مەملەكەت باسشىسى: قازاقستانعا كەلەتىن مامانداردىڭ شىققان تەگىنەن قابىلەتى ماڭىزدى

بۇدان بولەك، پرەزيدەنت مەديتسينا مەن فارماتسيەۆتيكا سالالارىنداعى سەرىكتەستىكتى نىعايتۋدىڭ ماڭىزىنا نازار اۋداردى.

- ءبىز IBA كومپانياسىمەن ىنتىماقتاستىقتى قۇپتايمىز. بۇل قازاقستانداعى پروتوندى تەراپياعا قولجەتىمدىلىكتى ارتتىرادى. سالا ماماندارىن دايارلاۋعا جانە كلينيكالىق زەرتتەۋلەر جۇرگىزۋگە قاتىستى بىرلەسكەن باعدارلاما ونكولوگيالىق اۋرۋلاردى ەمدەۋدىڭ وزىق تاسىلدەرى بويىنشا قۇزىرەتىمىزدى نىعايتۋعا مۇمكىندىك بەرەدى. بەلگيانىڭ فارماتسيەۆتيكالىق كومپانيالارىن ەلىمىزدە ءوندىرىس ورىندارىن اشۋعا شاقىرامىز، - دەدى قاسىم-جومارت توقايەۆ.

سونداي-اق مەملەكەت باسشىسى قازاقستان ءوز ازاماتتارىمەن بىرگە جۇمىس ىستەي الاتىن وزىق ويلى ءارى ىسكەر تۇلعالاردى تارتۋعا مۇددەلى ەكەنىن ايتتى.

- مۇنداي ماماندار ەلىمىزگە نەعۇرلىم كوپ كەلسە، سوعۇرلىم بارشامىزعا پايدالى بولار ەدى. ويتكەنى وسى ارقىلى ادامدار اراسىنداعى قارىم-قاتىناس جاقسارىپ، كاسىبي بايلانىس جاندانا تۇسەدى. حالقىمىز وسىنداي ارالاس-قۇرالاستىقتى باعالايدى. قازاقستان پرەزيدەنتى رەتىندە مەن ءۇشىن ەلىمىزگە كەلەتىن ازاماتتاردىڭ شىققان تەگى ەمەس، ەڭ الدىمەن، قارىم-قابىلەتى مەن اقىل-ويى ماڭىزدى، - دەدى پرەزيدەنت.

بۇدان بۇرىن قاسىم-جومارت توقايەۆ قازاقستان-بەلگيا ىسكەرلىك كەڭەسىنىڭ ءتورتىنشى وتىرىسىندا ەنەرگەتيكا جانە مۇناي حيمياسى سالالارىنداعى ىنتىماقتاستىق پەرسپەكتيۆاسىنا باسا نازار اۋدارعانىن جازعانبىز.