جوعارىداعى كورشىلەردىڭ كەسىرىنەن پاتەرىڭىزدى سۋ باسسا نە ىستەۋ كەرەك

پەتروپاۆل. KAZINFORM - كوپقاباتتى ۇيدە تۇراتىندار ءجيى تاپ بولاتىن ماسەلەلەردىڭ ءبىرى - جوعارىداعى كورشىلەردىڭ سالعىرتتىعىنان نەمەسە اپاتتىق جاعدايدان پاتەردى سۋ باسۋى. مۇندايدا مۇلكىڭىزگە زالال كەلۋى مۇمكىن. وسىنداي كەلەڭسىز جاعدايدا نە ىستەۋ قاجەت؟

ادۆوكات ولگا گاۆريك جىكتەپ بەردى:

ءبىرىنشى كەزەكتە - قاۋىپسىزدىكتى قامتاماسىز ەتۋ

ەڭ الدىمەن، سۋدى توقتاتۋ ءۇشىن بارلىق قاجەتتى شارانى قولدانۋ كەرەك، ياعني كورشىلەرگە حابارلاسۋ، سۋمەن جابدىقتاۋدى ۋاقىتشا توقتاتۋ نەمەسە اپاتتى قىزمەتتى شاقىرۋ قاجەت.

كەلەسى قادام - زالالدى قۇجات جۇزىندە تىركەۋ

كورشىلەر شىعىننىڭ ورنىن تولتىرامىز دەپ ۋادە بەرسە دە، زاڭدى جولمەن ارەكەت ەتۋ ماڭىزدى. سەبەبى بۇل جاعداي سوتقا دەيىن بارۋى ىقتيمال. ول ءۇشىن:

پاتەر يەلەرى كووپەراتيۆى (پ ي ك) نەمەسە مۇلىك يەلەرى بىرلەستىگى (م ي ب) ءتوراعاسىن، ەگەر ولار بولماسا، اپاتتى قىزمەتتى، كورشىلەر مەن سۋ اققان پاتەردىڭ يەسىن شاقىرىپ، سۋ باسۋ اكتىسىن راسىمدەڭىز؛

اكتتە تەكسەرۋ جۇرگىزىلگەن مەكەنجايدى، ۋاقىتى مەن قاتىسۋشىلاردىڭ تولىق مالىمەتتەرىن جانە بايلانىس نومىرلەرىن كورسەتىڭىز؛

سۋ باسقان جەرلەر مەن بۇلىنگەن مۇلىكتى ناقتى سيپاتتاپ جازىڭىز؛

فوتو جانە ۆيدەو ءتۇسىرىلىم جۇرگىزىپ، دالەل رەتىندە ساقتاڭىز؛

اكتكە بارلىق قاتىسۋشى قول قويۋى ءتيىس، سونىڭ ىشىندە سۋ اققان پاتەردىڭ يەسى دە؛

ەگەر پاتەر يەسى قول قويۋدان باس تارتسا، بۇل تۋرالى اكتىدە جازباشا كورسەتىلەدى.

پاتەر جالعا بەرىلگەن بولسا شە؟

ەگەر سۋ اققان پاتەردە جالعا الۋشىلار تۇرىپ جاتسا، پاتەر يەسىمەن بايلانىسىپ، اكتىنى سونىڭ قاتىسۋىمەن راسىمدەۋ قاجەت. بايلانىس دەرەكتەرى بولماعان جاعدايدا، ۋچاسكەلىك پوليتسەيگە جۇگىنۋ ارقىلى يەسىن تابۋعا بولادى.

زالالدى باعالاۋ جانە وتەماقى ءوندىرۋ

كەلەسى قادام - تاۋەلسىز باعالاۋشى ماماندى شاقىرىپ، ماتەريالدىق شىعىن كولەمىن انىقتاۋ. بۇل قىزمەت اقىلى، ءبىراق باعالاۋشىنىڭ بەرگەن ەسەبى مەن چەگىن سوتقا دالەل رەتىندە ۇسىنۋعا بولادى.

سودان كەيىن كورشىگە سوتقا دەيىنگى شاعىم جىبەرىپ، بارلىق دالەلدى قوسا تىركەپ، بەلگىلى ءبىر مەرزىم ىشىندە زالالدى وتەۋىن سۇراڭىز.

سوت ارقىلى ءوندىرىپ الۋ

ەگەر كورشى بەلگىلەنگەن مەرزىمدە جاۋاپ بەرمەسە نەمەسە وتەماقى تولەۋدەن باس تارتسا، سوتقا ءوزىڭىز، نە ادۆوكات، زاڭگەردىڭ كومەگىمەن جۇگىنۋگە تۋرا كەلەدى. سوتقا تالاپ ارىزبەن بىرگە مىناداي قۇجاتتاردى:

پاتەردىڭ مەنشىك قۇجاتىن؛

پاتەردى سۋ باسۋ اكتىسىن؛

راستايتىن فوتو جانە ۆيدەو ماتەريالداردى؛

كۋاگەرلەردىڭ انكەتالىق مالىمەتتەرىن؛

شىعىنداردى راستايتىن چەكتەر مەن باعالاۋ قورىتىندىسىن قوسا تاپسىرۋ كەرەك.

ادۆوكاتتىڭ ايتۋىنشا، زالال كەلتىرىلگەن كۇننەن باستاپ، 3 جىلعا دەيىن سوتقا جۇگىنۋگە بولادى.

بۇعان دەيىن الاياقتار اتىڭىزدان نەسيە راسىمدەسە نە ىستەۋ كەرەكتىگىن جازعان ەدىك.

اۆتور

اقەركە داۋرەنبەك قىزى