پرەزيدەنت قاسىم-جومارت توقايەۆ تاجىكستان پرەزيدەنتى ەمومالي راحمونعا ءىلتيپات ءبىلدىرىپ، بۇل ساپار ەكى ەل اراسىنداعى ەرەكشە قۇرمەت پەن شىنايى دوستىقتىڭ كورىنىسى ەكەنىن اتاپ ءوتتى.
— بۇگىن ءبىز باۋىرلاس مەملەكەتتەرىمىزدىڭ ستراتەگيالىق سەرىكتەستىگى مەن وداقتاستىعى جونىندە تولىق نەگىزدە ايتا الامىز. ەكىجاقتى ىنتىماقتاستىقتا قانداي دا ءبىر ماسەلە جوق. كوپجاقتى بايلانىستارىمىزدى ودان ءارى ىلگەرىلەتۋ ماقساتىندا قاراستىرىپ، شەشىمىن تابۋدى قاجەت ەتەتىن جايتتار بار. جاڭا مۇمكىندىكتەرگە جول اشۋ، ءوزارا ءتيىمدى جوبالاردى ىسكە اسىرۋ جانە قول جەتكىزىلگەن ۋاعدالاستىقتاردى ورىنداۋ تۇرعىسىنان تەك العا قاراي قادام باسىپ كەلەمىز. قازاقتار تاريحى باي، ءتول مادەنيەتى مەن رۋحاني مۇراسى بايتاق كونە ۇلت رەتىندە تاجىك حالقىنا قۇرمەتپەن قارايدى. ءسىزدىڭ پاراساتتى ءارى كورەگەن ساياساتىڭىزدىڭ ارقاسىندا تاجىكستان كوپتەگەن سالادا اۋقىمدى رەفورمالار جۇرگىزىپ، تاڭعالارلىق تابىستارعا قول جەتكىزدى. وسى وزگەرىستەردىڭ ناتيجەسى ەكونوميكانىڭ ورنىقتى وسىمىنەن، حالىقتىڭ ءال-اۋقاتىنىڭ ارتۋىنان كورىنىس تاۋىپ وتىر، - دەدى قازاقستان پرەزيدەنتى.
قاسىم-جومارت توقايەۆ بارلىق باعىتتا وڭ ديناميكا كورسەتىپ كەلە جاتقان قازاق-تاجىك قارىم-قاتىناسىنىڭ دامۋ دەڭگەيىن جوعارى باعالادى.
— ەلدەرىمىزدىڭ ۇكىمەتتەرى ۋاعدالاستىقتاردى تولىعىمەن جۇزەگە اسىرۋ ءۇشىن بەلسەندى جۇمىس ىستەپ جاتقانىن اتاپ وتكەن ءجون. قابىلدانعان شارالاردىڭ ارقاسىندا تاسىمالداناتىن تاۋار تۇرلەرى كوبەيىپ، ءتۇرلى ءونىم كولەمى ارتتى. تەمىرجولمەن جەتكىزىلەتىن ەكسپورت- يمپورت جۇگى دە ۇلعايىپ كەلەدى. بيزنەس دەڭگەيىندەگى بايلانىستار جانداندى. بيزنەس-فورۋم، ارنايى ساۋدا ميسسيالارىنىڭ قورىتىندىسى بويىنشا قول جەتكىزىلگەن كوممەرتسيالىق ۋاعدالاستىقتار جوسپارلى تۇردە ىسكە اسىرىلۋدا. بۇل رەتتە ەلدەرىمىزدىڭ جىل سايىنعى تاۋار اينالىمى تۇراقتى تۇردە 1 ميلليارد دوللاردان اسادى. وسىنىڭ ەسەبىنەن قازاقستان ۇدايى تاجىكستاننىڭ ەڭ ءىرى ساۋدا سەرىكتەستەرىنىڭ ۇشتىگىنە ەنىپ وتىر، — دەدى مەملەكەت باسشىسى.
پرەزيدەنتتىڭ ايتۋىنشا، ەكى ەلدىڭ مادەني-گۋمانيتارلىق بايلانىستارى دا دايەكتى تۇردە كەڭەيۋدە.
— مادەنيەت كۇندەرى الما-كەزەك وتكىزىلىپ، كورنەكتى تۇلعالاردىڭ ەسكەرتكىشتەرى اشىلدى. دۋشانبەدە اباي بيۋستى، استانادا يبن سينا ەسكەرتكىشى بوي كوتەردى. ءبىلىم بەرۋ مەن جاستار ساياساتى سالالارىنداعى ىقپالداستىق جوعارى دەڭگەيدە. جاستار، عالىمدار مەن زيالىلار فورۋمدارى ءجيى وتكىزىلەدى. سوندىقتان ءوزارا ىنتىماقتاستىقتا قول جەتكىزگەن ناتيجەلەر ءۇشىن ماقتانۋعا دا، قۋانۋعا دا تولىق نەگىز بار. بۇگىن وتە ماڭىزدى ءىس-شاراعا — استانا قالاسىندا تاجىكستان ەلشىلىگىنىڭ جاڭا عيماراتىنىڭ اشىلۋىنا قاتىسامىز. بۇل ءبىر عيماراتتان عانا تۇرمايدى، ونى كەشەن دەۋگە بولادى. مۇنىڭ ءبارى تاجىكستاننىڭ ەلىمىزدە تۇراقتى وكىلدىگى بولاتىنىن ايعاقتايدى. البەتتە، بۇدان باۋىرلاستىق بايلانىستارىمىزدىڭ بىرەگەي سيپاتىن كورەمىز، - دەدى قاسىم-جومارت توقايەۆ.
ايتا كەتەيىك، 5-7 -قاراشا كۇندەرى مەملەكەت باسشىسىنىڭ شاقىرۋىمەن ەلىمىزگە تاجىكستان پرەزيدەنتى ەمومالي راحموننىڭ رەسمي ساپارى ءوتىپ جاتىر.
بۇعان دەيىن قاسىم-جومارت توقايەۆ تاجىكستان پرەزيدەنتىن ەلوردا اۋەجايىندا قارسى العان ەدى.
سونداي-اق ە. راحمون استانادا وتكەن اقابا پروتسەسى سامميتىنە قاتىستى. بيىلعى سامميت «جاساندى ينتەللەكت سالاسىنداعى قاۋىپسىزدىك» تاقىرىبىنا ارنالعان.