كولساي ماڭىندا قاپتاعان مەيمانحانا مەن كيىز ۇيلەر: ولاردىڭ قۇرىلىسى زاڭدى ما
قونايەۆ. KAZINFORM - «كولساي كولدەرى» ۇلتتىق تابيعي پاركى - قازاقستانداعى ەڭ كورىكتى جەرلەردىڭ ءبىرى. بۇل وڭىرگە جىل سايىن مىڭداعان تۋريست ات باسىن بۇرادى.
تۋريستەر سانى ارتقان سايىن قوناق ءۇي، كيىز ءۇي مەن دەمالىس ورىندارىنىڭ سانى دا كوبەيىپ جاتىر. الايدا ولاردىڭ سالىنۋى قانشالىقتى زاڭدى جانە سانيتارلىق-ەكولوگيالىق تالاپتارعا ساي ما؟ بۇل ساۋالدارعا Kazinform ءتىلشىسى جاۋاپ ىزدەپ كوردى.
قۇرىلىستىڭ زاڭدىلىعى
«كولساي كولدەرى» ۇلتتىق پاركىنە بارا جاتقان جولدا تۋريستەر الدىمەن ساتى اۋىلى مەن پارك شەكاراسى اراسىنداعى جول بويىنا ورنالاسقان كوپتەگەن قوناق ءۇي، كاپسۋلالىق قوناقجايلاردى، كيىز ۇيلەردى كورەدى. بۇل نىسانداردىڭ باسىم بولىگى رەتسىز سالىنعان جانە كوپتەگەن تۋريست «وسى قۇرىلىستار زاڭدى ما، تابيعاتتى قورعاۋ زاڭناماسىن بۇزباي ما؟» دەگەن زاڭدى سۇراق قويادى.
جەرگىلىكتى تۇرعىنداردىڭ ايتۋىنشا، كەيبىر تۋريستىك نىساندار شارۋا قوجالىعىنا ارنالعان جەرلەردە بوي كوتەرۋى مۇمكىن، ال ونداي ۋچاسكەلەردە قۇرىلىس جۇرگىزۋگە تىيىم سالىنعان. بۇل ماسەلەنى ناقتىلاۋ ءۇشىن Kazinform اگەنتتىگى الماتى وبلىسىنىڭ اكىمدىگىنە رەسمي ساۋال جولدادى.
كەگەن اۋدانى اكىمدىگى ۇسىنعان رەسمي جاۋاپقا سايكەس، كەيبىر نىساندار شىنىمەن دە زاڭ بۇزۋشىلىقپەن - اۋىل شارۋاشىلىعى جەرلەرىندە سالىنعان. مۇنداي نىساندارعا قاتىستى ق ر اكىمشىلىك قۇقىق بۇزۋشىلىقتار كودەكسىنىڭ 136-بابى نەگىزىندە شارالار قابىلدانىپ جاتىر.
سونىمەن قاتار، 2024 -جىلدان باستاپ ءوڭىردى دامىتۋعا ارنالعان باس جوسپار ازىرلەنىپ جاتىر. ونىڭ اياسىندا جەرلەردىڭ ماقساتتى پايدالانۋ ءتۇرىن وزگەرتۋ، ءبىرىڭعاي ساۋلەتتىك كەلبەتتى قالىپتاستىرۋ جانە قۇرىلىس جۇمىستارىن ق ر «ساۋلەت، قالا قۇرىلىسى جانە قۇرىلىس قىزمەتى تۋرالى» زاڭىنىڭ تالاپتارىنا ساي رەتكە كەلتىرۋ كوزدەلگەن.
سانيتارلىق جانە ەكولوگيالىق تالاپتار
تۋريستەردى الاڭداتاتىن تاعى ءبىر ماسەلە - تۋريستىك ينفراقۇرىلىم نىساندارىندا سانيتارلىق جانە ەكولوگيالىق نورمالاردىڭ ساقتالۋى، اسىرەسە قوقىس جيناۋ جانە ونى جويۋ پروبلەماسى.
اكىمدىكتىڭ مالىمدەۋىنشە، بارلىق نىسان ق ر ەكولوگيالىق كودەكسى مەن «حالىقتىڭ سانيتاريالىق- ەپيدەميولوگيالىق سالاماتتىلىعى تۋرالى» زاڭ تالاپتارىنا ساي جۇمىس ىستەۋى ءتيىس.
- ۇلتتىق پاركتىڭ باقىلاۋ پۋنكتىنەن 600 مەتر قاشىقتىقتا ارنايى قوقىس پوليگونى جابدىقتالعان، - دەدى اكىمدىك وكىلدەرى.
تاعى ءبىر ماڭىزدى ماسەلە - يەسىز قالعان نىساندار مەن قۇرىلىس اياقتالعاننان كەيىن جينالماي قالعان قوقىس. كەيبىر ۋچاسكەلەردە قۇرىلىس ماتەريالدارى مەن قالدىقتار سول كۇيى قالعان.
اكىمدىك وكىلدەرى ق ر ەكولوگيالىق كودەكسىنىڭ 99-بابىنا سايكەس، نىسان يەسى قىزمەتىن توقتاتقان جاعدايدا جەردى باستاپقى قالپىنا كەلتىرىپ، تازالاۋ - رەكۋلتيۆاتسيا جۇمىستارىن جۇرگىزۋگە مىندەتتى ەكەنىن ەسكە سالدى.
رۇقساتتى كىم بەرەدى
قۇرىلىسقا رۇقسات بەرۋ جانە پايدالانۋعا ەنگىزۋ ق ر «ساۋلەت، قالا قۇرىلىسى جانە قۇرىلىس قىزمەتى تۋرالى» زاڭىنىڭ 19-بابى نەگىزىندە جۇزەگە اسىرىلادى. ول ءۇشىن جوبالىق-سمەتالىق قۇجاتتاما، ەسكيزدىك جوبانى كەلىسۋ جانە قۇرىلىسقا رۇقسات قاجەت. ەگەر نىسان قورعاۋ ايماعىندا ورنالاسقان بولسا، ۋاكىلەتتى ەكولوگيا باسقارماسىنان قوسىمشا كەلىسىم دە تالاپ ەتىلەدى.
قانشا نىسان تىركەلگەن
كەگەن اۋدانىنان اتاپ وتكەندەي، ۇلتتىق پاركتىڭ بۋفەرلىك ايماعىندا رەسمي تىركەلگەن 58 تۋريستىك نىسان بار. ناقتى مالىمەتتەردى ەكولوگيا دەپارتامەنتى مەن پارك اكىمشىلىگى قوسىمشا جيناقتاپ جاتىر.
ايتا كەتەيىك، وتكەن جىلى «كولساي كولدەرى» ۇلتتىق پاركىنە 395 مىڭنان استام تۋريست كەلگەن.
بۇعان دەيىن رەداكتسيامىز كولسايدىڭ بىرەگەي تابيعاتىنا تۋريستىك اعىننىڭ كوبەيۋى قالاي اسەر ەتۋى مۇمكىن ەكەندىگى تۋرالى ماقالا جاريالاعان بولاتىن. ماماندار تابيعاتتى كەلەر ۇرپاققا ساقتاۋ ءۇشىن دەر كەزىندە ءتيىستى شارالار قابىلداۋدىڭ ماڭىزىن اتاپ وتكەن ەدى.
وسىعان دەيىن الماتى وبلىسىندا ورنالاسقان تانىمال تۋريستىك اۋىلدا جەر داۋى تۋىنداعان ەدى.
ەسكە سالايىق، 2023 -جىلى الماتى وبلىسىنىڭ ساتى اۋىلى حالىقارالىق دەڭگەيدە ەڭ ۇزدىك تۋريستىك اۋىل رەتىندە تانىلىپ، بەدەلدى «Best Tourism Villages by UNWTO» سىيلىعىمەن ماراپاتتالدى.
سونداي-اق تۋريستەردىڭ قاۋىپسىزدىگىن كۇشەيتۋ ماقساتىندا قانداي جوبالار قولعا الىنعانى تۋرالى جازعان ەدىك.