مەملەكەت باسشىسى مارتەبەلى مەيماندارعا ءىلتيپات ءبىلدىرىپ، ەلىمىزگە اۋستريا مينيسترلەرىمەن بىرگە ىسكەرلىك ورتا وكىلدەرىنەن قۇرالعان دەلەگاتسيانىڭ كەلۋى ماڭىزدى ەكەنىن اتاپ ءوتتى.
- اۋستريا ۇكىمەتىنىڭ ەكى بىردەي ءمينيسترىنىڭ ەلىمىزگە ساپارمەن كەلۋى ءوزارا ىنتىماقتاستىقتى نىعايتۋ تۇرعىسىنان وتە ماڭىزدى. اۋستريا - قازاقستاننىڭ سەنىمدى ءارى بۇرىننان كەلە جاتقان ستراتەگيالىق سەرىكتەسى. سىزدەردىڭ ەكونوميكامىزعا قۇيعان ينۆەستيتسيالارىڭىز 3 ميلليارد دوللاردان استى، سونداي-اق ساۋدا اينالىمىنىڭ كولەمى ۇلعايىپ كەلەدى. بۇل وتە جاقسى ءۇردىس. ءبىز بىرىككەن ۇلتتار ۇيىمى جانە ەقىۇ اياسىندا تىعىز قارىم-قاتىناس ورناتتىق. مۇنداي بايلانىستار الداعى ۋاقىتتا دا جالعاسا بەرەدى دەپ ويلايمىن. اۋستريا - كوپتەگەن باعىتتا قارقىندى دامىعان ەل. سوندىقتان قول جەتكىزىلگەن ىنتىماقتاستىق دەڭگەيىن جوعارى باعالايمىز. سىزدەر ءۇشىن قازاقستان ايماقتاعى ماڭىزدى ءرولىن ساقتاپ قالادى دەگەن سەنىمدەمىز. قازىرگى تاڭدا اۋستريانىڭ ورتالىق ازيا مەملەكەتتەرىمەن اراداعى ساۋدا قاتىناستارىندا قازاقستاننىڭ ۇلەسى 80 پايىزدان جوعارى، - دەدى قاسىم-جومارت توقايەۆ.
پرەزيدەنت ەكى ەلدىڭ سالالىق مينيسترلىكتەرى مەن ۆەدومستۆولارى اراسىنداعى ىقپالداستىقتىڭ جاندانۋىن قۇپتادى. اتاپ ايتقاندا، بيىل مامىر ايىنان باستاپ ديپلوماتيالىق پاسپورت يەلەرى ءۇشىن ۆيزاسىز رەجيم تۋرالى جانە رەادميسسيالاۋ جونىندەگى كەلىسىمدەر كۇشىنە ەندى.
مەملەكەت باسشىسى زاماناۋي سىن-قاتەرلەردىڭ ترانسشەكارالىق سيپاتى ۇلعايىپ بارا جاتقانىنا توقتالىپ، وسى ورايدا قۇقىق قورعاۋ ورگاندارىنىڭ ءوزارا بايلانىستارىن تەرەڭدەتۋ قاجەت ەكەنىن ايتتى.
بەاتە ماينل-رايزينگەر مەن گەرحارد كارنەر قاسىم-جومارت توقايەۆقا كەزدەسۋگە مۇمكىندىك جاساعانى ءۇشىن العىس ايتىپ، پرەزيدەنت الەكساندر ۆان دەر بەللەننىڭ ىستىق ىقىلاسىن جەتكىزدى
- ءبىزدىڭ ساپارىمىز دەر كەزىندە ۇيىمداستىرىلدى. قازاقستان - ورتالىق ازياداعى ەكونوميكالىق تۇرعىدان عانا ەمەس، ساياسي جاعىنان دا ماڭىزدى سەرىكتەسىمىز. ءبىز قاۋىپسىزدىك، كوشى- قون سالالارى بويىنشا تىعىز ارەكەت ەتەمىز. ءوزىڭىز اتاپ وتكەنىڭىزدەي، كوپجاقتى الاڭداردا دا بىرلەسىپ جۇمىس ىستەيمىز. ەقىۇ مينيسترلەر كەزدەسۋىنە قاتىسقان قازاقستاننىڭ سىرتقى ىستەر ءمينيسترىن ۆەنا قالاسىندا قابىلداعانىما قۋانىشتىمىن. ويتكەنى ءبىز ەلىڭىزدىڭ اتالعان ۇيىمداعى كوشباسشىلىق پوزيتسياسىن جوعارى باعالايمىز، - دەدى اۋستريانىڭ سىرتقى ساياسات ۆەدومستۆوسىنىڭ باسشىسى بەاتە ماينل-رايزينگەر.
كەزدەسۋ بارىسىندا ەكونوميكالىق ىنتىماقتاستىقتى كەڭەيتۋدىڭ، سونداي-اق وڭىرلىك جانە حالىقارالىق كۇن ءتارتىبىنىڭ وزەكتى ماسەلەلەرى تالقىلاندى.
مەملەكەت باسشىسى پرەزيدەنت الەكساندر ۆان دەر بەللەنگە ىزگى سالەمىن جولدادى. قاسىم-جومارت توقايەۆ اۋستريا كوشباسشىسىن وزىنە قولايلى ۋاقىتتا قازاقستانعا ساپارمەن كەلۋگە شاقىراتىنىن راستادى.
ايتا كەتەيىك، بۇعان دەيىن پرەزيدەنت Xinjiang Lihua كومپانياسى ديرەكتورلار كەڭەسىنىڭ ءتوراعاسىن قابىلدادى.