ۇكىمەت بۇگىن «تازا قازاقستان» باستاماسىنىڭ جۇزەگە اسىرىلۋىن تالقىلايدى
استانا. KAZINFORM - بۇگىن ۇكىمەت وتىرىسى وتەدى. وندا مينيسترلەر كابينەتىنىڭ مۇشەلەرى مەملەكەت باسشىسىنىڭ «تازا قازاقستان» باستاماسىنىڭ جۇزەگە اسىرىلۋ بارىسىن تالقىعا سالادى.
وتىرىس بارىسىندا نەگىزگى باياندامانى ەكولوگيا جانە تابيعي رەسۋرستار ءمينيسترى ەرلان نىسانبايەۆ جاسايدى. مينيستر وسى جىلدىڭ باسىنان بەرى ەكولوگيالىق باستاما اياسىندا جۇزەگە اسىرىلعان رەسپۋبليكالىق جانە حالىقارالىق اكسيالاردىڭ ناتيجەلەرىنە باسا نازار اۋدارتادى. سونداي- اق وتكەن جىلى ىسكە قوسىلعان @TazaQazBot تەلەگرامم-چات- بوتىنا تۇرعىندار تاراپىنان ەڭ كوپ تۇسەتىن ماسەلەلەردى اتايدى. قاتتى تۇرمىستىق قالدىقتاردى جيناۋ، شىعارۋ جانە قايتا وڭدەۋ ءۇشىن زاماناۋي ينفراقۇرىلىمدى قالىپتاستىرۋ باعىتىندا اتقارىلاتىن جۇمىستارعا توقتالادى. ەلدى مەكەندەردى كوگالداندىرۋ جانە ەلدىڭ ورماندىلىعىن ارتتىرۋ ماسەلەلەرىنە دە نازار اۋدارتادى.
جيىن قورىتىندىسى بويىنشا باسپا ءسوز كونفەرەنسياسى وتەدى. وندا مىنا لاۋازىمدى تۇلعالار ب ا ق وكىلدەرى تاراپىنان تۋىنداعان ساۋالدارعا جاۋاپ بەرەدى:
ەكولوگيا جانە تابيعي رەسۋرستار ءمينيسترى ەرلان نىسانبايەۆ؛
ەكولوگيا جانە تابيعي رەسۋرستار ۆيتسە- مينيسترلەرى نۇركەن شاربييەۆ پەن جومارت اليەۆ؛
قوعامدىق بىرلەستىكتەر مەن ۇيىمداردىڭ وكىلدەرى.
ۇكىمەت وتىرىسى PrimeMinister.kz سايتىنان، YouTube رەسمي ارناسىندا، Facebook الەۋمەتتىك جەلىسىندە، سونداي-اق UKIMET Telegram-كانالىندا تىكەلەي كورسەتىلەدى.
باسپاءسوز كونفەرەنسياسىنىڭ تىكەلەي ەفيرى YouTube رەسمي ارناسىندا جانە Facebook الەۋمەتتىك جەلىسىندە جۇرەدى.
ەستەرىڭىزگە سالا كەتسەك، مەملەكەت باسشىسى قاسىم-جومارت توقايەۆتىڭ قولداۋىمەن ەلىمىزدە العاش رەت 2024 -جىلدىڭ 6 -ءساۋىرى مەن 11 -مامىرى ارالىعىندا «تازا قازاقستان» رەسپۋبليكالىق ەكولوگيالىق اكتسياسى وتكەن بولاتىن. اۋقىمدى ەكولوگيالىق اكتسيا بەس اپتاعا سوزىلدى. ولاردىڭ ءارقايسىسى بەلگىلى ءبىر تاقىرىپقا ارنالدى. سول كەزدە ءساۋىردىڭ 13 نە دەيىن وتكىزىلگەن «تازا ولكە» اپتالىعى بارىسىندا اۋماقتار مەن تۇرعىن ءۇي اۋلالارى تازارتىلدى. ودان كەيىنگى «كيەلى مەكەن» اپتالىعى تاريحي-مادەني ەسكەرتكىشتەر اۋماعىن اباتتاندىرۋ جۇمىستارىنا ارنالدى. «جاسىل ايماق» اپتالىعى اعاش كوشەتتەرىن وتىرعىزۋمەن، ەكپەلەردى اقتاۋمەن اتالىپ ءوتتى. ال «ونەگەلى ۇرپاق» اپتالىعى كەزىندە ارداگەرلەر مەن قارتتار ۇيلەرىنىڭ اۋماعى مەن اۋلاسى تازارتىلىپ، اباتتاندىرىلدى. سوڭعى «ءمولدىر بۇلاق» اپتالىعى بارىسىندا سۋ ايدىندارى - وزەن، كولدەردىڭ جاعاسى كۇل-قوقىستان تازارتىلدى.
سونداي- اق سول جىلى 2024-2029 -جىلدارعا ارنالعان «تازا قازاقستان» ەكولوگيالىق مادەنيەتىن دامىتۋ تۇجىرىمداماسى بەكىتىلدى. ول مىناداي نەگىزگى باعىتتار بويىنشا ىسكە اسىرىلادى:
ەكولوگيالىق ويلاۋ جانە مىنەز-قۇلىق، سونىڭ ىشىندە ىنتالاندىرۋ جانە ولاردى كوتەرمەلەۋ شارالارى؛
ەكولوگيالىق ءبىلىم؛
ەكولوگيالىق ءبىلىم جانە اقپاراتتىق ناسيحات.
ءاربىر باعىت بويىنشا تۇجىرىمدامانى ىسكە اسىرۋ بويىنشا قابىلداناتىن شارالاردىڭ تيىمدىلىگىن مونيتورينگىلەۋگە جانە قاجەت بولعان جاعدايدا ولاردى تۇزەتۋگە مۇمكىندىك بەرەتىن ءتيىستى ينديكاتورلار ايقىندالدى.
وتكەن جىلى الماتىداعى عىلىم ورداسىندا ءسوز سويلەگەن پرەزيدەنت قاسىم-جومارت توقايەۆ «تازا قازاقستان» اكسياسى -جاي ناۋقان ەمەس، حالقىمىزدىڭ كوزقاراسىن، بولمىسىن وزگەرتە الاتىن وتە ماڭىزدى جوبا ەكەندىگىن باسا ايتقان بولاتىن.
- اۋقىمدى ەكولوگيالىق باستاماعا، اسىرەسە جاستار بەلسەنە اتسالىستى. بۇل دا - جاقسى ءۇردىس. از ۋاقىت ىشىندە 2,5 ميلليوننان استام اعاش ەگىلدى، 200 دەن استام وزەن- كولدىڭ جاعاسى تازارتىلدى. وسى باستاما تۇراقتى جالعاسىپ، جاقسى داستۇرگە اينالۋى قاجەت. بۇل اكسيا تال ەگىپ، قوقىس جيناۋمەن شەكتەلمەۋگە ءتيىس. اتقارىلاتىن باسقا دا شارۋا كوپ. ەڭ باستىسى، بارلىعى شىن نيەتپەن جاسالۋى كەرەك، - دەگەن ەدى قاسىم-جومارت كەمەل ۇلى.
مەملەكەت باسشىسى بۇل باستامانىڭ ماڭىزدىلىعىن القالى جيىنداردا ۇنەمى ايتىپ كەلەدى. ءتىپتى، وزگەلەرگە ۇلگى-ونەگە كورسەتىپ، ءوزى دە ەلوردامىزدا ۇيىمداستىرىلاتىن ەكولوگيالىق اكسيالارعا قاتىسىپ تۇرادى.
مارلان جيەمباي