوليتسياسىنىڭ باس باسقارماسى «ەرلاحە» كىسى ءولتىرۋ ءبولىمىن قۇردى. تەرگەۋ امالدارىنا 35 تەن استام شەنەۋنىك تارتىلدى.

ادام دەنەسى تابىلعان اۋماقتا قوسىمشا ىزدەستىرۋ جۇمىستارى جۇرگىزىلمەك. تەرگەۋشىلەر قىلمىس ءمايىت تابىلعان جەردە جاسالماعان دەپ بولجاپ وتىر.

تەرگەۋشىلەر كىسى ءولتىرۋدى تەرگەۋمەن قاتار، ءىز- ءتۇزسىز جوعالعان ايگۇلدىڭ قايىن ەنەسىن، 49 جاستاعى ايەلدى ىزدەۋ امالدارىن جالعاستىرىپ جاتىر. ولاردىڭ ورنالاسقان جەرىن انىقتالىپ جاتىر.

ەكى ايەلدىڭ جوعالىپ كەتۋى مەن كىسى ءولتىرۋ اراسىنداعى بايلانىستىڭ قانشالىقتى ىقتيمال ەكەنى ازىرگە بەلگىسىز جانە تەرگەلىپ جاتىر.

«ەرلاحە» كىسى ءولتىرۋ ءبولىمى حالىقتان اقپارات الۋ ءۇشىن جەكە تەلەفون جەلىسىن قۇردى: 06151/969 53200، ازاماتتار ەسىمدەرىن اتاماي اقپارات بەرۋ ءۇشىن وسى نومىرگە حابارلاسا الادى. قازىرگى ۋاقىتتا تەرگەۋشىلەر 4-ماۋسىمنان بەرى قىلمىسقا قاتىسى بولۋى مۇمكىن كۋاگەرلەردى ىزدەستىرىپ جاتىر. تەرگەۋ جۇرگىزىلىپ جاتقاندىقتان، ازىرگە وسى باسپا ءسوز حابارلاماسىنان باسقا اقپارات بەرۋ مۇمكىن ەمەس. باسپاسوزبەن جۇمىس ىستەۋ دارمشتادت پروكۋراتۋراسىنىڭ قۇزىرەتىنە جاتادى»، - دەپ جاۋاپ بەردى وڭتۇستىك گەسسەن پوليتسياسى.

ەسكە سالا كەتسەك، گەرمانيادا ەكس- سۋديا ايگۇل سايلىبايەۆانىڭ زورلىق بەلگىلەرى بار ءمايىتى تابىلعانىن جازعان بولاتىنبىز.

سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۆەدومستۆونىڭ باسپا ءسوز ءماسليحاتىندا گەرمانيادا جوعالعان قازاقستان ازاماتىنىڭ تۋىستارى گەرمانياعا جەتكەنىن ءمالىم ەتتى.

بۇرىنعى سۋديانىڭ جوعالعانى تۋرالى ونىڭ اعاسى قانات سايلىبايەۆ حابارلادى.

ماتەريالدىڭ اعىلشىن تىلىندەگى نۇسقاسىن وسى جەردەن وقۋعا بولادى.