مەملەكەت باسشىسى قۇتقارۋشىلاردى «بەيبىت كۇننىڭ باتىرلارى» دەپ اتادى

مەملەكەت باسشىسى سالتاناتتى جيىنعا قاتىسۋشىلاردى قۇتقارۋشى كۇنىمەن قۇتتىقتاپ، توتەنشە جاعداي سالاسىنىڭ قىزمەتشىلەرىنە ريزاشىلىعىن ءبىلدىردى.

— «قۇتقارۋشى» ءسوزىنىڭ ماعىناسى — وتە كەڭ ءارى تەرەڭ. «قۇتقارۋ» - ءاردايىم يگى ءىس جاساۋمەن، جاقسىلىق ىستەۋمەن بايلانىستى ۇعىم. ادام ومىرىنە اراشا ءتۇسۋ، ازاماتتاردى قاۋىپ-قاتەردەن قورعاۋ، وقىس جاعدايعا تاپ بولعان ادامدارعا قول ۇشىن سوزۋ، ءتىپتى، ولاردىڭ قورقىنىشىن باسىپ، جۇباتۋ ءسوز ايتۋ — وسىنىڭ ءبارى دە ناعىز قۇتقارۋشىنىڭ بويىنان تابىلاتىن اسىل قاسيەتتەر. سوندىقتان حالقىمىز سىزدەردى، ياعني ەلىمىزدىڭ بارشا قۇتقارۋشى ماماندارىن بەيبىت كۇننىڭ باتىرلارى دەپ اتايدى. بۇل — شىن مانىندە ادىلەتتى باعا. ارينە، قۇتقارۋشى بولۋ كوپتىڭ العىسىنا بولەيتىن ابىرويلى جانە مارتەبەلى قىزمەت ەكەنى ءسوزسىز. الايدا ازاماتتىق قورعانىس سالاسىندا ادال ەڭبەك ەتۋ ءبارىنىڭ قولىنان كەلە بەرمەيتىن شارۋا ەكەنىن دە ۇمىتپاۋىمىز قاجەت. باتىل، قايسار، شيراق ءارى وجەت بولۋ — ءوز الدىنا وتە ماڭىزدى تالاپ ەكەنى داۋسىز. ءبىراق قۇتقارۋشى ەڭ الدىمەن ەلگە جانى اشيتىن وتانشىل ازامات جانە بىلىكتى مامان بولۋعا ءتيىس. وسىنداي كۇردەلى جۇمىستى رۋحى مىقتى، جاۋاپكەرشىلىگى جوعارى، جۇرەكتى ادامدار عانا تاڭدايدى، — دەدى پرەزيدەنت.

قاسىم-جومارت توقايەۆ توتەنشە جاعداي سالاسىنىڭ قىزمەتشىلەرى ەشقانداي قاۋىپ-قاتەردەن تايسالمايتىن، سىن-ساعاتتا جەدەل شەشىم قابىلداي الاتىن، ارنايى دايارلىقتان وتكەن ناعىز كاسىبي ماماندار دەپ ەسەپتەيتىنىن ايتتى.

— قۇتقارۋشىلاردىڭ ەڭبەگى قاشاندا ەلىمىزدىڭ كوز الدىندا. سىزدەر كۇن سايىن تاۋەكەلگە بارىپ، كاسىبي مىندەت پەن جاۋاپكەرشىلىكتى بارىنەن بيىك قوياسىزدار. باسقاشا ايتقاندا، وت پەن سۋدىڭ ورتاسىندا جۇرەسىزدەر. توتەنشە جاعدايعا تۇسكەن ادامدارعا جاردەم بەرىپ، ولاردى قيىندىقتان قۇتقارۋ ءۇشىن قاجىماي قىزمەت ەتەسىزدەر. قۇتقارۋشىلار كەز كەلگەن توتەنشە جاعدايدا ءبىرىنشى بولىپ كومەككە ۇمتىلادى. ولار وزگەنىڭ ءومىرىن ساقتاۋ ءۇشىن، ءوز ءومىرىن قاتەرگە تىگەدى. بۇل — ناعىز قۇتقارۋشىعا ءتان باتىرلىق. مەن مەملەكەت باسشىسى رەتىندە سىزدەردىڭ ەرەن ەڭبەكتەرىڭىز قوعامىمىزدىڭ ايرىقشا سىي-قۇرمەتىنە لايىقتى دەپ سانايمىن، — دەدى پرەزيدەنت.