پرەزيدەنتتىڭ پايىمداۋىنشا، جوعارى دەڭگەيدەگى قارقىندى ىقپالداستىق ورتاق باسىمدىقتاردى جانە ەكىجاقتى ىنتىماقتاستىقتىڭ كۇن ءتارتىبىن ىلگەرىلەتۋگە قولايلى جاعداي تۋعىزادى.
- ءبىز يوردانيامەن سان قىرلى بايلانىستاردى جوعارى باعالايمىز. ەلىمىز ءسىزدى بۇكىل الەمدە بەدەلى بيىك كورنەكتى ءارى كورەگەن كوشباسشى رەتىندە بىلەدى. ءسىزدىڭ تەگەۋرىندى، بايىپتى باسشىلىعىڭىزبەن يوردانيا بەيبىتشىلىك پەن تۇراقتىلىقتىڭ، ابىروي مەن ادىلەتتىڭ مەكەنى، سونداي- اق قارقىندى دامۋ ۇستىندەگى يننوۆاتسيا مەن ورنىقتى ءوسىم ورتالىعى رەتىندە تانىلدى. الەمدىك قوعامداستىق ءسىزدىڭ وي-پىكىرىڭىزگە قۇلاق اسادى، جاھاندىق ديالوگتى وربىتۋگە ەلەۋلى تۇردە ىقپال ەتىپ كەلەسىز. «اقابا پروتسەسى» باستاماسى ءسىزدىڭ حالىقارالىق قاۋىپسىزدىكتى كۇشەيتۋگە ءاردايىم بەيىل ەكەنىڭىزدى انىق كورسەتەدى. ەرتەڭ استانادا يوردانيامەن بىرلەسىپ وسى باستاما اياسىنداعى كەزەكتى ءسامميتتى وتكىزەمىز. بۇل - ءبىز ءۇشىن ۇلكەن مارتەبە، - دەدى مەملەكەت باسشىسى.
قاسىم-جومارت توقايەۆ كورولدىڭ دايەكتى قولداۋىنىڭ ارقاسىندا ەكىجاقتى ىنتىماقتاستىق قازىردىڭ وزىندە ايتارلىقتاي ناتيجەلەرگە ۇلاسقانىنا نازار اۋداردى.
- بۇگىندە سەرىكتەستىگىمىز ەكى مەملەكەتتىڭ دە زور الەۋەتىن اشا وتىرىپ، جاڭا، پەرسپەكتيۆتى باعىتتاردا بەلسەندى تۇردە دامىپ كەلەدى. بىلتىر ۇيىمداستىرىلعان ءوزارا ساپارلار بۇعان تىڭ سەرپىن بەردى. وسى وڭ قارقىندى ساقتاپ، ىقپالداستىقتى بۇدان دا جوعارى دەڭگەيگە جەتكىزۋگە نيەتتىمىن، - دەدى پرەزيدەنت.
مەملەكەت باسشىسى كورول II ابداللانى قازاقستاننىڭ جاقىن دوسى سانايتىنىن ايتتى.
- قازاقستان مەن يوردانيانىڭ اراسىنداعى دوستىق بايلانىستاردى نىعايتۋعا قوسقان ەلەۋلى ۇلەسىڭىز ءۇشىن سىزگە Al-Farabi وردەنىن تابىستاۋ - مەن ءۇشىن زور مارتەبە. بۇل جوعارى ناگرادانىڭ اتاۋى شىعىستىڭ ۇلى ويشىلىنىڭ قۇرمەتىنە قويىلدى. ءال-فارابيدىڭ مۇراسى قانشاما بۋىندى قاناتتاندىرىپ، ادامگەرشىلىك شامشىراعى بولىپ كەلەدى. ول ساياسي وي-سانانىڭ، عىلىم مەن ادەبيەتتىڭ قالىپتاسۋىندا باعا جەتپەس تاريحي ءرول اتقاردى. ءال-فارابي كۇللى اراب الەمىنىڭ جۇرەگىنە جول تاپقان اقىلدىڭ كەنى ىسپەتتەس. ونىڭ ەشقاشان وزەكتىلىگىن جويمايتىن دانالىق، ۇيلەسىم جانە بىرلىك تۋرالى ۇلاعاتتى ويلارى - مادەنيەتتەرىمىزدىڭ ورتاق قازىناسى. ءبىز ءسىزدىڭ وسىناۋ ىزگى قۇندىلىقتاردى دارىپتەۋگە قوسقان ۇلەسىڭىزدى جوعارى باعالايمىز. اتالعان مارتەبەلى ماراپاتتىڭ العاشقى يەگەرى بولىپ وتىرسىز. مۇنى تاريحي ۋاقيعا دەپ سانايمىز. وسى جوعارى ناگرادانى قازاقستاننىڭ سىزگە دەگەن رياسىز قۇرمەتىنىڭ بەلگىسى رەتىندە قابىل الىڭىز، - دەدى قاسىم-جومارت توقايەۆ.
بۇعان دەيىن پرەزيدەنت قاسىم-جومارت توقايەۆ اقابا پروتسەسىن جوعارى باعالايتىنىن جانە الداعى سەسسيانىڭ جاساندى ينتەللەكت سالاسىنداعى قاۋىپسىزدىك تاقىرىبىنا ارنالاتىنىن حابارلاعان ەدى.
بۇگىن پرەزيدەنت قاسىم-جومارت توقايەۆتىڭ شاقىرۋىمەن قازاقستانعا يوردان حاشيميت كورولدىگىنىڭ كورولى II ابداللا بەن ءال-حۋسەين رەسمي ساپارمەن كەلدى. استانا اۋەجايىندا يوردانيا كورولىن مەملەكەت باسشىسىنىڭ ءوزى كۇتىپ الدى.
سونداي-اق اقوردادا قازاقستان پرەزيدەنتى قاسىم-جومارت توقايەۆ پەن يوردانيا كورولى II ابداللا بەن ءال-حۋسەين كەلىسسوز جۇرگىزدى.