ماۋلەن اشىمبايەۆ دەپۋتاتتارمەن بىرگە ا ە س سالۋ بويىنشا رەفەرەندۋمعا دايىندىق بارىسىن تالقىلادى

استانا. KAZINFORM - سەنات ءتوراعاسى ماۋلەن اشىمبايەۆ پالاتا بيۋروسىنىڭ وتىرىسىندا دەپۋتاتتارمەن بىرگە ا ە س سالۋعا قاتىستى رەفەرەندۋم اياسىندا اقپاراتتىق- ءتۇسىندىرۋ جۇمىستارىن ساپالى ۇيىمداستىرۋ بارىسىن تالقىلادى.

سونداي- اق جيىندا 19-قىركۇيەك كۇنى بولاتىن سەنات وتىرىسىنىڭ كۇن ءتارتىبى جانە پالاتانىڭ VIIІ شاقىرىلىمداعى پارلامەنتتىڭ Ⅲ سەسسياسىنا ارنالعان نەگىزگى ءىس- شارالار جوسپارى بەكىتىلدى. بۇل تۋرالى ق ر پارلامەنتى سەناتىنىڭ باسپا ءسوز قىزمەتى ءمالىم ەتتى.

ماۋلەن اشىمبايەۆ ءوز سوزىندە مەملەكەت باسشىسىنىڭ باستاماسىمەن 6-قازاندا ەلىمىزدە ا ە س سالۋعا قاتىستى رەسپۋبليكالىق رەفەرەندۋم وتەتىنىنە نازار اۋداردى. سونىڭ اياسىندا قۇرىلعان حالىق شتابىنىڭ قىزمەتىنە سەناتورلار دا بەلسەندى قاتىسىپ، وڭىرلەرگە بارادى. ولار حالىقپەن كەزدەسىپ، رەفەرەندۋمنىڭ ءمانىن جانە اتوم ەلەكتر ستانساسىن سالۋدىڭ ماڭىزىن ءتۇسىندىرۋ جۇمىستارىنا اتسالىسادى.

«سەناتورلار وسى اپتادا اەس سالۋعا قاتىستى رەسپۋبليكالىق رەفەرەندۋم وتكىزۋ اياسىندا اقپاراتتىق- ءتۇسىندىرۋ جۇمىستارىن جۇرگىزۋ ءۇشىن وڭىرلەرگە بارادى. قازىرگى تاڭدا وسى ماسەلە بويىنشا حالىق شتابى قۇرىلىپ، جۇمىسىن باستاپ كەتتى. ونىڭ قۇرامىندا سەنات دەپۋتاتتارى دا بار. وسىعان بايلانىستى ءبىز وڭىرلەرگە بارىپ، ازاماتتارمەن كەزدەسىپ، حالىققا اەس سالۋ ماسەلەسى جونىندە جان- جاقتى اقپارات بەرۋ جۇمىستارىنا قاتىسامىز»، - دەدى پالاتا ءتوراعاسى.

بەكىتىلگەن كۇن تارتىبىنە سايكەس سەناتتىڭ الداعى وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن تسيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردى ءبىرىنشى وقىلىمدا قارايدى.

زاڭداردىڭ ماقساتى - جول قوزعالىسىن ۇيىمداستىرۋ، كولىك قۇرالدارىنىڭ جەكەلەگەن تۇرلەرىنىڭ قوزعالىسىن باقىلاۋدى جۇزەگە اسىرۋ، بەلگىلەنگەن قوزعالىس جىلدامدىعىنان اسىپ كەتكەنى ءۇشىن اكىمشىلىك قۇقىق بۇزۋشىلىقتاردىڭ جاڭا قۇرامدارىن بەلگىلەۋ، سونداي-اق ءبىرقاتار ناقتىلاۋشى تۇزەتۋلەر ەنگىزۋ ماسەلەلەرى بويىنشا زاڭنامانى ودان ءارى جەتىلدىرۋ.

بولجامدى نورمالار سيفرلىق تەحنولوگيالاردى، تەحنيكالىق قۇرالداردى پايدالانۋ بولىگىندە اكىمشىلىك ءىس جۇرگىزۋ پروتسەسىن وڭتايلاندىرۋعا باعىتتالعان. موپەد جۇرگىزۋشىلەرىنە قويىلاتىن تالاپتاردى ەنگىزۋ جانە ولاردى مەحانيكالىق تەحنيكالىق قۇرالداردىڭ جۇرگىزۋشىلەرىمەن تەڭ دارەجەدە اكىمشىلىك جاۋاپكەرشىلىككە تارتۋ بولىگىندە «جول قوزعالىسى تۋرالى» زاڭنىڭ نورمالارىنا سايكەس كەلتىرۋ ماسەلەلەرى دە نازارعا الىندى.

سونىمەن قاتار بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن تۇراقتى كوميتەتتەرگە ءبولىنىپ بەرىلدى.