جاپونيا قىتاي اسكەري كەمەلەرىنىڭ تايۆان ماڭىنداعى قوزعالىسى تۋرالى حابارلادى

استانا. KAZINFORM - قىتاي قارۋلى كۇشتەرى 1-ساۋىردەن باستاپ تايۆان ماڭىندا اسكەري وقۋ-جاتتىعۋ وتكىزەتىنىن جاريالادى. بۇل تۋرالى جاپونيانىڭ NHK تەلەارناسى حابارلادى.

جاپونيا قورعانىس مينيسترلىگى 1-ساۋىردە قىتايدىڭ «شاندۋن» اۋە تاسىمالداۋشى كەمەسى مەن زىمىراندىق جويعىشتارىن قوسا العاندا 4 اسكەري كەمەسىنىڭ جاپونيانىڭ وكيناۆا پرەفەكتۋراسىنا قاراستى يوناگۋني ارالىنىڭ وڭتۇستىگىندەگى (شامامەن 440 شاقىرىم قاشىقتىقتاعى) تىنىق مۇحيتى اكۆاتورياسىندا جۇرگەنىن حابارلادى. سونىمەن قاتار «شاندۋن» كەمەسىنىڭ بورتىنان جويعىش ۇشاقتاردىڭ ۇشىپ-قونۋى تىركەلدى.

وسىعان دەيىن قىتاي حالىق-ازاتتىق ارمياسىنىڭ شىعىس اسكەري وكرۋگى 1-ساۋىردەن باستاپ تايۆان ماڭىندا قۇرلىق، تەڭىز، اۋە جانە زىمىران اسكەرلەرىنىڭ قاتىسۋىمەن جاتتىعۋ وتكىزىلەتىنىن مالىمدەگەن بولاتىن.

شىعىس اسكەري وكرۋگىنىڭ دەرەگىنشە، وقۋ-جاتتىعۋ بارىسىندا تايۆان ماڭىنداعى تەڭىز جانە اۋە كەڭىستىگىندە كوپباعىتتى مانيەۆرلەر جاسالىپ، اسكەري دايىندىق جانە كەشەندى باقىلاۋدى قامتاماسىز ەتۋ ماشىقتارى پىسىقتالادى. سونداي-اق بىرىككەن اسكەري وپەراتسيالاردىڭ جاۋىنگەرلىك دايىندىعى تەكسەرىلمەك.

اسكەري وكرۋگتىڭ حابارلاۋىنشا، بۇل وقۋ-جاتتىعۋ «تايۆان سەپاراتيستەرىن جاقتايتىن كۇشتەرگە» قاتاڭ ەسكەرتۋ سانالادى جانە قىتايدىڭ مەملەكەتتىك ەگەمەندىگى مەن اۋماقتىق تۇتاستىعىن قورعاۋ ماقساتىندا جۇزەگە اسىرىلىپ وتىر.

بۇدان بۇرىن قىتاي اسكەرىنىڭ تايۆان ماڭىنداعى اسكەري جاتتىعۋلارى تۋرالى اقپارات تاراتقان بولاتىنبىز.

اۆتور مۇقتار مۇرات