پرەزيدەنت «قازاق ءتىلى» قوعامىنىڭ بۇگىنگى قۇرىلتايى شىن مانىندە تاريحي ساتتە، ياعني، قاسيەتتى تاۋەلسىزدىگىمىزدىڭ 35 جىلدىعىنىڭ قارساڭىندا ءوتىپ جاتقانىن اتاپ ءوتتى.
قازاقستان ەگەمەندىك جولىنىڭ وسىنداي ايتۋلى مەجەسىنە بەدەلى بيىك، بولاشاعى جارقىن ەل رەتىندە قادام باسىپ وتىر.
— تاۋەلسىزدىك تۋىن كوتەرگەلى بەرى حالقىمىز كوپتەگەن بەلەستى ابىرويمەن ەڭسەردى. ءبىرتۇتاس ۇلت بولىپ، مەملەكەتتىگىمىزدىڭ ىرگەتاسىن قالادى جانە ونى نىعايتا ءتۇستى. بەرەكەلى بىرلىگىمىزدىڭ ارقاسىندا ءبىز سوڭعى جەتى جىل ىشىندە اۋقىمدى رەفورمالاردى تابىستى ىسكە اسىردىق. ەل ءومىرىنىڭ بارلىق سالاسىندا تۇبەگەيلى وزگەرىستەر جاساپ، تىڭ باستامالار كوتەردىك، — دەدى قاسىم-جومارت توقايەۆ.
ەڭ باستىسى، حالقىمىزدىڭ تەمىرقازىعىنا اينالعان قاستەرلى قۇجات — كونستيتۋتسيامىزدى قابىلدادىق. مازمۇنى ايرىقشا كونستيتۋتسيا ادىلەتتى قازاقستاندى قۇرۋ ىسىنە زاڭ تۇرعىسىنان جول اشتى.
— ەندى كونستيتۋتسياعا سايكەس ەلىمىزدىڭ تاۋەلسىزدىگىن، ەگەمەندىگىن، كەڭ بايتاق جەرىمىزدىڭ تۇتاستىعىن، ازاماتتارىمىزدىڭ زاڭدى قۇقىقتارىن جانە بوستاندىقتارىن قورعاۋ مەملەكەتىمىزدىڭ باستى، ءتىپتى، قاستەرلى مىندەتى سانالاتىن بولدى دەپ ايتساق، قاتە بولماس. بارشامىزعا تاۋەلسىزدىك — بارىنەن قىمبات اسىل دۇنيە. تاۋەلسىزدىك بولماسا، ءبىزدىڭ حالقىمىزدىڭ كەلەشەگى تىعىرىققا تىرەلەتىنى انىق. سوندىقتان تاۋەلسىزدىكتى قورعاۋ ءارى نىعايتۋ — ەڭ قاسيەتتى بورىش، ەڭ قاستەرلى پارىز، — دەدى مەملەكەت باسشىسى.
قاسىم-جومارت توقايەۆ كونستيتۋتسيا ءماتىنىن جازۋعا ءوزى دە تىكەلەي اتسالىسقانىن ەرەكشە اتاپ ءوتتى.
— ءار سوزىنە مۇقيات قاراپ، ءار بابىنا ەرەكشە نازار اۋداردىم. مەن ءۇشىن بۇل — ەڭ الدىمەن ازاماتتىق پارىز. ماسەلەن، كونستيتۋتسيادا ءبىز حالقىمىز ءۇشىن كيەلى «تاۋەلسىزدىك» جانە «ەگەمەندىك» سوزدەرىن باس ارىپپەن جازاتىن بولدىق. مۇنىڭ تەرەڭ ءمانى بار. ءبىز وسىلايشا ءاربىر ۇعىم-تۇسىنىككە ۇلكەن جاۋاپكەرشىلىكپەن قاراپ، تۇتاس قوعام ساناسىنا، اسىرەسە، وسكەلەڭ ۇرپاقتىڭ بويىنا ەلدىك قاسيەتتەردى سىڭىرەمىز، — دەدى ول.
جالپى، كونستيتۋتسيا حالقىمىزدىڭ دۇنيەتانىمىنا جانە وزىق زاڭناما تالاپتارىنا ساي جازىلعانى ايتىلدى.
— قازاقستاننىڭ كونستيتۋتسياسى كاسىبي تۇرعىدان وتە ساپالى دايىندالعان قۇجات دەپ كۇمانسىز ايتۋعا بولادى. وسى اۋقىمدى جۇمىسقا بىلىكتى زاڭگەرلەرمەن قاتار، فيلولوگيا سالاسىنىڭ تاجىريبەلى عالىمدارى مەن قازاق ءتىلى ماماندارى دا بەلسەنە قاتىستى. مۇنىڭ ءبارى قازىرگى قازاق ءتىلىنىڭ الەۋەتى مەن كۇش-قۋاتىنىڭ ايقىن كورىنىسى ەكەنى ءسوزسىز، — دەدى پرەزيدەنت.
ايتا كەتەيىك، مەملەكەت باسشىسى قاسىم-جومارت توقايەۆ حالىقارالىق «قازاق ءتىلى» قوعامىنىڭ 10- قۇرىلتايىندا ءسوز سويلەپ جاتىر.
پرەزيدەنت قازاق ءتىلىنىڭ ابىروي-بەدەلىن ارتتىرۋ ءۇشىن تاباندى جۇمىس ىستەۋ كەرەكتىگىن ايتۋدا.