پرەزيدەنتتىڭ ايتۋىنشا، 2000-2025-جىلدارى كاسپيدىڭ سۋ ايدىنى 16 مىڭ شارشى شاقىرىمنان استام اۋماققا قىسقارعان، ال يتبالىقتار سانى سوڭعى عاسىردا ميلليوننان 270 مىڭعا دەيىن ازايعان. بۇل تۋرالى اقوردا ءمالىم ەتتى.
قاسىم-جومارت توقايەۆ العاشقى كاسپي ەكولوگيا ءسامميتىن وتكىزۋ تۋرالى وزەكتى باستامانى دەر كەزىندە كوتەرگەن تۇرىكمەنستان پرەزيدەنتى سەردار بەردىمۇحامەدوۆكە ريزاشىلىعىن جەتكىزدى.
مەملەكەت باسشىسى كاسپيي تەڭىزىنىڭ ايماق حالقى ءۇشىن ستراتەگيالىق ماڭىزى زور ەكەنىنە توقتالىپ، بۇگىنگى كەزدەسۋدىڭ تاريحي سيپاتىن اتاپ ءوتتى.
- كاسپي - بىرەگەي تابيعي قازىنا، ميلليونداعان ادامنىڭ تىرشىلىك كوزى، كۇللى ەۋرازيا قۇرلىعىنداعى نەگىزگى كولىك جانە ەنەرگەتيكا تورابى. سوندىقتان تەڭىز ەكوجۇيەسىن ساقتاۋعا، ەڭ الدىمەن، ءبىزدىڭ مەملەكەتتەرىمىز مۇددەلى بولۋى كەرەك. وسى ورايدا، مۇنى تەك ەكولوگيالىق داعدارىس ەمەس، سالدارى وتە ءقاۋىپتى ەكونوميكالىق احۋال دەپ باعالاعان يران پرەزيدەنتى ماسۋد پەزەشكيان مىرزانىڭ پىكىرىن قۇپتايمىن. ەگەر قازىر جەدەل ءارى باتىل شارالار قابىلدانباسا، ەكولوگيالىق جاعداي كۇرت ناشارلاۋى ىقتيمال. بۇل كاسپيي ماڭىندا ورنالاسقان ەلدەردىڭ حالقىنا عانا ەمەس، الەمدىك قوعامداستىققا دا زاردابىن تيگىزەدى. 2000-جىلدان 2025-جىلعا دەيىن تارتىلعان تەڭىز اۋماعى 16 مىڭ شارشى شاقىرىمنان استى. جەكەلەگەن ۋچاسكەلەردە سۋ جاعادان ونداعان شاقىرىمعا دەيىن الىستاپ كەتكەن. كاسپييگە كەلىپ قۇياتىن وزەن سۋىنىڭ ازايۋى، كليماتتىڭ جىلىنۋى، انتروپوگەندىك جۇكتەمەنىڭ ارتۋى نازىك تابيعي جۇيە مەن تەڭىزدىڭ بيوالۋانتۇرلىلىگىنە وتە جاعىمسىز اسەر ەتىپ، وراسان نۇقسان كەلتىرەدى. كاسپي يتبالىقتارىنىڭ احۋالى قاتتى الاڭداتادى. سوڭعى عاسىردا ولاردىڭ سانى 1 ميلليوننان 270 مىڭعا دەيىن ازايدى، - دەدى مەملەكەت باسشىسى.