- قايتالاپ ايتامىن: مەملەكەتتىك كومەك شىن مۇقتاج ادامدارعا عانا بەرىلۋگە ءتيىس. ۇكىمەتتىڭ الدىندا تۇرعان باستى مىندەتتىڭ ءبىرى - وسى. جالپى، بۇل سالادا وزەكتى ماسەلەلەر از ەمەس، سوعان بايلانىستى ۇكىمەت ءوز ۇسىنىسىن، شەشىمدەرىن بەرىپ جاتىر. قازىر قوعامدا وسى ماسەلەلەر بويىنشا قىزۋ تالقى ءجۇرىپ جاتىر. ازاماتتار وزدەرىن الاڭداتقان ماسەلەلەردى اشىق ايتىپ جاتىر. سوندىقتان بۇل كۇردەلى ماسەلەنى «وگىزدى ولتىرمەي، اربانى سىندىرماي»، بايىپپەن، سالماقتى كوزقاراسپەن شەشۋ قاجەت. ارتىق قىلامىن دەپ، تىرتىق قىلۋعا مۇلدەم بولمايدى، - دەدى ول.
مەملەكەت باسشىسىنىڭ سوزىنشە، كەز كەلگەن رەفورما تەرەڭ ساراپتالىپ، مۇقيات زەرتتەلىپ، ازاماتتاردىڭ جاعدايىن مەيلىنشە ەسكەرە وتىرىپ جۇرگىزىلۋگە ءتيىس.
- الەۋمەتتىك كومەكتىڭ جاڭا تاسىلدەرىن، سوعان قاتىستى اقپاراتتىق جۇيەلەردىڭ قىزمەتىن الدىن الا مۇقيات تەكسەرىستەن وتكىزۋ قاجەت. ەڭ دۇرىسى، ونداي جوبالاردى اۋەلى پيلوتتىق رەجيمدە ىسكە قوسىپ، تيىمدىلىگى راستالعان سوڭ عانا كەڭ اۋقىمدا قولدانۋ كەرەك. تۇپتەپ كەلگەندە، الەۋمەتتىك مەملەكەت دەگەنىمىز - ازاماتتاردى الەۋمەتتىك تولەمدەرگە تاۋەلدى ەتۋ ەمەس. بۇل ەڭ الدىمەن، حالىقتىڭ تۇرمىس ساپاسىن، ءال-اۋقاتىن ارتتىرۋ دەگەن ءسوز. سوندىقتان ءبىز ادام كاپيتالىنىڭ ساپاسىن جاقسارتۋعا جانە وسكەلەڭ ۇرپاقتىڭ جان-جاقتى دامۋىنا قولايلى جاعداي جاساۋعا باسا ءمان بەرىپ وتىرمىز، - دەدى ول.
مەملەكەت باسشىسى قاسىم-جومارت توقايەۆ الەۋمەتتىك تولەمدەردىڭ كوبەيۋىن مەملەكەتتىك باسقارۋداعى السىزدىكتىڭ بەلگىسى دەپ اتادى.
ونىڭ ايتۋىنشا، «حالىقتىق قۇرىلىس» باستاماسىنىڭ قاجەتتىلىگى تەك ەكونوميكالىق مىندەتتەرمەن بايلانىستى ەمەس. مۇندا جىلدار بويى قوردالانعان قۇرىلىمدىق ماسەلەلەر دە بار.
- حالىق سانىنىڭ ارتۋى مەن ەل ىشىندەگى كوشى-قون الەۋمەتتىك نىساندارعا تۇسەتىن جۇكتەمەنى ارتتىرىپ وتىر. باسىم كوپشىلىگى ونسىز دا شەگىنە جەتكەنشە جۇمىس ىستەپ تۇر. بۇل ماسەلە كەشە عانا پايدا بولعان جوق، - دەپ اتاپ ءوتتى پرەزيدەنت.
پرەزيدەنت ونداعان جىلدار بويى مەملەكەتتىك باسقارۋداعى قاتەلىكتەر مەن كەمشىلىكتەردى جاسىرۋ ءۇشىن الەۋمەتتىك كومەكتى كوبەيتىپ، حالىقتىڭ كوڭىلىن تابۋعا تىرىسۋ ءجيى كەزدەسكەنىن ايتتى.
سونىڭ سالدارىنان مەملەكەتتىك قارجى ماقساتسىز جۇمسالدى: كومەككە مۇقتاج ەمەس، تۇرمىسى جاقسى وتباسىلار دا ءتۇرلى تولەمدەر الىپ وتىردى. ال قولجەتىمدى مەكتەپتەر مەن اۋرۋحانالار تاپشىلىعى ۇدەي ءتۇستى.
- مۇنداي ساياسات قوعامدا مەملەكەتتىڭ كومەگىنە ارقا سۇيەيتىن ماسىلدىق كوزقاراستىڭ قالىپتاسۋىنا ىقپال ەتتى. سونىمەن قاتار الەۋمەتتىك قامسىزداندىرۋ جۇيەسىندە زاڭسىز پايدا تابۋ مەن جەمقورلىققا جول اشتى. نەگىزسىز جاردەماقىلار مەن تولەمدەردىڭ شامادان تىس كوبەيۋى مەملەكەتتىك باسقارۋ جۇيەسىنىڭ ءالى دە جەتىلمەگەنىن، ءتىپتى السىزدىگىن كورسەتەدى. بۇل - ۇلتتىڭ جارقىن بولاشاعىن الدىن الا ويلاستىرىپ، ۇزاق مەرزىمدى جوسپار قۇرۋعا جەتكىلىكتى ءمان بەرىلمەگەنىنىڭ بەلگىسى، - دەدى قاسىم-جومارت توقايەۆ.
ونىڭ ايتۋىنشا، بيۋدجەت قارجىسى ەسەبىنەن حالىققا كومەكتەسكەندەي كورىنۋ - بارىپ تۇرعان پوپۋليزم.
مۇنداي جالعان جاناشىرلىقتىڭ تاساسىندا حالىقتىڭ مۇددەسىنە جانە ەلدىڭ تۇراقتى دامۋىنا نۇقسان كەلتىرەتىن ءتۇرلى ايلا-شارعى جاتۋى مۇمكىن.
- بۇل - تەك بۇگىنگى كۇننىڭ قامىن ويلاپ، بولاشاقتى باعامداي المايتىن، مەملەكەتتىك مۇددەنى كەڭ تۇرعىدان تۇسىنبەيتىن ادامداردىڭ كوزقاراسى. سوندىقتان الەۋمەتتىك ساياساتتى تۇبەگەيلى قايتا قاراپ، ونى ۋاقىتشا ماسەلەلەردى شەشۋگە ەمەس، ۇزاق مەرزىمدى ستراتەگيالىق ماقساتتارعا باعىتتاۋ ماڭىزدى، - دەدى مەملەكەت باسشىسى.
بۇعان دەيىن پرەزيدەنت قازاقستاننىڭ ترانزيتتىك الەۋەتىن سىنعا العان ەدى.
اۆتورلار
ايجان سەرىكجان قىزى