پرەزيدەنتكە دومنا پەشىندە بالقىتىلعان شويىننىڭ قالاي قۇرىشقا اينالاتىنى، سودان كەيىن ۇزدىكسىز قۇيۋ قوندىرعىسىنا جانە ودان ءارى يلەمدەۋگە جىبەرىلەتىنى كورسەتىلدى.
Qarmet كومپانياسى 2024 -جىلى № 1 جانە № 2 كونۆەرتەرلەردە كۇردەلى جوندەۋ جۇرگىزىپ، كورپۋستاردى تولىق اۋىستىردى جانە اناعۇرلىم زاماناۋي كونسترۋكسيالار ورناتتى.
جاڭعىرتۋ جۇمىستارى شىعارىلاتىن ءونىم تۇرلەرىن كوبەيتىپ، قورىتىلعان بولات كولەمىن ۇلعايتۋعا، قۇرال-جابدىقتاردىڭ سەنىمدىلىگىن ارتتىرۋعا مۇمكىندىك بەرەدى. سونىمەن قاتار سەحتاعى ءبىرقاتار تەحنولوگيالىق ۇدەرىستى تابيعي گازعا كوشىرۋ ءىسى جالعاسىپ جاتىر.
Qarmet ديرەكتورلار كەڭەسىنىڭ ءتوراعاسى اندرەي لاۆرەنتيەۆ مەملەكەت باسشىسىنا وندىرىستىك كورسەتكىشتەر ءوسىمى جانە ينۆەستيتسيالىق باعدارلامالاردى جۇزەگە اسىرۋ بارىسى تۋرالى ەسەپ بەردى.
2026 -جىلدىڭ قورىتىندىسى بويىنشا 4 ميلليون توننا بولات، 3,6 ميلليون توننا كومىر جانە 3,9 ميلليون توننا تەمىر رۋداسى كونسەنتراتىن ءوندىرۋ جوسپارلانىپ وتىر.
كومپانيا جۇمىسى باستالعاننان بەرى ينۆەستيتسيا كولەمى 2,7 ميللياردتان اسا دوللاردى قۇرادى. بۇل قاراجات ءوندىرىس قۋاتىن جاڭعىرتۋعا جانە جاڭا ونەركاسىپتىك نىسان سالۋعا باعىتتالدى.
Qarmet - ەلىمىزدەگى تولىق وندىرىستىك سيكلگە يە ەڭ ءىرى تاۋ-كەن- مەتاللۋرگيالىق كومپانياسى. ورتالىق ازياداعى ءوزىنىڭ كومىر، تەمىر رۋداسى كەنىشتەرى جانە ەنەرگەتيكالىق بازاسى بار، ينتەگراتسيالانعان تاۋ-كەن- مەتاللۋرگيالىق كەشەن. كومپانيادا شامامەن 35 مىڭ ەڭبەككەر، سونىڭ ىشىندە 14 مىڭنان استام ادام تەمىرتاۋداعى مەتاللۋرگيا كومبيناتىندا جۇمىس ىستەيدى.