مارتەبەلى مەيمانداردىڭ ساپارى 11-14-قازان كۇندەرىنە جوسپارلانعان.
جوعارى دەڭگەيدەگى كەلىسسوزدەر بارىسىندا قازاقستان مەن بەلگيا اراسىنداعى سان قىرلى ىنتىماقتاستىقتى نىعايتۋ پەرسپەكتيۆاسى تالقىلانادى.
پرەزيدەنت قاسىم-جومارت توقايەۆ پەن كورول فيليپپ جانە پاتشايىم ماتيلدا«قازاقستان- بەلگيا» ىسكەرلىك كەڭەسىنىڭ 4-وتىرىسىنا جانە ەكى ەل جوعارى وقۋ ورىندارى رەكتورلارىنىڭ فورۋمىنا، سونداي-اق باسقا دا ءىس-شارالارعا قاتىسادى دەپ جوسپارلانىپ وتىر.
ساپار قورىتىندىسى بويىنشا بىرلەسكەن مالىمدەمە قابىلدانىپ، ءبىرقاتار قۇجاتقا قول قويىلادى.
مەملەكەت باسشىسى قاسىم-جومارت توقايەۆ بەلگيالىقتار كورولى فيليپپ پەن ماتيلدا پاتشايىمدى اقوردادا قارسى الدى.
جوعارى مارتەبەلى مەيمانداردىڭ ساپارىنا وراي سالتاناتتى راسىمدەر زالىندا قۇرمەت قاراۋىلى ساپ تۇزەدى. تاراپتار رەسمي دەلەگاتسيا مۇشەلەرىن ءبىر-بىرىنە تانىستىردى.
ودان كەيىن قۇرمەت قاراۋىلى روتاسىنىڭ كومانديرى سالتاناتتى راپورت بەردى.
پرەزيدەنتتىك وركەستر قازاقستان مەن بەلگيانىڭ مەملەكەتتىك ءانۇراندارىن ورىندادى.
قاسىم-جومارت توقايەۆ، كورول فيليپپ پەن ماتيلدا پاتشايىم كىلەم توسەلگەن جولمەن قازاقستاننىڭ مەملەكەتتىك تۋىنا قاراي ءجۇرىپ ءوتتى. وسىدان كەيىن ەكى ەل باسشىلارىنىڭ شاعىن قۇرامداعى كەزدەسۋى باستالدى.
ايتا كەتەيىك، 11-14 قازان كۇندەرى بەلگيالىقتار كورولى فيليپپ جانە پاتشايىم ماتيلدانىڭ قازاقستانعا مەملەكەتتىك ساپارى وتەدى.
ساپار باعدارلاماسى ءتورت نەگىزگى باعىتتى قامتيدى. ولار — اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.
بەلگيادان قازاقستانعا 110 ادامنان تۇراتىن دەلەگاتسيا كەلەدى. ونىڭ قۇرامىندا ءتورت مينيستر، 25 كومپانيا باسشىسى، 10 ۋنيۆەرسيتەت رەكتورى جانە 13 جۋرناليست بار. دەلەگاتسيا قۇرامىنىڭ اۋقىمدى بولۋى بەلگيا تاراپىنىڭ الداعى ساپارعا جوعارى قىزىعۋشىلىق تانىتىپ وتىرعانىن كورسەتەدى.
ەۋروپالىق مونارحتار استانا مەن الماتىداعى مادەنيەت جانە عىلىم نىساندارىن ارالاپ، ەكى ەل اراسىنداعى ىنتىماقتاستىققا ارنالعان كەزدەسۋلەرگە قاتىسادى.