ماجىلىستە قازاقستان- قىتاي ىنتىماقتاستىعى ماسەلەلەرى تالقىلاندى
بۇگىن ماجىلىسكە قىتاي حالىق رەسپۋبليكاسى حالىق وكىلدەرىنىڭ بۇكىل قىتايلىق جينالىسى تۇراقتى كوميتەتى سىرتقى ىستەر كوميتەتى ءتوراعاسىنىڭ ورىنباسارى حاو پين كەلدى.
جيىنعا ۆيتسە- سپيكەر البەرت راۋ، حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان جانە كوميتەت مۇشەلەرى قاتىستى. دەلەگاتسيانى قارسى العان البەرت راۋ قازاقستان مەن قىتاي اراسىندا ديپلوماتيالىق قارىم- قاتىناس ورناعالى بەرى ەكىجاقتى ىنتىماقتاستىق بۇرىن- سوڭدى بولماعان بيىكتەرگە جەتكەنىن ايتتى. بيىل «ءبىر بەلدەۋ، ءبىر جول» باستاماسىنا ون جىل تولادى، ونىڭ اياسىندا دا قارىم- قاتىناستى نىعايتۋ ماقساتىمەن جاڭا مۇمكىندىكتەر اشىلۋدا. وسى ورايدا كوميتەت ءتورايىمى ەكى ەل زاڭ شىعارۋشى ورگاندارىنىڭ تۇراقتى بايلانىسى ەرەكشە ءرول اتقاراتىنىن جەتكىزدى.
- ءبىز ءۇشىن قاۋىپسىزدىگىمىز، ەگەمەندىگىمىز جانە ونى ساقتاۋ باستى ورىندا. وسى تۇرعىدا قىتاي حالقىنىڭ قولداۋى ماڭىزدى. ەكى ەل باسشىلارى ىنتىماقتاستىعىمىزدى، جان- جاقتى ستراتەگيالىق ارىپتەستىگىمىز بەن مىزعىماس دوستىعىمىزدى دامىتۋعا بار كۇشىن سالىپ جاتىر. ءوز كەزەگىندە قىتاي ءتوراعاسى شي جينپيڭنىڭ وتكەن جىلدىڭ قىركۇيەك ايىندا پاندەميا كەزىندەگى ءبىرىنشى شەت ەلدىك ساپارىن قازاقستانعا جاساۋى الەمدىك قاۋىمداستىققا ءبىزدىڭ ەلدەرىمىز اراسىنداعى سەرىكتەستىك پەن ءوزارا ءىس- قيمىلدىڭ جوعارى دەڭگەيىن كورسەتتى، - دەدى ا. قۇسپان.
حاو پين قىتاي تاراپىنىڭ ساياسي جانە ەكونوميكالىق رەفورمالار نەگىزىندە قازاقستاننىڭ دامۋىنا ريزا ەكەنىن اتاپ ءوتتى. اتاپ ايتقاندا، سالىق زاڭناماسىنا ەنگىزىلگەن وزگەرىستەر، ينۆەستيتسيالاردى قورعاۋ شارالارى جانە ت. ب.
- ەلدەرىمىزدىڭ زاڭ شىعارۋشى ورگاندارى ءبىر- بىرىمەن تاجىريبە الماسۋى قاجەت. سونىڭ ناتيجەسىندە ماسەلەلەردى شەشۋ جانە الدىن الۋ، ەل ەگەمەندىگىن بەكەم قورعاۋ جولىنداعى قۇقىقتىق قۇرالدار نىعايا تۇسەدى. قىتاي ەكىجاقتى ماسەلەلەر بويىنشا ءوزارا قولداۋدى ارتتىرۋعا دايىن» ، - دەدى قىتاي دەلەگاتسياسىنىڭ باسشىسى حاو پين.
باسقوسۋدا تاراپتار قازاقستان- قىتاي دوستىق قارىم- قاتىناسىن دامىتۋعا، ىنتىماقتاستىقتى ودان ءارى نىعايتۋعا كەلىستى.