مەملەكەت باسشىسى كاسپي يتبالىقتارىن ساقتاۋعا جانە ەكوجۇيەنى قورعاۋعا باعىتتالعان حالىقارالىق ىنتىماقتاستىقتى جانداندىرۋعا شاقىردى.
جيىندا پرەزيدەنت كاسپيدەگى بيوالۋانتۇرلىلىكتى ساقتاۋ ءۇشىن قوسىمشا شارالاردى قولعا الۋدىڭ ماڭىزىنا توقتالدى.
ونىڭ پىكىرىنشە، تەڭىزدىڭ تارتىلۋى، تابيعي ءومىر ءسۇرۋ ورتاسىنىڭ وزگەرۋى، لاستانۋ جانە انتروپوگەندىك جۇكتەمەنىڭ ارتۋى ۋىلدىرىق شاشاتىن ورىنداردى قالپىنا كەلتىرۋ، سونداي-اق وزەن اڭعارلارىنداعى ەكوجۇيەنى، فلورا مەن فاۋنانىڭ ەرەكشە وسال تۇرلەرىن قورعاۋ جۇمىستارىن كۇشەيتۋدى تالاپ ەتەدى.
- سولتۇستىك ارال تاجىريبەسى ينجەنەرلىك شارالار مەن تابيعاتقا باعدارلانعان عىلىمي تاسىلدەردى ۇشتاستىرۋ سۋ شارۋاشىلىعىنا قاتىستى جانە ەكولوگيالىق مىندەتتەردى ءتيىمدى شەشۋگە مۇمكىندىك بەرەتىنىن كورسەتتى. سونىمەن قاتار جاعالاۋداعى اۋماقتاردى ساقتاپ، كليماتتىق وزگەرىستەردىڭ سالدارىن جەڭىلدەتۋگە بولاتىنىن دالەلدەدى. زاڭسىز بالىق اۋلاۋعا جانە بيولوگيالىق رەسۋرستاردىڭ كولەڭكەلى اينالىمىمەن كۇرەسكە باسا ءمان بەرۋ قاجەت. بۇل ماسەلەنى ۇجىمدىق كۇش-جىگەر ارقىلى عانا شەشۋگە بولادى. قۇقىق قورعاۋ جانە تابيعاتتى قورعاۋ ورگاندارى اراسىندا اقپارات الماسۋدى جانداندىرىپ، بىرلەسكەن جەدەل ءىس-شارالار وتكىزۋ قاجەت. سيفرلىق مونيتورينگ قۇرالدارىن قولدانعانىمىز ءجون. قازاقستان وسى ورتاق جۇمىسقا كاسپي يتبالىعى مەن ونىڭ تىرشىلىك ەتۋ ورتاسىن ساقتاۋ ماقساتىندا قۇرىلعان مەملەكەتتىك تابيعي رەزەرۆات الەۋەتىن جۇمىلدىرۋعا ءازىر. يتبالىقتاردىڭ تىرشىلىك سيكلى ءۇشىن وتە ماڭىزدى ايماقتاردا انتروپوگەندىك اسەردى بارىنشا ازايتۋ ماقساتىندا ەكولوگيالىق دالىزدەردى ساقتاۋ ماسەلەسىنە دە باسا ءمان بەرگەن ءجون. سايىپ كەلگەندە، كاسپيدى يتبالىقسىز ەلەستەتۋ مۇمكىن ەمەس. ەلىمىز بيوالۋانتۇرلىلىكتى ساقتاۋ جونىندەگى حالىقارالىق قور قۇرۋ جۇمىسىن قولعا الدى. ونىڭ ماقساتى - تابيعاتتى قورعاۋ ىسىندە الەمدىك قوعامداستىقتىڭ كۇش-جىگەرىن بىرىكتىرۋ. كاسپي تەڭىزىنىڭ بىرەگەي ەكوجۇيەسى مەن سيرەك كەزدەسەتىن تۇرلەردى قورعاۋ قور قىزمەتىنىڭ ماڭىزدى باعىتتارىنىڭ ءبىرى بولادى. قور جۇمىسىنا بەلسەندى اتسالىسىپ، بىرلەسكەن ناقتى جوبالاردى ىسكە اسىرۋعا شاقىرامىن، - دەدى مەملەكەت باسشىسى.