قازاقستان پرەزيدەنتى مارتەبەلى مەيمانعا ءىلتيپات ءبىلدىرىپ، بۇل ساپار ەكىجاقتى قارىم-قاتىناسقا تىڭ سەرپىن بەرەتىنىن جانە ءوزارا ءتيىمدى ىنتىماقتاستىقتى دامىتۋ پەرسپەكتيۆاسىنا جول اشاتىنىن ايتتى.
- ساپارىڭىزدىڭ تاريحي ءمانى زور دەپ سانايمىن. ويتكەنى بۇعان دەيىن كامبودجا پرەمەر-مينيسترلەرىنىڭ قازاقستانعا جولى تۇسپەگەن. ال ءسىزدىڭ قازاق جەرىمەن جەكە بايلانىسىڭىز بار. اكەڭىز 1982 -جىلى ەلىمىزگە كەلگەن ەكەن. بۇگىن ەكىجاقتى قارىم- قاتىناستىڭ اۋقىمدى ماسەلەلەرىن تالقىلايمىز. قازاقستان حالقىنىڭ ەلىڭىزگە ىقىلاسى ەرەكشە. كوپتەگەن وتانداسىمىز كامبودجاعا بارىپ، ونىڭ كورىكتى جەرلەرىمەن تانىسقىسى كەلەدى. ەلدەرىمىز اراسىندا تىكەلەي اۋە قاتىناسىن اشۋ ماسەلەسىن پىسىقتاۋىمىز قاجەت. سونداي-اق گۋمانيتارلىق سالاداعى بايلانىستاردى جانداندىرعانىمىز ءجون، - دەدى قاسىم-جومارت توقايەۆ.
پرەزيدەنت قازاقستان مەن كامبودجا تابيعي بايلىعى مول ەلدەر ساناتىندا ەكەنىن جانە اتالعان سالاداعى ىقپالداستىقتى كەڭەيتۋگە بولاتىنىن ايتتى.
سونىمەن قاتار كەلىسسوزدەر بارىسىندا ساۋدا-ەكونوميكالىق بايلانىستاردى نىعايتۋ ماسەلەلەرى قاراستىرىلاتىنىن جەتكىزدى.
ايتا كەتەيىك، اقوردادا مەملەكەت باسشىسى قاسىم-جومارت توقايەۆ كامبودجا كورولدىگىنىڭ پرەمەر-ءمينيسترى حۋن مانەتتى قارسى الدى.
ەسكە سالا كەتسەك، بيىل شىلدە ايىندا شاڭحايدا وتكەن دۇنيەجۇزىلىك جاساندى ينتەللەكت جونىندەگى كونفەرەنسيا اياسىندا مەملەكەت باسشىسى كامبودجا پرەمەر-ءمينيسترى حۋن مانەتپەن كەزدەسكەن ەدى. حۋن مانەت كامبودجانىڭ قازاقستانمەن قارىم- قاتىناستى نىعايتۋعا مۇددەلى ەكەنىن راستادى.