مەملەكەت مەنشىگىنە قايتارىلىپ جاتقان كومپانيانىڭ كەسىرىنەن 17 ەلدى مەكەن جارىقتان تاپشىلىق كورىپ وتىر
استانا. KAZINFORM - ماجىلىستە مەملەكەت مەنشىگىنە قايتارىلىپ جاتقان «شەت- ەنەرگو» جاۋاپكەرشىلىگى شەكتەۋلى سەرىكتەستىگىنىڭ اينالاسىنداعى جۇيەسىز جۇمىستان 17 ەلدى مەكەننىڭ تۇرعىندارى زارداپ شەگىپ وتىرعانى ءمالىم بولدى.
- ءبىز «شەت- ەنەرگو» ج ش س بويىنشا پروبلەمالاردى تالاي كوتەردىك. ول كومپانيا مەملەكەت قايتارىلاتىنى تۋرالى سوت شەشىمى شىققان. قازىرگى تاڭدا احۋال ەشقانداي دا وزگەرگەن جوق. 17 ەلدى مەكەن ەلەكتر قۋاتىنىڭ جوقتىعىنان قالاي زارداپ شەگىپ كەلسە، ءالى سولاي زارداپ شەگىپ وتىر. ۇنەمى جەل سوقسا، جاۋىن وتسە بولدى جارىق وشەدى. كەسىرىنەن تۇرعىنداردىڭ تەلەديدارى، توڭازىتقىشى كۇيىپ كەتكەن جايتتاردى ءوز كوزىمىزبەن كوردىك. بۇل ماسەلە قاشان العا جىلجيدى، - دەپ سۇرادى ارمان قالىقوۆ.
مينيستر ونداي پروبلەما بار ەكەنىن مويىندادى. ءبىراق كومپانيا تۇبەگەيلى مەملەكەت مەنشىگىنە وتكەنشە تۇرعىندار زارداپ شەگە بەرەتىنىن ايتتى.
- «شەت- ەنەرگو» بويىنشا ايتساق، پروبلەمانىڭ قالىپتاسقانىنا ەكى جىل بولدى- اۋ دەيمىن. تۇرعىنداردى ساپالى ەلەكتر ەنەرگياسىمەن قامتاماسىز ەتۋ ءىسى سول جەلىنىڭ تەحنيكالىق جاي-كۇيىنە بايلانىستى. «شتە- ەنەرگونىڭ» مەنشىك يەسى مونوپولياسىزداندىرۋ كوميسسياسىنىڭ نازارىنا ىلىككەنگە دەيىن دە بۇل مەكەمەنىڭ جاعدايى سىن كوتەرمەيتىن. يەسى جەلىنى جۇمىس ىستەيتىندەي جاعدايدا كۇتىپ تۇستاۋعا ەشقانداي قارجى سالماعان. سوندىقتان، ايتىپ وتىرعاندارىڭىز، ارينە راس. جەل سوقسا دا، جاڭبىر نە قار جاۋسا دا تۇرعىندار ەلەكتر قۋاتىنان اجىراتىلادى. جوندەۋ جۇرگىزۋ ءۇشىن جەلىنىڭ ناقتى يەسى بولۋى كەرەك. «شەت- ەنەرگو» مەملەكەت مەنشىگىنە بەرىلگەن كۇنى-اق بۇل ماسەلەنى بىردەن شەشەمىز. ماسەلەنى شەشۋ ءۇشىن جەلىنىڭ يەسى بولۋى كەرەك. بۇگىنگى تاڭدا ونداي يەسى جوق دەۋگە بولادى. قازىر سوت شەشىمىن كۇتىپ وتىرمىز. مەنشىك يەسىن سوت انىقتايدى. ونسىز جوندەۋ جۇمىستارىنا بيۋدجەت ءوتىنىمىن بەرە المايمىز، - دەدى ەرلان اقكەنجەنوۆ.
ايتا كەتۋ كەرەك، اتالعان كاسىپورىن قاراعاندى وبلىسىنىڭ شەت اۋدانىنداعى تۇرعىندارعا قىزمەت كورسەتىپ كەلگەن.
اۆتور
ەسىمجان ناقتىباي