- بۇگىن مەن مەملەكەت باسشىسى رەتىندە قازاقستان حالقىنا ءداستۇرلى جولداۋىمدى جاريالايمىن. بۇل جولداۋدىڭ ءمانى دە، مازمۇنى دا ايرىقشا. 25-قازاندا ۇلتتىق مەرەكەمىز - رەسپۋبليكا كۇنىن اتاپ وتتىك. وسى كۇنى ەگەمەندىك تۋرالى دەكلاراتسيا قابىلداندى. ءبىز دەربەس ەل بولۋ جولىندا باتىل قادام جاسادىق. كوپ ۇزاماي تاۋەلسىزدىك تۋىن بيىككە كوتەرىپ، ەلدىگىمىزدىڭ ىرگەسىن بەكىتتىك. مىنە، بيىل قاسيەتتى تاۋەلسىزدىگىمىزگە 35 جىل تولىپ جاتىر. بۇل تاريحي مەجەنىڭ ۇلت شەجىرەسىندە الاتىن ورنى بولەك، - دەدى پرەزيدەنت.
مەملەكەت باسشىسى بيىل ناۋرىز ايىندا حالقىمىز مەملەكەتتىگىمىزدىڭ نەگىزگى تىرەگىن - كونستيتۋتسيامىزدى قابىلداعانىن اتاپ ءوتتى.
- بۇل تۇتاس ەلىمىز ءۇشىن تاريحي ءمان-ماعىناسى تەرەڭ وقيعا بولدى. كونستيتۋتسيانى بىرنەشە ۇرپاقتار اراسىنداعى قاستەرلى كەلىسىم دەپ اتاۋعا بولادى. ويتكەنى كونستيتۋتسيادا قازاقستاننىڭ قازىرگى ءبىتىم-بولمىسى مەن بولاشاقتاعى بەينەسى ناقتى ايقىندالدى. ازاماتتارىمىز جاپپاي قولداعان كونستيتۋتسيا 1- شىلدەدە زاڭدى كۇشىنە ەنىپ، ەلىمىزدىڭ ساياسي جۇيەسىنىڭ تۇبەگەيلى جاڭعىرۋىنا، جاڭا بيلىك ينستيتۋتتارىنىڭ قۇرىلۋىنا ۇلكەن سەرپىلىس بەردى. جۇرتىمىز جارقىن بولاشاققا باستايتىن اۋقىمدى جۇمىستى اتقارۋعا بەلسەندى تۇردە كىرىستى. ەل ومىرىندەگى تاريحي وزگەرىستەردىڭ بارلىعى حالىقتىڭ كوز الدىندا بولىپ جاتىر. بۇل ماسەلە اسا ماڭىزدى بولسا دا، كوپ ءسوز ايتۋدىڭ قاجەتى جوق دەپ ويلايمىن، - دەدى مەملەكەت باسشىسى.
ءىس-شاراعا قۇرىلتاي دەپۋتاتتارى، ۇكىمەتتىڭ جانە قازاقستان حالىق كەڭەسىنىڭ مۇشەلەرى، ورتالىق جانە جەرگىلىكتى مەملەكەتتىك ورگانداردىڭ باسشىلارى، قوعام وكىلدەرى مەن ەڭبەككەرلەر قاتىسىپ وتىر.
اۆتورلار
مارلان جيەمباي