ۇلتتىق بانك نەگە حالىققا ۇلتتىق قوردى باسقارۋ كورسەتكىشتەرى تۋرالى اشىق ەسەپ بەرمەي وتىر

استانا. KAZINFORM - ۇلتتىق بانكتىڭ حالىقارالىق اربيتراجداعى رەزونانستى ىستەرگە قاتىسۋى ۇلتتىق قور تۋرالى ەسەپتىلىكتىڭ اشىقتىعىنا توسقاۋىل بولىپ كەلگەن. بۇل تۋرالى ۇلتتىق بانك ءتوراعاسىنىڭ ورىنباسارى ەرۇلان جاماۋبايەۆ ءماجىلىستىڭ جالىپ وتىرىسىندا وسىنداي مالىمەت كەلتىردى.

- ۇلتتىق قوردىڭ باسقارۋدىڭ اشىقتىعىن الەمدىك ستاندارت بويىنشا جۇرگىزبەيدى، - دەپ سۇرادى ءماجىلىس دەپۋتاتى ەرلان ستامبەكوۆ.

ۇلتتىق بانك باسشىسىنىڭ ورىنباسارى مۇنىڭ سەبەبىن حالىقارالىق اربيتراجداعى ىستەرمەن بايلانىستىردى.

- ۇلتتىق بانك - بۇل قوردىڭ سەنىمگەرلىك باسقارۋشىسى. سوندىقتان ۇلتتىق بانك تاراپىنان بۇكىل ەسەپ جىل سايىن ۇكىمەتكە بەرىلىپ وتىرادى. ول ەسەپتەردى قارجى مينيسترلىگى جيناقتاپ، پرەزيدەنتتىڭ جارلىعىمەن بەكىتەدى. وسىدان كەيىن مىندەتتى تۇردە جاريالانۋعا ءتيىس. دەگەنمەن دە سوڭعى جىلدارى بۇل اقپارات تولىعىمەن جاريالانعان جوق. سەبەبى، وزدەرىڭىز بىلەسىزدەر، حالىقارالىق اربيتراجدا رەزونانستى ىستەر بولدى. بيىلدان باستاپ، جاقىن ارادا جارلىق شىعادى. سودان كەيىن ەسەپتىلىك تولىعىمەن جاريالانادى. ول جەردە ءسىز ايتقان ينۆەستيتسيالىق كورسەتكىشتەر دە، مەملەكەتتەر بولىنىسىندەگى مالىمەتتەر، تابىستىلىق پەن ۆاليۋتاعا قاتىستى بۇكىل اقپارات بولادى، - دەدى ول.

ەرۇرلان جاماۋبايەۆ ۇلتتىق بانك بۇل تۇرعىداعى ەسەپتەرىن ءۇشىن اي سايىن جانە توقسان سايىن ءوز سايتىندا جاريالاۋدى جوسپارلاپ وتىرعاندارىن ايتتى.

- قازىر وسى ەسەپتىلىكتىڭ فورمالارى دايىندالىپ جاتىر. سىرتقى باقىلاۋعا كەلسەك، ۇلتتىق قورعا قاتىستى باقىلاۋ وتە ەرەكشە. ۇلتتىق قوردى باسقارۋعا قاتىستى ارنايى كەڭەس بار وسى قوردىڭ قاراجاتىنىڭ ءتيىمدى يگەرىلۋىن باقىلايتىن ارنايى كوميسسيا بار. سوندىقتان ءدال قازىر ارنايى ءبىر ورگاننىڭ قۇرىلۋىن جوسپارلاپ وتىرعان جوقپىز، - دەدى ۇلتتىق بانك ءتوراعاسىنىڭ ورىنباسارى.

ەسكە سالساق، 2024 -جىلدىڭ اياعىندا ۇلتتىق قور مەن ادىلەت مينيسترلىگى بىرنەشە جىلعا سوزىلعان ستاتي ءىسى قازاقستاننىڭ مۇددەسىنە ساي اياقتالعانىن مالىمدەگەن بولاتىن. ستاتي ءىسىن رەتتەۋ ۇلتتىق قورعا قالاي اسەر ەتكەنى تۋرالى جازعان ەدىك.