لوپەس كونسەرتى: الماتى مەن استاناداعى قوناق ءۇي باعالارى 3-5 ەسەگە دەيىن قىمباتتاۋى مۇمكىن

الماتى. KAZINFORM - الەمگە تانىمال امەريكالىق ءانشى ءارى اكتريسا جەننيفەر لوپەس ءوزىنىڭ الەمدىك تۋرى اياسىندا قازاقستاندا ەكى كونسەرت وتكىزەدى: 1-تامىزدا - استانادا، 10-تامىزدا - الماتىدا. بۇل كونسەرتتەردىڭ ايىرماشىلىعى تۋرالى «استانا كونسەرت» كومپانياسىنىڭ پروديۋسەرى مالىك حاسەنوۆ ايتىپ بەردى.

ونىڭ ايتۋىنشا، جەننيفەر لوپەستىڭ كونسەرتىن وتكىزۋ قۇقىعى ءۇشىن رەسەي، ءباا جانە ەۋروپانىڭ پروديۋسەرلەرى دە تالاسقان. الايدا تاڭداۋ وسىعان دەيىن الەمدىك جۇلدىزداردىڭ كونسەرتىن ءساتتى ۇيىمداستىرعان قازاقستاندىق كومپانياعا ءتۇستى.

- ينفراقۇرىلىم جاعىنان ەشقانداي قيىندىق تۋىندامايدى دەپ ويلايمىز. قاۋىپسىزدىك ماسەلەسىنە قاتىستى ارنايى جيىن ءوتتى، ويتكەنى مۇنداي اۋقىمدى شارالارعا كوپ ادام جينالادى. ءبىز الماتى مەن استانا اكىمدىكتەرىمەن بىرلەسىپ بارلىق قاۋىپسىزدىك شاراسىن جان-جاقتى پىسىقتادىق. قوناقتار مەن ارتىستەردىڭ قاۋىپسىزدىگى ءبىرىنشى ورىندا بولادى، - دەدى پروديۋسەر.

الماتىدا كونسەرت وتەتىن كۇندەرى بايتۇرسىنوۆ، ساتپايەۆ كوشەلەرى مەن اباي داڭعىلى بويىندا ۋاقىتشا كولىك قوزعالىسىن شەكتەۋ جوسپارلانىپ وتىر. ستاديونعا كىرەتىن ەسىك ساتپايەۆ كوشەسى جاعىنان اشىلادى، ساعات 15:00 دەن باستاپ كورەرمەندەر كىرە الادى. قوناقتارعا ەرتەرەك كەلۋگە كەڭەس بەرىلەدى.

شارا باعدارلاماسىنا كەلسەك، ۇيىمداستىرۋشىلار كونسەرتتىڭ بارلىق قالادا بىردەي فورماتتا وتەتىنىن ايتتى.

- جەننيفەر لوپەس جالعىز كەلمەيدى - ونىمەن بىرگە 100 دەن استام ادامنان تۇراتىن كوماندا كەلەدى. بۇل - الەمدىك دەڭگەيدەگى شوۋ: بيشىلەر، پروديۋسەرلەر، مەنەدجەرلەر، جارىق سۋرەتشىلەرى، رەجيسسەرلەر جانە تەحنيكالىق ماماندار. لوپەستىڭ مانسابى ءبيشى رەتىندە باستالعانىن بىلەسىزدەر - سوندىقتان ول حورەوگرافياعا ەرەكشە ءمان بەرەدى. ءبىزدى بارلىق قالادا بىردەي قويىلاتىن كەرەمەت بي شوۋلارى كۇتەدى. قازاقستان مۇنداي دەڭگەيدەگى پەرفومانس كورمەگەن دەسە دە بولادى. ساحنادا 100 دەن استام ادام، ال باستى رولدە - سۋپەرجۇلدىز. باعدارلامادا - ءجيى كوستيۋم اۋىستىرۋ، ءاربىر ەكىنشى اننەن كەيىن جاڭا بەينەلەر بولادى، - دەپ ءبولىستى مالىك حاسەنوۆ.

الماتىداعى ورتالىق ستاديوندا كونسەرت الدىندا تەك جەڭىل جوندەۋ جۇمىستارى جۇرگىزىلەدى، كۇردەلى قۇرىلىس نەمەسە وزگەرىستەر قاراستىرىلماعان.

سونىمەن قاتار، حاسەنوۆ جەننيفەر لوپەسكە ارنايى مادەني باعدارلاما ۇسىنىلاتىنىن ايتتى.

- ءار قالادا ءبىز ارتىسكە بارۋعا بولاتىن مادەني ورىنداردىڭ ءتىزىمىن ۇسىنامىز. جەننيفەر لوپەس جەرگىلىكتى ونەرگە قىزىعۋشىلىق تانىتىپ، اشىق قارىم-قاتىناس ورناتۋعا دايىن. ول ناقتى قاي جەرلەرگە باراتىنى كونسەرتكە جاقىن كۇندەرى بەلگىلى بولادى. بۇل ونىڭ كوڭىل-كۇيىنە جانە فيزيكالىق جاعدايىنا بايلانىستى، - دەدى پروديۋسەر.

سونىمەن قاتار، ۇيىمداستىرۋشىلار لوپەس ۇلتتىق تاعامدارمەن تانىسقىسى كەلەتىنىن جەتكىزدى. انشىگە ۇلتتىق تاعام - ەت ۇسىنۋ جوسپاردا.

ايتا كەتەتىن جايت، كونسەرت وتەتىن كۇندەرى الماتى مەن استاناداعى قوناق ءۇي باعالارى 3- 5 ەسەگە دەيىن قىمباتتاۋى مۇمكىن. بۇل - الەمدىك تاجىريبەدە بار دۇنيە.

- ءبىزدىڭ بۇل جاعدايعا كوزقاراسىمىز وڭ. تۋريستەر كەلىپ دەمالادى، اقشا جۇمسايدى - بۇل ءوز كەزەگىندە قالانىڭ بيۋدجەتىنە سالىق تۇسىمدەرى ارقىلى پايدا اكەلەدى، - دەپ تۇيىندەدى ءسوزىن حاسەنوۆ.

وسىعان دەيىن الماتىعا جەننيفەر لوپەستىڭ كونسەرتىن تاماشالاۋعا 29 ەلدەن كورەرمەن كەلەتىنى تۋرالى جازعان بولاتىنبىز.

ەسكە سالايىق، بۇعان دەيىن پروديۋسەر مالىك حاسەنوۆ جەننيفەر لوپەس 10 تامىز كۇنى الماتىنىڭ ورتالىق ستاديونىندا جەكە كونسەرتىن وتكىزەتىنىن ايتقان ەدى.

كەيىن «قايرات» فۋتبول كلۋبى بۇل ءىس-شاراعا كەلىسىم بەرمەگەنىن حابارلادى.

ارتىنشا، الماتىدا 10-تامىزدا «قايرات» - «جەڭىس» ويىنى ەمەس، جەي لونىڭ كونسەرتى وتەتىنى بەلگىلى بولدى.

ايتا كەتەيىك، امەريكالىق اكتريسا جانە ءانشى جەننيفەر لوپەس تۋر اياسىندا قازاقستاندا ەكى كونسەرت وتكىزەدى.

اۆتور

الما مۇقانوۆا